GENESIS 7
7
Buanso Thu
1LALPA nih Noa sinah, “Na dâwngsung tla hen lawng ah lût ule, nangmah pakhat cho hi laikulh pumpi ah thil dik titu na si ti ka nan theih. 2Sawnhnâk ding ah sa thenhlimh bawp sarih chiau siah le, sa thianglo lakah mi khawm bawp khat chiau siah na. 3Vâ chi kip lakah mi bawp sarih siah rawh. Hi tual tlûnah ramsa leh vâ tla chi kip an nung hen an zan nawlh khonâk ding hen. 4Tu thawk hen ni sarihnâk ah thil nung ka siam mi zawng veih ding hen ni sâwmli leh zân sâwmli ruah ka sûrtir awt,” a ti. 5Chun, Noa chu LALPA nih thu a pêk mi zawng chu a ti rawh.
6Buanso laikulh ah a tlung liauah Noa chu kum zaruk asi. 7Buanso thawk hen him ding hen amah leh a nupi leh a fa tla leh an nupi tla hen lawng sungah an lût rawh. 8Pathian nih thu a pêk hâwi hen ramsa chi kip a nunau leh a mipa, ran leh vâ, a thiang mi khawm a thianglo mi khawm, 9Noa sinah lawng sungah an lût rawh. 10A ni sarih nûnah chun buanso chu a tlung rawh.
11Noa chu kum zaruk a tling kum ah a thla nihnâk ni leisarih ni ah tual tangah mi tî zawzawng chu a hawng lang le, vân ah mi kawtkâ zawzawng chu â awng le, 12ruah chu ni sâwmli leh zân sâwmli tual tlûnah a hawng sûr rawh.
13Chu ni ah chun Noa leh a nupi leh a fapa pathum- Sem, Ham, Japhet leh an nupi tla hen chun lawng ah an lût rawh. 14An sinah chun ramsa chi kip vulh mi leh mâng ah mi a lian a mê, vâ chi kip an lût bâk. 15Pathian nih thu a pêk mi hâwi hen thil nung chi kip, 16a nunau leh a mipa chu Noa sinah lawng ah an lût bâk rawh. Churawhchun, LALPA nih Noa dunglei ah kawtkâ chu a khâr rawh.
17Tî chu a hawng sâng vima le, ni sâwmli tiang hen lawng puanh rê hen tî chu a thûk rawh. 18Tî chu a hawng thûk dadauh le, lawng chu a tlûn leiah â puan ko. 19Tlâng sâng chem tla nîm ver hen a thûk rawh. 20Tlâng sâng tlûnah feet 25 lanh tiang hen a sâng.
21Tual ah mi thil nung zawzawng, vâ tla, ramsa tla leh minung zawzawng an thi hep. 22Tual tlûnah an thâw an suah mi zawzawng an thi hep. 23LALPA nih tual tlûnah thil nung zawzawng, minung zawzawng, ramsa tla leh vâ tla a veih hep na rawh. Noa leh a sinah an um mi tla cho an him. 24Ni zâ leh sâwmnga ding chu tî â zûk lo thlo.
നിലവിൽ തിരഞ്ഞെടുത്തിരിക്കുന്നു:
GENESIS 7: BCLBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bawm Common Language Bible © Bangladesh Bible Society, 2004. All rights reserved.
