LUK 20
20
Jisu tuang Ngamv lam khou Thanvmei
(Met 21.23-27; Mrk 11.27-33)
1Zaeng neih khat Jisu Ravkai khou meic nunc khou nchamlouna khatni gaychamv dincna bam khou, amuh daihmei nunc, Riakdanv dinhpouc nunc, gaanvthaih nunc kazauhna guangna, 2Jisu khou sa the, “Tabui tuang ngamv khou rui nang mi guay hei sw bam tu cho khatni thow rui nang khang mi ngamv hei tii pwna cho? Aniw khou sa o.”
3Mundawna Jisu rui kaniw khou sa the, “Ai ni nangniw khou lat akhat thanv puni. Mi hei akhou salou o: 4Jahon rui duilupmei tei thow rui ngamv tiilou tina cho?”
5Kaniw mi kumna kaphianh the, “‘Ravguangc rui de,’ tw ti thei, ‘Tabui swna nangniw kakhou lwm mak tu cho?’ twna kamei rui sa puni. 6‘Maansei rui de,’ twna sa ti thei ni meic guay rui aniu ta ntauh kwam puni. Kalam thu Jahon hei muhzwng khat re twmei kaniw lwm the.”
7Kumna, “Aniw thay mak ge,” twna kaniw rui daw the.
8Khoutei, “Tabui ngamv khou rui mi guay hei ai taanc bam tu cho twmei ai ni nangniw khou salou lak ge,” twna sa the.
Drakha Lau Nngemei Latgiam
(Met 21.33-46; Mrk 12.1-12)
9Jisu rui meic nunc khou mi latgiam hei salou khwan e: Meic gaanv khat pu rui drakha lau akhat kasiamhlou lana lautaanhmei nunc khang nngelou duc the, kumna tingsaengc sihna kandih akhat thangc tat kan the.#Isa 5.1 10Kathai laapui ganv tangc pwkhou, kathai laa khang kabangc gaanv khat ta lau nngemei nunc khou tei ndiu guang the. Tiki kaniw rui mi pu ta tei baina kabaanc raeng ndiu hanc dat kan the. 11Kamei rui kabangc gaanv khat ta ni ndiu guang dat he. Kaniw rui mi pu ta tei ni baina sw zaklou the, kumna kabaanc raeng ndiu ganc dat kan the. 12Luan thumhmei swna ndiulou dat he. Kata tei kaniw rui kazam kazei bai patlouna lau paengc thangc ganc patlou the.
13“Khoutei laupouc tei rui sa the, ‘Ai tabui sw kho cho? Ai rui nzianmei anac mpouh ti hei ndiulou ni the; kata thu chakhwang swlou pungh di the.’
14“Tiki lau taanhmei nunc tei mi pu ta tei how lana, kaniw kaphianhna sa the: ‘Mi pu hei kapu tampy luak nimeipu the. Kata swluaina katuang hei aniu khang laa di kho! 15Kumna kaniw rui kata lau paengc thangc ganc patna swluai the.
“Khoutei laupouc tei rui kaniw ta tabui sw puni tha? 16Laupouc tei guangna lau nngemei nunc ta tei swluai puni, kumna lau tei meic baihmei khang tii puni.”
Meic nunc tei hei tei chu pwkhou, “Mi kumhmei hei pat mak kan diu!” twna sa the.
17Khoutei Jisu rui kaniw ta zaucna sa the, “‘Kai swmei nunc rui ganc patloumei tauc tei kaikwnpy tauc sw the,’ twna hylou bammei hei tabui tuang kabac cho?#Kal 118.22 18Mi tauc ruc khou taek keyloumei guay tei puat paruat puni, tiki mi tauc hei rui key simmei guay tei thu piak tuai puni.”
19Riakdanv dinhpouc nunc khatni amuh daihmei nunc tei mi dyng khou tei kata nym khang karamc the. Kalam thu mi latgiam tei kaniw ta sa bam tu di the twmei kaniw thay the. Tiki kaniw meic nunc ta ping khwan e.
Kaisar khang Dihkhav Tiimei lam khou
(Met 22.15-22; Mrk 12.13-17)
20Kumna kaniw khang kadouchamei zaucna, kalat khou rui kata nym lana, guanghkhyn baanc khou tii ku khang, kaniw rui meic gaypui khe swpui mei gaanvsaekc ta nkamhna ndiulou the. 21Mi nunc tei rui Jisu khou mi kumcna thanv the, “Dinhpouc, nang thu kaling sa e khatni dinc e, khatni zawkhu zawru zauh makna Ravguangc ningmei tei kaling dinc e twmei aniw thay e. 22Aniw Kaisar khang dihkhav tiimei hei kariak thei layna nchumh ni nchumh mak cho salou o.”
23Kaniw rouc tei thay lana, Jisu rui kaniw khou, “Denari#Mi hei syan zanc e tei akhou lyan o. 24Mi khou tei thow maengc nai bu cho khatni tabui tuang hylou bu cho?” twna sa the.
Khoutei, “Kaisar tuang,” twna kaniw rui sa the.
25Khoutei, “Hei zaeng rui, Kaisar tuang tei Kaisar khang tii tio; Ravguangc tuang tei Ravguangc khang tii tio.”
26Jisu rui mi kumcna charuangc khou samei khou tei kaniw kata nym ngam mak khe. Katuang latdaw khou tei kaniw khang swang dwang maekna lat sa dat mak khe.
Ringcthau Datmei lam khou Thanvmei
(Met 22.23-33; Mrk 12.18-27)
27Ringcthau datmei maek ge twna samei Saddukimei pang khou rui gaanvsaekc, Jisu daeng khou guangna thanv the,#Lat 23.8 28“Dinhpouc, ‘Thowkumhmei rui now kaw lana, kanac puanh makna theic kan e thei, kakainac rui kanow ta tei kakhauh datna, kachaic kikta tinailou nina e,’ twna Mousi rui aniw khang hylou e.#Ria 25.5 29Kaganv khat khou chana gaanv chanei nai khwan e. Gaanvdaihmeipu tei kanow kawlouna kanac maekna theic kan the. 30Kumna kaneimeipu khatni 31kathumhmeipu tei rui kata kakhauh the. Hei tei kumcna chaneimeipu tei ni kata kakhauh lana kanac maekna theic muay kan the. 32Nkhamh khou mi pui tei ni theic kan the. 33Ntaw thu, ringcthau dat pwkhou kamei thow now sw puni cho; kaniw gaanv chanei rui kata kaw the?”
34Jisu rui kaniw khou sa the, “Mi mbaanv khou mei nunc rui nowkaw e, mic e. 35Tiki guang nimei kandic thangc gut biuhmei nunc tei thu kaniw ringcthau datpui nungc kiu kaniw nowkawmei khatni mihmei nai dat lak khe. 36Kaniw theic dat mak khe. Kalam thu kaniw tingkauh baanchara nunc kumc kan ni the. Kaniw Ravguangc nac nunc di the. Kaniw ringcthau datmei nunc di the. 37Theihmei ringcthau datmei lam khou Mousi rui ni lyanlou e. Thing phwam tuang pary khou tei kamei rui Poubauhmei ta, ‘Abraham Racguangc, Isak Racguangc khatni Jakob Racguangc’ twna sa e.#Tat 3.6 38Kamei thu theihmei nunc Racguangc hamh e, ringhmei nunc tuang de. Kalam thu meic kaguayna kakhou ringc bam e.”
39Riakdanv dinhpouc gaanvsaekc rui, “Dinhpouc, nang samei tei nchumh the!” twna sa the. 40Khoutei meic gaanv khat na sini lat thanv dat bauh mak khe.
Khrista hei Thow Nac Cho?
(Met 22.41-46; Mrk 12.35-37)
41Khoutei Jisu rui kaniw khou sa the, “Khrista hei David nac mpouh e twna kaniw akumhna sa tu cho? 42David rui Kalumlu khou salou e:
‘Poubauhmei rui aPoucbauhmei khou sa e:#Kal 110.1
43Nang ta zauczihmei guay ta
nang phaypav bangc khou tinii bin mak saanv,
nang abaanzat thangc dungc bam o.’
44“David rui kata ‘Poubauhmei’ twna kaw e. Kum e thei, akumhna kamei David nac nina cho?”
Riakdanv Dinhpouc nunc khou rui Suriak Thay o
(Met 23.1-36; Mrk 12.38-40)
45Meic guayna nking bam khou, Jisu rui kaziap nunc khou sa the, 46“Pheychuanh saenghmei piuna ruan tat bam niimei, kaithyan bamv bamv khou kalumlou pw tu kahawmei, sinagog khou bamvdaih dungc niimei, khatni khumngai bamv khou chakhwang bamv dungc niimei, 47maypui nunc tuang asut tumei, kum lana karavsuai saengcna kalum lyan bammei Riakdanv dinhpouc nunc khou tei rui suriak thay lo. Kaniw khou keylou nimei latzan tei nrit diangc puni.”
നിലവിൽ തിരഞ്ഞെടുത്തിരിക്കുന്നു:
LUK 20: RONGBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
