MATHAI 13
13
Khaichi thehpa gentehna
(Mrk. 4.1-9; Luk. 8.4-8)
1Tuani mah in Jesu inn a pat a pawtkhia a tuipi geiah atou a. 2Tuachi`n mipi tampitak a kiangah ahung kikhawm ua, tuachi`n amah gunkuang sungah atuang a, mipite piaugei ah ading uhi. #Luk. 5.1-3. 3Tuachi`n aman a kiang uah gentehna tampi agen a.
“Ngaiun, khaichi thehpa khaichi theh in a kuankhia hi. 4Tualeh athehlaiin, khaichi khenkhat lamsik ah atu a, vasate hungpaiin ane siangta uhi. 5Khenkhat suangsilei lak ah atu a, leitak atamlouh jiakin ahung poupai a. 6Hinanleh ni ahung suah in haivul in ahung om a; thagui thuklut aneihlouh jiak un a gawsiangta uhi. 7Tualeh akhen ling lak ah atu a, lingte hungkhang in amauhte a depmangta hi. 8Hinanleh adangte leihoih lak ah atu a, hungkhang in gah hungnei in: akhen in zakhat, akhen in sawmguk, akhen in sawmthum bang.”
9“Kuapeuh ja`kna ding bil nei jousiahin ja heh!” achi hi.
Gentehna kizakna
(Mrk. 4.10-12; Luk. 8.9,10)
10Tualeh a nungjuite hungpaiin a kiang ah, “Bang ding a amauh kiang a gentehna a thu gen nahia?” achi ua.
11“Aman adawng a akiang uah, ajiak van gam thugu`k pen noute theihding a piak nahita ua, hinanleh amauhte piak ahinai kei. 12Kuapeuh aneite piak behlap ahi ding a, ahau ding, hinanleh kuapeuh aneiloute, aneihsun zong amah a pan laksak ahi ding. #Mat. 25.29; Mrk. 4.25; Luk. 8.18; 19.26. 13Tuajiakin akiang uah gentehna in thu ka gen ding ahi, munapi-in a muthei kei ua, zana pi-in a zathei kei ua, a theithei kei uh. 14Tuachi`n Jawlnei Isaiah in ana genkholh atung uah ahung tangtungta hi:
‘Jak jaw naja ding ua, hinanleh na theithei kei ding uh;
tualeh muhjaw na mu ding ua, hinanleh na muthei kei ding uh,
15hih mite lungtang a nguaigawpta,
abilte uh abing a,
tualeh amit asi`ngta uhi.
Atuachih keileh amit un a mukha ding ua,
abil un ajakha ding ua,
alungtang un atheisiam kha ding ua,
ahung kinungleh kha ding ua,
amauh kana damsak kha ding achia,’
ana chih pen.
16“Hinanleh nou mit pen ahampha hi amuh jiak in! Nabil uh zong ahampha hi ajak jiak in. #Luk. 10.23,24. 17Adiktak in kung hilh ahi, Jawlnei tampi leh midik tampi in zong na silmuhte uh muh a ut ua, hinanleh amukei uh, na silzakte uh zong jak a ut ua, hinanleh azakei uhi.
Khaichi thehpa Gentehna hilhchianna
(Mrk. 4.13-20; Luk. 8.11-15)
18“Tuajiakin, khaichi thehpa gentehna thu ngai un. 19Kuahiam khat in kumpi gam thu ajak a, tuapen a theihsiam keileh, migilou khat hungpaia a lungtang a thehsa pen ahung laksak hi. Hihpen lamsik a khaichi tute ahi uhi. 20Hinanleh kuapeuh suangsilei lak a khaichi tute ahihleh, thu aja a kipaktak in apompai hi. 21Hinanleh amah ah thagui thuklut aneihlouh jiakin tomnoukhat sung a om a, thu jiak a gimthuakna hiam, gawtna hiam ahung om takin apukpai hi. 22Kuapeuh ling lak a khaichi tute ahihleh thu ja a, leitung awlmohna leh hauhsakna khemna in thu a dep a, gahlou in ahung omta hi. 23Hinanleh kuapeuh leihoih lak a khaichi tute ahihleh thu ja a, theisiam ahi: tuachi`n gah anei takpi a, akhen zakhat bang, akhen sawmguk bang, akhen sawmthum bang a hung pungte ahi uh,” achi hi.
Buhtak leh buhkhem gentehna
24Gentehna dang akiang uah agen kik a: “Van gam ahihleh mi alou a khaichi hoih thehpa tawh teh ahi. 25Hinanleh louneipa a ihmut kal in, agalpa hungpaiin buhtak lak ah buhkhem atheh a apaimangta hi. 26Tuachi`n buh ahung pou a, ahung vuih takin buhkhem zong ahung kilang a. 27Tuachi`n innneipa silate hung paiin akiang ah, ‘Pu, lou ah khaichi hoih thehlou nahi hiam; buhkhem ahung om bang chidan ahia?’ achi ua. 28Aman akiang uah, ‘Melma bawl ahi,’ achi hi. A silate`n akiang ah, ‘Huate vapai a kavalak uh nungphal hiam?’ achi ua. 29Hinanleh aman, ‘Phallou e, atuachih keileh buhkhem na lakna lak uah buhtak zong na bawtkhawm kha ding uh. 30Buhlak hun dongin poukhawm phot uhen, buhlak hun chiangin buhlate kiangah, amasa in buhkhemte lakhawm phot masa unla, hal dingin kankhawm un, tualeh buhtakte ka buh inn ah koihkhawm un, kachi na ding achi hi.’”
Ankam tang gentehna
(Mrk. 4.30-32; Luk. 13.18,19)
31Gentehna dang akiang uah a genkik a: “Van gam pen ankam tang chi mi`n alak a alou a atheh tawh kibang ahi. 32Khaichi tang lak ah neupen ahi a, hinanleh ahung pousang chiangin loupa dang sang in alianjaw a, sing ahung suak a, tuachi`n tungleng vasate a hungpai ua, aba lak ah agiak uh,” achi hi.
Tol a gentehna
(Luk. 13.20,21)
33Gentehna dang akiang uah agen kik a: “Van gam ahihleh tol numei in alak a annel tehna thum lak a atheh a, athawh masiah aphum tawh kibang ahi,” achi hi.
Jesu`n gentehnate azakna
(Mrk. 4.33,34)
34Hihte tengteng Jesu`n gentehna in mipite kiangah agen a; gentehna louin akiang uah bangmah agen kei hi. 35Jawlnei in Gentehna in,
“Ka kam ka kak ding a,
leitung pianchil a kipan sil kisel ka genkhia ding,”
chia agen ahung tangtun theihna ding in. #Psa. 78.2.
Buhkhem gentehna hilhchianna
36Tuachi`n Jesu`n mipite khakhia in innsung ah alutta a, tualeh a nungjuite akiang ah hungpai in, “Lou a buhkhemte gentehna thu kou kiangah hung hilhchian in,” achi ua.
37Aman adawng a akiang uah, “Khaichi hoih thehpa pen Mihing Tapa ahi a; 38alou ahihleh leitung ahi a, khaichi hoihte ahih uleh van gam tate ahi uh a; tualeh buhkhemte pen migilou tate ahi uhi; 39melma athehpa ahihleh dawi gilou ahi a, buhlak hun ahihleh huntawpni ahi a, buh atte ahihleh vantungmite ahi uhi.” 40Tuajiakin buhkhemte a lakkhawm ua mei a ahal mah bang un, hun tawpni chiangin a om ding: 41Mihing Tapa in vantungmite asawl ding a, a kumpi gam a kipan in siatna sil bawlte leh mikhialte tengteng a khawmkhia ding ua, 42haltuina meipi lak ah amauhte apai ding hi. Tuamun ah kah leh hagawina aom ding hi. 43Tuahun chiangin midiktatte ahihleh a Pa uh kumpi gam ah nisa bang in avakta ding uhi, jakna ding bilnei jousuah in ja uhen!
Gou kiphual gentehna
44Gentehna dang ahihleh, “Van gam ahihleh lou a gou kiphualdap bang ahi, tuapen mi`n amuh a aphualdap a, a kipak sengseng jiakin apai a aneih jousiah a zuaksiang a tua lou alei hi.”
Tuikep suang a gentehna
45Tualeh van gam pen sumsinmi tuikepsuang hoih zong bang ahi kik hi, 46aman tuikep suang mantam tak khat amu a, aneih jousiah azuak a aleita hi.
Ngen a gentehna
47“Tualeh, van gam ahihleh ngen, tuipi a khuh a namchin tuamkhawm bang ahi kik hi. 48Tuapen adim chiangin, apiau ah a kaikhia ua, atou ua: ahoihteng bawm sung ah akhum ua ahoihlou teng apai uhi. 49Huntawpni chiangin huachi bang in aom ding, vantungmite ahung paikhia ding ua, midiktat lakpan in mikhialte a khenkhia ding ua 50tualeh amauhte haltuina meidil ah apai ding uh, tuamun ah kah leh hagawina a om ding hi.”
Dikna thak leh alui
51Jesu`n akiang uah, “Hih silte jousiah na theisiam uai?” achi a. Amauhte`n akiang ah,
“Hi, Toupa,” achi ua.
52Tuachi`n Jesu`n akiang uah, “Tuajiakin laigelhmi van gam hilh a om jousiah, innneipa a goubawm a kipan a sillui leh silthak hung pholhkhia bang ahi,” achi hi.
Nazareth ah Jesu nial a omna
(Mrk. 6.1-6; Luk. 4.16-30)
53Tualeh hichi ahi a, Jesu`n hihbang gentehna thute agenzoh in tuamun a kipan in a pawtkhiata a 54tuachi`n a omna khua a hungtung a, a kikhopna inn uah amauhte thu ahilh a, amauhte`n lamdang asa mahmah ua, “Hih mipa`n pilna leh hihbang sil thupi septheihna khoia akilak ahia? 55Hihpa sing bawlsiampa tapa hilou amaw? Anu Mari kichi hilou amaw, tualeh a sanggamte Jakob, Joseph, Simon leh Judah hilou uh maw? 56Tualeh a sanggam numeite eite tawh omkhawm hilou maw? Hihpa`n khoisan a kipan a hihte jousiah mu ahia?” achi ua. 57Tuachi`n a tungah ahehta ua, hihnanleh Jesu`n akiang uah, “Jawlnei jaw ama khualam leh ama innlam ah chihlouh ngal pahtawi louh in a om kei,” achi hi. #Jhn. 4.44. 58Tualeh agintat louh jiak un tuamun ah nasep thupi dang atambawl kei hi.
നിലവിൽ തിരഞ്ഞെടുത്തിരിക്കുന്നു:
MATHAI 13: THKHBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.
