LUK 22
22
Juda rui Jisu ta Zuanhmei
(Met 26.1-5; Mrk 14.1-2; Jhn 11.45-53)
1Kaanpatpui Ngai twna kawmei Khay Loumakpui Ngai ana guang khwan the.#Tat 12.1-27 2Khoutei amuh daihmei nunc khatni Riakdanv dinhpouc nunc rui Jisu ta swluai nuhpui chaeng phu bam khwan e. Kalam thu kaniw meic nunc ta ping khwan e. 3Khoutei ziap ruhna kanei pang khou kazauhmei Iskariot twna kawmei Juda khou Seitaan gut the. 4Khoutei Juda tei amuh daihmei nunc khatni ravkai rigaanv kapy nunc daeng thangc tatna akumhna kamei rui Jisu ta zuanctu nuh puni cho twmei kaphianh the. 5Khoutei kaniw neihla the, kumna kakhang syan tii khang nuh the. 6Juda ni hei tei nuh the, kumna meic pang bam makmei ganv zaucna kata tinym khang kadouchamei zauc the.
Nkhamhmei Taektw
(Met 26.17-25; Mrk 14.12-21; Jhn 13.21-30)
7Khay Loumakpui Ngai tuang Kaanpatmei lauziu khaeng nimei tingmik tei guang the. 8Khoutei Jisu rui Pitar lev Jahon ta ndiuna, “Kaanpatpui taektw tu khang nangney tatna aniu khang chamdaanv tho,” twna sa the.
9“Tabui bamv khou chamdaanvlou o twna cho?” twna kaney rui thanv the.
10Khoutei kaney khou sa the, “Nangney kaidai khou tei gut pwkhou, duilai puancna tat bammei gaanv khat pu nangney ta ariw puni. Kathei layna kamei gutmei kai khou tei gut tho. 11Kumna mi kai kaipouc khou tei, ‘Dinhpouc kaziap nunc lev Kaanpatpui taektw tu nimei bamv kiu tabui khou tei cho twna kamei rui sa e,’ twna sa tio. 12Kamei rui nangney khou kai kauh khou tanvna lou ntanghmei kai daihmei akhat lyanlou puni. Mi khou tei chamdaanv tho.”
13Kaney tat the, kumna Jisu rui kaney khou saloumei kahak tei ariw the. Kumna kaney Kaanpatpui ngai khang tei chamdaanv the.
14Kaganv tangc pwkhou, Jisu khatni kaziap nunc tei tu khang dungckey the. 15Khoutei Jisu rui kaziap nunc khou tei sa the, “Ai ryanramei ariw makmei hu khou mi Kaanpatpui taektw hei nangniw lev tu nchamclou niina bammei tuang the. 16Kalam thu ai rui nangniw khou sa tuang e: nthuihmei Kaanpatpui ngai taektw Ravguangc guangcdic khou tu mak saanv, mi hei thu ai tu dat ni tu hamh the.”
17Khoutei buangh akhat laana, kamei rui thuanckulouna sa the, “Mi hei laa tho, kumna nangniw meic guayna zangv tho. 18Kalam thu ai rui nangniw khou sa tuang e: Ravguangc guangcdic guang mak saanv, drakha thai dui hei ai thu zangv dat ni tu hamh the.”
19Kamei rui ntyan dwm akhat laana thuanckulouna, by bak the. Kumna hei tei kaniw khang tiina sa the, “Mi hei nangniw khang rui tiiloumei apumc the; ata ningtow khang nangniw mi hei taanc o.”
20Hei tei kumcna, tu tang zangv tang pwkhou, buangh tei laana sa the, “Mi buangc hei nangniw khang bun patloumei, latdyng thanh tuang azei the.#Baanhhy baibal asaekc khou kathaek 19 tuang twan ata ningtow khang nangniw mi hei taanc o twna samei khou rui thauna kathaek 20 hei thu maek ge. #Jer 31.31-34 21Tiki ata zuanctu nimeipu tei ai lev kuakpaeng akhat na khou baanlaan kariu bam e.#Kal 41.9 22Meic Nac Mpouh hei thu kakhang damclou tangmei thei layna tat bam tuang de; tiki kata zuanctumeipu tei mu kasan si e dav!” 23Mi pu kiu thow lana cho twna kaniw pang khou kakhi thau the.
Daic Nimei lam khou Kaphianhmei
24Kaniw pang khou thow ta tei daic liangmei swna laalou puni cho twna ni kaniw pang khou latgeic thau the.#Met 18.1; Mrk 9.34; Luk 9.46 25Khoutei Jisu rui kaniw khou sa the, “Zaatc Zentenmei guangc nunc rui kamei nunc ruc khou kaipouc sw e, khatni meic nunc ruc khou ngamv sinmei nunc rui kaniw ta zauzian thaymeipu twna sa e.#Met 20.25-27; Mrk 10.42-44 26Tiki nangniw thu hei tei kumc nina hamh e. Nangniw pang khou daic liangmei kamei tei alauc liangmei kumc nina e, khatni kapy swmei kamei tei siamruaimei kumc nina e.#Met 23.11; Mrk 9.35 27Thow tei daihmei cho? Kuakpaeng khou dungc bammei tei ny, siamruai sw bammei tei cho? Kuakpaeng khou dungc bammei kamei tei hamh nah cho? Tiki ai nangniw pang khou siamruai swpui mei kumcna bam tuang e.#Jhn 13.12-15
28“Nangniw hei ata nchanvmei ganv khou ata bam nduanghmei nunc the. 29Apu rui akhang tiiloumei kumcna ai rui ni nangniw khang guanghdic akhat tii the. 30Kumna atuang guangcdic khou nangniw ni akuakpaeng khou tu nchamc zangv nchamc puni, khatni guangh bamvpaeng khou dungcna Isaraelmei kaikhwang ruhna kanei ta sin puni.#Met 19.28
Pitar rui Kamei Jisu Mei Hamh e Twna Sa Nimei ta Dinc Kasuakcloumei
(Met 26.1-35; Mrk 14.27-31; Jhn 13.36-38)
31“Simon, Simon, gehu katang kumc nangniw ta katang khang Seitaan rui ney pat kan the. 32Tiki Simon, nang rammei maan mak khang, ai nang khang huayneylou kan the. Nang akhou hanc guang pwkhou, nang chana nunc ta titanclou o.”
33Khoutei, “Poubauhmei, kangkai khou ni, theihmei khou ni, ai nang thei lay tat khang alung ding the,” twna Pitar rui sa the.
34Tiki Jisu rui sa the, “Ai nang khou sa tuang e: Pitar, nang rui nang hei amei hamh e twna, sa luan kathumh mak saanv aseic hei nruay khuangc ni tu hamh e.”
35Khoutei Jisu rui kaniw khou sa the, “Ai rui nangniw ta syankhau ni, khau ni, phaythuapc ni tiphungh makna ndiu pat khou tei, nangniw khang gaat tuang nai buh cho?”#Met 10.9-10; Mrk 6.8-9; Luk 9.3; 10.4
“Ramh gaat tuang maek ge,” twna kaniw rui daw the.
36Jisu rui kaniw khou sa the, “Tiki ntaw thu, syankhau nai e thei phungc tho, khau ni phungc tho; baengsaeng maek ge thei nang phey zuancna liu tho. 37‘Kata nkhuaimei pang khou chaklou the,’ twna hylou e. Ai rui nangniw khou samei tuang e: mi hei akhou guang tangclou puni the. Ngguay, alam khou hyloumei guay tei guang tangc nthuih puni the.”#Isa 53.12
38“Poubauhmei, zauclo, baengsaeng kanei nai the,” twna kaziap nunc rui sa the.
“Hei tei biuc the,”#Hei tei biuc the hamh e thei Hei tei nuh the twna Jisu rui sa the.
Jisu Olive Chyng khou Huayneymei
(Met 26.36-46; Mrk 14.32-42)
39Jisu tat patna, kamei tat raph rap bammei bamv Olive Chyng thangc tat kan the. Kumna kaziap nunc ni kathei lay tat khwan e. 40Mi bamv tei guang tangc pwkhou, kamei rui kaziap nunc khou, “Nangniw nthiammei khou bowlou mak khang huayney o,” twna sa the. 41Kamei mi bamv khou tei rui ntauh ndat tangc biuhmei saan thangc tat kasuanh gutna, khuksun keyna huayneyna sa the, 42“Apule, nang rui nuh e thei mi buangc hei akhou rui laa ganclou o; tiki ai ningmei hamh e, nang ningmei sw kan dio.” 43Khoutei tingkauh thangc rui kauh baanchara keyna kapumtan titanclou the.#Baanhhy baibal asaekc khou thu kathaek 43 lev 44 hei maek ge. 44Kamei kalung ryanrana huayney ranvna huayney the, kumna zei talanvdui kumcna kandih khou zow key the.
45Kamei huayney bammei khou tei rui thau datna, kaziap nunc daeng khou pat dat the. Khoutei kaniw lungh ryanra lakna zip bammei ta ariw the.
46“Tabui swna nangniw zip bam tu cho? Nangniw nthiammei khou bowlou mak khang thauna huayney o,” twna kaniw khou sa the.
Jisu ta Nymmei
(Met 26.47-56; Mrk 14.43-50; Jhn 18.3-11)
47Jisu rui mi kumna sa bam khou, ziap ruhna kanei khou kazauhmei Juda twna kawmeipu rui nduanghna meic kangdai guang the. Kamei Jisu daeng khou guangna kata kaput the. 48Khoutei, “Juda, nang Meic Nac Mpouh ta kaputna zuanctu ni twna cho?” twna Jisu rui kakhou sa the.
49Kaniw rui sw punimei tei Jisu thei laymei nunc tei thay la thena, “Poubauhmei, baengsaeng rui dow di kho cho?” twna sa the. 50Khoutei kaniw pang khou gaanv khat rui tingkuh bangc gaanv khat ta dow the, kumna kanu siap pat the.
51Khoutei, “Sw dat ri tho!” twna Jisu rui sana, mi pu nu tei kahilouna tigaylou dat kan the.
52Khoutei Jisu rui, kata nym khang guangmei amuh daihmei nunc, ravkai rigaanv kapy nunc khatni gaanvthaih nunc khou tei sa the, “Nangniw kwamtupui mei ta nym ni kumcna baengsaeng khatni thing dangv sinna guang tu cho? 53Tingmik pum ai Ravkai khou nangniw lev bam nchamc bam tuang de; tiki nangniw ata nym mak ge. Tiki mi hei nangniw tuang ganv tina the—zinghmei ngamv tuang ganv tina the.”#Luk 19.47; 21.37
Pitar rui Kamei Jisu Mei Hamh e Twna Samei
(Met 26.57-58,69-75; Mrk 14.53-54,66-72; Jhn 18.12-18,25-27)
54Kaniw rui Jisu ta nymna zay tat the, kumna tingkuh kai khou zay guang the. Khoutei Pitar ni tat mpaanna lay guang khwan e. 55Mi khou tei kaimav khou mai swlouna dungc haengvna bammei nunc pang khou kamei ni lay dungc bam khwan e. 56Banghpui gaanv khat rui kata mi khou tei dungc bammei ta mai riw khou rui how lana, kata matingna, “Mi pu hei Jisu thei laymei de,” twna sa the.
57“Ai kata thay mak ge,” twna kamei rui mi pui khou tei sa the.
58Kanakc datmei tangv, meic baihmei gaanv khat rui kata how lana, “Nang ni kaniw pang khou kazauhmei de,” twna sa the.
“Ai kiuc hamh e,” twna Pitar rui sa the.
59Ganvdak akhat dou tangv, meic baihmei gaanv khat rui, “Mi pu hei kathei laymei changh de. Kamei Galilimei de,” twna sa the.
60Khoutei, “Nang sa bammei hei tabui tuang cho, ai thay mak ge!” twna Pitar rui daw the. Mi dyng khou tei nruay khuangc the. 61Khoutei Poubauhmei ziangrih patna, Pitar ta zauc the. “Aseic nruay khuangh makmei hu khou, nang amei hamh e twna sa luan kathumh puni,” twna Poubauhmei rui kakhou saloumei tei kamei ningtow the. 62Khoutei kamei kapaengc patna, kalung kabiuna kap the.
Rihmei nunc rui Jisu ta Sinnuimei
(Met 26.67-68; Mrk 14.65)
63Khoutei Jisu ta gaek bammei nunc tei rui, 64kamik duamlouna bai the, kumna kata sinnuina, “Nang ta baimei hei thow cho dinc pat ro,” twna sa the. 65Kumna baih baihmei kata sw zakpui lat mpeyna sa the.
Jisu ta Pei khou Zay Guangmei
(Met 26.59-66; Mrk 14.55-64; Jhn 18.19-24)
66Tinggaanc pat pwkhou, charuangc gaanthaic nunc, amuh daihmei nunc khatni Riakdanv dinhpouc nunc kaniw pei khou guang kaduaina, Jisu ta mi khou tei zay guang the. 67Khoutei, “Nang Khrista kiu cho? Aniw khou sa o,” twna katy the.
“Ai sa tina nangniw ata lwm ni tu hamh e. 68Ai rui thanv tina nangniw daw ni tu hamh e. 69Tiki ntaw khou rui thauna, Meic Nac Mpouh hei Ngamparimeipu Ravguangc baanzat thangc dungc puni the,” twna Jisu rui daw the.
70“Kum e thei, nang Ravguangc Nac Mpouh cho?” twna kaniw rui sa the.
Khoutei, “Nangniw rui samei tei kumcna, ai kiuc the,” twna Jisu rui mundaw the.
71Khoutei kaniw rui sa the, “Tabui tuang sakhi aniw kage nai dat hena cho? Kamwang kahak khou rui aniu chu the.”
നിലവിൽ തിരഞ്ഞെടുത്തിരിക്കുന്നു:
LUK 22: RONGBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
