AMTAW 17
17
Thesalonika y kalop sa nai
1Naibaly nichi ly Amphipoli avang hawi Apolonia avang y tako prei i, Thesalonika avang y tym bo, hu y ly Judachi i achura yhm awm; 2naibaly Pawla ly mymy i reita kamta mymychi teng y kun iy Anawn Kani tlen thomrei Tameuh i cha-iu leu dengdairei hawihai palai ka-thui thui pi iy, 3Krista ly ngari patang ai nai hawi, kadeichi theung i dengdairei angthau bi ai nai angchi yb nai saichi py chai pyn pa-rei thui pi pachai i, “Hini Isu, mymy i leu kang thui pi nai ly, mymy ly Krista ne,” napi. 4Hunaibaly mymychi theung y phyreichi ai ly parawi pajau i, Pawla nini Sila hawi amkawm u bo; Tameuh ai tahm khai nai Krik khumi mipui neangneangchi hawi, neampachy miteaung keh nawi rawm naichi py amkawm teang. 5Na i py Judachi my paleung no i, seng meingtym y khumi kamngo atho kasi amichi ai mo mymychi teng y pahawi iy, khumi mipuichi ai palau achu i avang bawibawichi ai ly khrukhra hai; naibaly Jason i yhm y amiu iy nichi ai khumi mipuichi teng y pahawi ai nai tau. 6Naibaly nichi ai niu y i, Jason hawi amjo amnau takhra amichi ai mo avang miteaung kehchi teng y ryh iy, “Khaileaung pri y kulu piupa nai keungchi ly hi y py ang tym i, 7Jason my ly anga hai lawh; hinichi bawibawi ly Isu napi nai samrang takhra leaungrei awm, nanai Kaisara i leu pei nai tangai y,” nanai aeu u. 8Naibaly huna nai satang thai baly nichi ly khumi mipuichi hawi avang miteaung kehchi ai py khrukhra hai bo. 9Naibaly Jason hawi takhrachi ai kham pi i patheu bo.
Beria y kalop sa nai
10Naibaly amjo amnauchi my ly vum aneng y my Pawla nini Sila ai ly Beroia avang y pato praw; nini ly hu y tym baly Judachi i achura yhm y kun hawi bo. 11Hu i khumichi ly Thesalonika avang i khumichi tleaung y ly hawi kyh, ati mana nai mo nabaly nichi ly paleung kawn parai naimy huni leu tangai iy, huni satang thui pi nai ly teng mo teng y mo, nanai Tameuh i cha-iu y kani tleirei hau u. 12Hunai deaungkho y nichi theung y khumi neangneang ym; Krik neampachy tahm asang naichi hawi, neampacho nawi rawm naichi py. 13Na i py Thesalonika avang i Judachi ly Pawla ly Beroia avang y py Tameuh i leu thui pi, nanai thai baly, hu y py chei u i khumi mipuichi ai thui thli iy khrukhra hai bi bo. 14Hunaibaly amjo amnauchi my ly pangli y tym pa-rei chei ai nai Pawla ai ly pato praw veng bo: Sila nini Timothei naini hu y awm hawi jo rai. 15Naibaly Pawla ai tha nai keungchi my ly Atheni avang y tym pa-rei ni ai pahawi; naibaly Sila nini Timothei ly kamjau ryrei mymy teng y tym praw ai nai leu taviu nai syn i vawi veng bo.
Athen y kalop sa nai
16Naibaly Pawla ly Atheni avang y nini ai ajeng nai thym khala y ly, huni avang ly tameuh myn kawi nanai niu i, mymy ly paleung am-yh pajau y bo. 17Hunaibaly achura yhm y Judachi hawi, Tameuh ai tahm khai naichi hawi, seng meingtym y mymy hawi kani tleirei achu nai ngiereichi ai py ka-thui thui pi.
18Naibaly Epikuria khumi hawi Stoik khumichi theung y khumi kacheng amichi mo mymy hawi avum. Phyreichi ly, “Hini khumi leu kapeung ly ati thui ai nai tau mo?” napi. Phyreichi my ly, “Tameuh takhrachi i satang thui nai ngaw khyh,” napi. mymy ly Isu i satang hawi angthau bi nai leu py thui pi nai deaungkho y. 19Naibaly mymy ai ly patawn iy Areopaki y pahawi i mymy teng y, “Hini nang i leu patiu nai kangtha ly kaichi ai thui pi thai na a? 20Hini atiti rengrangchi ly kaichi i kano keung y nang tym hai nai bo; hunaibaly hini atiti awm nai saichi pany ai nai ngai he,’. napi. 21(Atheni avang i khumi bawibawichi ly mymychi i avang y angvyn awm naichi py, ra nai tleirei ly leu kangtha nanai baly thui ai nai mo, tangai ai nai mo awm khrum khrum reng nai ne.)
22Naibaly Pawla ly Areopaki sala y my angdo iy, “Nangchi Atheni avang i khumichi awi, ati cheaungkhangra y nangchi khrikhri pa-rei reita y tahm khai parai nai khumi ne, nanai kapany bo. 23Kai pavai nai tarawi y nangchi i chiu reng nai myn khen nai khala y maicham harei, salo y, PANY Y NAI TAMEUH I VUI, nanai tajiu nai kaniu bo. Hunaibaly nangchi i pany y nai chiu reng nai ai ly kang thui pi nai he. 24Khaileaung pri hawi, huni theung y ati cheaungkhang bawibawi sa nai Tameuh ly kani khaileaung Areng ne nai deaungkho y khumichi i kiu y sa pi nai yhm y ly awm y leang; 25atiti avaw nai kamta ly khumichi i kiu y kalop sa pi nai py awm vai y leang, ati mana nai mo nabaly mymy naini ati cheaungkhangchi teng y hengra hawi, taho naira hawi, atiti bawibawi py pei nai keung ne; 26khaileaung salo verei y awm ai nai thi vanrei y my khumi cheaungkhang ai sa iy, mymychi i vui neng hawi awm naira jyh py khai pi; 27nichi ly patham patham naimy Tameuh ai hau i niu u tanga ai nai; ne mang ly mymy ly achi leaung leaungrei ai palo hai y leang; 28mymy deaungkho y achi heng py heng, angto py angto, awm py awm nai teu; nangmychi i khulym paseang kakawp amichi mo py, ‘Kaichi py mymy i kangpreang ne teang, nanai thui nai kamta ly. 29Hunaibaly achi ly Tameuh i kangpreang ne baly, Tameuh i awm nai sai ly muku mo, tangka mo, lengseaung mo, khumi i kupe kakawp hawi ka-vo thip nai kamta, nanai dawn ai nai avo y leang. 30Hunaibaly Tameuh my achi i pany y khala i neng ly dawn pi y leang; na i py vai ly meingtym tleirei i khumi bawibawichi ai uikhei ai nai leu ang pei bo; 31mymy ly mymy i khumi khai rym nai ai ly khaileaung pri y hawihai palai tarahih hai ai nai kani thui yb nai deaungkho y; huna nai Tameuh my mymy ai ly kadeichi theung i dengdairei pathau iy, khumi bawibawichi teng y thai hai khyp bo,” napi.
32Naibaly nichi ly kadeichi theung i nai angthau bi nai satang thai bo nabaly, phyreichi my ly panui hai, na i py phyreichi my ly, “Hini leu ly kaichi kang tangai bi ai mang,” napi. 33Hunaibaly Pawla ly mymychi theung i dengdairei theu vui bo. 34Na i py khumi amichi mo ly mymy teng y amkawm akhikan i ym bo; hunichi theung y Areopaki i khumi Dionusia hawi, neampachy leaungrei amyn Damari napi nai hawi, nini hawi khumi takhrachi py ne.
നിലവിൽ തിരഞ്ഞെടുത്തിരിക്കുന്നു:
AMTAW 17: KCL02
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khumi Common Language Bible © Bible Society of Myanmar, 2005.
