AMTAW 15
15
Jerusalem y miteng sa nai
1Naibaly amichi mo Judai pri i dengdairei kathiu iy, Mosi i Reita kamta lengkhym takip y baly hengra ngo u pajau y leang, nanai amjo amnauchi ai patiu.#Lev 12.3 2Hunaibaly Pawla nini Barnaba ly mymychi hawi khrikhri pa-rei aei ala nai aei y alam nanai hawi, aly ngang nai deaungkho y, Pawla nini Barnaba ai ly hinichi theung i amichi hawi mo huni leu khrukhra naira y Jerusalem i amtaw thau naichi hawi, miteaung kehchi teng y kalau ai nai khai rym bo. 3Hunaibaly palau takhra kamkawmchi my ly nichi ai pavum i, nichi my Cheng Takhrachi ly mo hi ali teang nai satang thui pi prei naimy Phawiniki pri hawi Samari pri y tako prei bo; hunaibaly amjo amnauchi ly khrikhri pa-rei kawn hai. 4Naibaly nichi ly Jerusalem y tym baly palau takhra kamkawm hawi, amtaw thau naichi hawi, miteaung kehchi py nichi ai kawn, naibaly Tameuh my mymychi ai teaung iy atiti sa nai bawibawichi ly thui pi. 5Na i py Pharisai kamkawm ym teang nai amichi mo ly angthau iy, “Cheng Takhrachi ai ly lengkhym takip hai ai nai tla, Mosi i Reita patawm ai nai py leu pei ai nai tla,” napi.
6Naibaly amtaw thau naichi hawi miteaung kehchi ly huni satang adawn ai nai achu u bo. 7Naibaly khrikhri pa-rei adeng nai bo y Petera ly angthau i mymychi teng y, “Amjo amnauchi awi, Cheng Takhrachi ly Satang Kahawi leu kai i labeaung y thai i ym ai nai, Tameuh my jangvaini y nangchi theung i dengdairei kai ai khai rym nai sai ly nangchi pany bo.#Ataw 10.1–43 8Naibaly paleung ai pany nai keung Tameuh my achi ai ang pei nai kamta ly Phailo Kachai mymychi teng y pei teang iy, mymychi ai kawn nanai pany hai bo;#Ataw 2.4, 10.44 9naibaly achi hawi nichi hawi patle takhra y naimy, ym naira deaungkho y mymychi i paleung chai hai bo. 10Hunaibaly achi i amsi sangumchi hawi achi py patawm pajau y nai langvui savan ly abangnaichi i tlang tleaung y patli ai nai ati mana nai Tameuh ai cham u lawh a? 11Mymychi i kamta ly achi py Areng Isu i pahenra deaungkho y heng naira nga ai, nanai achi aym nai veng,” napi.
12Hunaibaly khumi mipui bawibawichi ly katheu y naimy Barnaba nini Pawla ai Tameuh my teaung iy cheng Takhrachi theung y ka-ma-rachi hawi atiti lyh ai awm naichi satang thui pi nai sala ryrei ly tangai u bo. 13Naibaly nini thui pajau nai bo y Jakob my thui lawh bi,
14“Amjo amnauchi awi, kai i leu tangai u; Angchei y ly Tameuh my mymy i amyn apu ai nai mymychi theung i dengdairei khumichi ai vawi takhra ai nai Cheng Takhrachi ai de nai sai satang ly Sumeona ly thui bo. 15Naibaly huni leu hawi amochi i leu ly atlyh nai ne:
16‘Hunai bo y khumi takhrachi hawi,#Amo 9.11–12
Kai i amyn nga nai Cheng Takhrachi bawibawi py
Areng ai hau u thai ai nai,
17Kai ali teang ai i,
Davida i taichy anawi nai ly kaimy sa bi ai,
Phra naira ngierei py kaimy sa bi ai i,
Padyh teang ai, nanai
18Khaileaung palum angchei kha i dengdairei hini satang pany hai reng nai keung Areng my ly ang napi,’ nanai tajiu nai ly.
19Hunai deaungkho y achi ly Cheng Takhrachi theung i Tameuh mang y mo hi naichi ai ly khrukhra hai moh sina; 20na i py nichi ly myn y chiu nai atiti chai y naichi hawi, angai nai hawi, mawi taau ka nai hawi, thi cha nai hawi anawn ai nai, achi ly mymychi teng y cha pa ai nai hawi keh, nanai dawn kai ly.#Theu 34.15–17; Lev 17.10–16, 18.6–23 21Mosi ly jangni i dengdairei meingtym tleirei y mymy i leu thui pi pateang nai keungchi ai nga reng nai bo, achura yhm y py Anawn Kani tleirei y mymy i leu ly phai reng be,” napi.
Ym nai cheng takhrachi teng y cha pa nai
22Naibaly amtaw thau naichi hawi, miteaung kehchi hawi, palau takhra kamkawm bawibawichi hawi ly mymychi i kamkawm theung i nai khumichi ai vawi iy, Pawla nini Barnaba hawi vanrei Antiokei avang y pato baly hawi, na u; Juda, Barsaba napi nai hawi Sila py, amjo amnauchi theung y miteaung keh kyh nai, nini ai vawi. 23Naibaly hina nai kamta myni i kiu y pa i, “Amtaw thau naichi hawi amjo amnauchi theung y miteaung kehchi ly Antiokei avang i hawi Suria pri hawi Kiliki pri i Cheng Takhra amjo amnauchi ai ang kawn ba. 24Achi i kamkawm theung i khumi amichi mo leu thui nai ang khrukhra hai i, nangchi ai paleung phra hai, nanai kaichi thai; kaichi ly nichi teng y ati sai py leu pei y leang. 25Hunai deaungkho y kaichi ly leu vanrei adyh nai achu iy, 26kaichi i ngai parai nai Barnaba nini Pawla, Areng Isu Krista i amyn y dei ai mawn y nai khumi, nini hawi vanrei chei ai nai vawi nai khumichi ai nangchi teng y pato teang baly avo, nanai dawn u. 27Hunaibaly Juda nini Sila ai kang pato nai he, nini my py hini satang ly leu y ang thui pi teang ai mang. 28Phalo Kachai hawi kaichi ly hini leu aly len parai nai ny y baly myn ji ra nai ly nangchi i tlang tleaung y tym hai y baly avo napi; 29myn y apatyp nai mawi hawi, thi hawi, taau ka nai mawi cha nai hawi, angai nai hawi anawn u, kang napi; hunichi ly nangchi amkym baly nangchi i vui hawi ai; noso kahawi awm u ba,” nanai tajiu.
30Hunaibaly nichi ai ly pato i Antiokei avang y tym kathiu bo; naibaly khumi mipuichi ai ly palau achu iy cha pei. 31Naibaly phain u pajau iy paleung awmnem nai leu ne nai deaungkho y khrikhri pa-rei kawn u. 32Naibaly Juda nini Sila ly Tameuh i leu thui nai keung py ne ryp i, amjo amnauchi ai neangneang leu pachei iy khaw hai. 33Naibaly hu y ly kra kyh awm nai bo y mymychi ai pato nai keungchi teng y vawi ali teang ai nai amjo amnauchi my ly paleung awmnem naimy vawi hai ali teang bo. 34[Na i py Sila ly awm ai nai avo, nanai dawn i hu y awm jo rai.] 35Naibaly Pawla nini Barnaba ly khumi takhra neangneangchi hawi Antiokei avang y Areng i leu thui nai hawi patiu nai py awm jo.
Pawla nini Barnaba amprei hawi nai
36Naibaly kani majirei mo awm nai bo y ly Pawla my Barnaba teng y, “Vai chei hawi bi sina ly, ani i Areng i leu thui nai meingtym tleirei y amjo amnauchi ai de prei iy, mymychi ly mana mana awm mo, nanai khen hawi sina,” napi. 37Naibaly Barnaba ly Johan, Marka napi nai ai myni teng y hawi ai nai tau; 38na i py ni ly Pamphulia pri y myni ai ali pi veng iy, kalop sa naira y myni teng y chei teng y nai deaungkho y, Pawla my ly ni ai hawi ai nai avo tapi y leang.#Ataw 13.13 39Hunaibaly khrikhri pa-rei aei i amprei hawi iy, Barnaba ly Marka ai mymy teng y hawi i Kupra tlawn y paleaung mang chei hawi. 40Pawla my ly Sila ai vawi i, amjo amnauchi my ni ai Areng i pahenra y au nai bo y theu vui bo. 41Naibaly mymy ly palau takhra kamkawmchi ai ly khaw hai prei iy Suria hawi Kiliki pri ly hi be bo.
നിലവിൽ തിരഞ്ഞെടുത്തിരിക്കുന്നു:
AMTAW 15: KCL02
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khumi Common Language Bible © Bible Society of Myanmar, 2005.
