AMTAW 12
12
Ana patheng naira tym bi nai
1Naibaly huna nai thym tham khala y ly samrang Heroda my palau takhra kamkawmchi theung y amichi ai mo ana ai tau nai kiu jaha bo. 2Mymy ly Johan i amjo Jakob ai ly haisau hawi ateng ka bo. 3Huna nai ly Judachi ai kawn hai, nanai pany iy mymy ly Petera ai py patiu teang. Huni ly tako angbo abawi y nai neng ne. 4Naibaly ni ai patiu nai bo y ly theaung y paeaung iy, ni ai typ ai nai tavaimi leaung palyh leaung palyhrei, kamkawm palyhreichi teng y au. Katlen Vui nai pawi pajau nai bo y khumi humchi teng y pahawi ai nai tau.#Theu 12.1–27 5Hunai deaungkho y Petera ai ly theaung y paeung jo rai; na i py palau takhra kamkawmchi my mymy i vui Tameuh teng y chiu sa pi pathyp.
Petera theaung i lawi nai
6Naibaly Heroda my ni ai hawi ai nai khala y, huni vum y ly Petera ly sangkry nyhrei pachu naimy tavaimi leaung nyhrei sala y i, typ nai keungchi py katheu pa-kho ahawi y awm i theaung y typ. 7Naibaly khen cham, Areng i kani pri amtaw thau nai leaungrei ly mymy i ahawi y angdo, mymy ai paeung naira y py ati mo kangvang angvang. Naibaly mymy ly Petera i pana y tabeang i, ni ai palawi iy, “Angthau kaliki jau,’ napi. Naibaly sengkry ly mymy i kiu i nai tla vui bo. 8Naibaly kani pri i amtaw thau nai my ly mymy teng y, “Neina akyn ly, nang i phainai py pachu,” napi. Naibaly mymy ly huna nai sa. Naibaly kani pri i amtaw thau nai my ly mymy teng y, “Kanih adan ly, kai teng y abang,” napi. 9Naibaly mymy ly theu i abang bo, kani pri i amtaw thau nai i sa nai sai ly ameimang ne, nanai pany y i, amang mang y niu nai mo, nanai palawn lawh. 10Naibaly angchei i typ nai meingtym hawi, pa-nyh i typ nai meingtym py katlen hawi nai bo y ly avang mang y theu ai nai tamo katheu y tym iy, huni ly myni i vui am-eaung bo: naibaly nini theu hawi i, lam harei katlen bo; naibaly kani pri i amtaw thau nai my ly ni ai leh pi veng ryp bo.
11Naibaly Petera amcheng bo nabaly., “Areng my mymy i kani pri i amtaw thau nai ai pato i, Heroda i kiu i nai hawi, Judachi i tau nai bawibawi ra i dengdairei ly kai ai palawi bo, nanai vai ly kai pany khyp bo,” napi. 12Naibaly adawn pajau bo nabaly Johan, amyn ka-reu Marka napi nai i amhm Mari i yhm y tym; hu y ly khumi neangneang awm achu iy chiu sa. 13Naibaly mymy ly dangkhum i katheu y takhei i, amyn Rodi napi nai anglo leaungrei paeaung ai nai chei. 14Naibaly mymy ly Petera i raawi ma i, kawn nai deaungkho y katheu ly paeaung y naimy kun ali teang vui iy, “Petera ly katheu pa-kho ahawi y angdo ho,” nanai thui pi. 15Na i py nichi my ly mymy teng y, “Nang ly pathu nai bo to,” napi. Ni my ly “ne khyp e,” nanai aei akhikan. Naibaly nichi my ly, “Mymy i kani pri i amtaw thau nai na a tu ly,” napi. 16Na i py Petera ly takhei jojo rai; naibaly nichi ly paeaung iy mymy ai niu i khrikhri pa-rei rengrang tlai ly, napi. 17Hunaibaly mymy ly katheu u y ai nai kiu y paka iy, Tameuh my theaung i nai mymy ai patheu nai saichi thui pi bo. Naibaly mymy ly. “Hini satang ly Jakob hawi amjo amnauchi ai thui pi ba,” napi. Naibaly mymy ly theu iy takhra mang y chei bo.
18Naibaly kani si bo nabaly tavaimichi ly Petera ma mang y awm veng mo, nanai khru ala nai khru y alam na. 19Naibaly Heroda ly ni ai hau i niu pajau y, naibaly typ nai keungchi ai deng i nichi ai padei ai nai leu pei. Naibaly mymy ly Judai pri i dengdairei Kaisari avang y chei i hu y awm bo.
20Naibaly mymy ly Tura hawi Sidon avang i khumichi i tlang tleung y khrikhri pa-rei paleung hawi y bo. Hunaibaly nichi ly leu vanrei adyh naimy mymy teng y chei, naibaly Blasta, samrang ai ira y typ nai keung ai ly ahawi ka-dawi asa i, nichi i pri ly samrang i pri mang y cho nga reng nai deaungkho y aly ai nai hnei. 21Naibaly adeu nai kani y Heroda ly areng kanih adan iy areng atehra y ateh i, mymychi teng y leu thui. 22Naibaly khumi bawibawichi my ly, “Tameuh i raawi na a hi ly, khumi i raawi py ny y leang bo y!” nanai aeu u. 23Naibaly mymy ly Tameuh teng y palo naira pei y nai deaungkho y, Areng i kani pri i amtaw thau nai my ly tlenrei khyh my ni ai no hai iy kaleung my cha i dei bo.
24Na i py Tameuh i leu ly ahei i, peung ryh peung ryh bo. 25Naibaly Barnaba nini Sawla ly huna nai sabawm pajau iy, Jerusalem i dengdairei ali teang i Johan, amyn ka-reu Marka napi nai ai ly nini teng y hawi bo.
നിലവിൽ തിരഞ്ഞെടുത്തിരിക്കുന്നു:
AMTAW 12: KCL02
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khumi Common Language Bible © Bible Society of Myanmar, 2005.
