LUK 14
14
Jisu Pharisimeipu Kai khou
1Sabbathneic akhat, Jisu Pharisimei kapypu gaanv khat kai thangc nap tu khang tat khwan e. Khoutei kaniw rui kata zauc minc bam khwan e. 2Mi khou tei puamhmei ravpuat phunghmeipu gaanv khat bam khwan e. 3Khoutei Jisu rui, “Sabbathneic tigayloumei hei nuh ni nuh mak cho?” twna Pharisimei nunc khatni Riakdanv dinhpouc nunc khou tei thanv the. 4Kaniw daw mak khe. Kum tina Jisu rui mi pu ta tei laa guangna tigaylouna titat kan the.
5Khoutei, “Nangniw nac hamh e thei, guaih Sabbathneic khunh khou keylou bam e thei, hei tei nangniw kadyng khou zay thau dat pw lak nah cho?” twna Jisu rui kaniw khou sa the.#Met 12.11 6Mi khou tei kaniw lat sa daw khang maek khe.
Niamhna Lungc o
7Kawlou tina guangmei nunc tei chakhwang bamv khou dungc nii akhyam bammei ta how lana, Jisu rui kaniw khou mi latgiam hei raclou the: 8“Nangniw ta nowsuanh ngai khou kawpui ganv khou chakhwang bamv khou tei guang dungh riu. Nang khang suangc daihmei mei ta kawlou bam kho ni nuh e.#Lkd 25.6-7 9Kum bam khwan e thei, kaipouc tei rui nang khou guangna, ‘Nang bamv hei mi pu khang hei reilou ti tho,’ twna sa pwkhou, nang zakna kathei liang thangc dungc tat puni. 10Tiki nangniw ta kaw pwkhou, thei liang thangc tei guang dungc o. Kum pwkhou kaipouc tei guangna, ‘Champanv, guang tuanc maihna dungc do,’ twna sa puni. Kum pwkhou, nang meic guayna hu khou zaw kauh puni. 11Karana kata tidaihpui mei ta tei, ti ana keylou puni; karana niamh keypui mei ta tei tidaiclou puni.”#Met 23.12; Luk 18.14
12Jisu rui kaibangpouc khou tei ni sa the, “Nang rui laukhwan naptw khang pw ni, tingzyn naptw khang pw ni kaigaanvmei khang kihpui ganv khou, nang pammei nunc, nang chana nunc, nang riang nang luaic nunc, hamh e thei lungcgaymei nunc ta kaw riu. Kum e thei kaniw ni nang ta ni kaw datna khangclou dat kan ni de. 13Tiki nang rui khwm kic pwkhou, lungcsimei, suan baengmei ta kaw o. 14Kum e thei nang ta suaihiamlou puni. Kaniw rui nang khang khangclou dat ngam mak sini, ravchaptatmei nunc ringcthau dat pwkhou, nang khang khangclou dat puni.”
Khwmkih Ngai Dai Latgiam
(Met 22.1-10)
15Hei tei chu lana, kamei lev dungc nchamc bammei pang khou gaanv khat rui, “Ravguangc guangcdic tuang napkaw khou kazauh nipui mei kiu mu sangaymei e,” twna sa the.
16Jisu rui kakhou sa the, “Meic gaanv khat rui khwmkih ngai dai raengclou the, kumna meic mpeyna ta kawlou the. 17Kumna kaganv tangc pwkhou, ‘Guang tho, ramh guayna chamdaanv luai the,’ twna kabangc ta ndiulou the. 18Tiki kaniw meic guayna daw ley the. Reymeipu tei rui, ‘Ai laupuk akhat liulou rap kanna, hei tei zauc tat mak nuh makna the. Ata kuaklou di tho,’ twna sa the.
19“Baihmei gaanv khat tei rui, ‘Ai guaichic chidav panguh liulou rap kanna, mi ta tei sin zauh khang tat ni he. Ata mu kuaklou tho,’ twna sa the.
20“Baihmei gaanv khat tei rui ni, ‘Ai nowkaw guanglou rapna bam di he, kumna ai guang ngam mak khe,’ twna sa the.
21“Kabangcpu tei guang datna, mi hei kakaipouc khou tei salou the. Khoutei kakaipouc tei kalung puamc the, kumna, ‘Nang katumcna kaidai tuang chaengdai khatni kaisap kailap khou tatna, lungcsimei, suan baengmei, mik tiatmei, khatni phaybaumei guay ta kabai guang tho,’ twna kabangcpu khou tei sa the.
22“Khoutei, kaipoucle, nang rui samei thei layna kaw guang the; tiki kabamv thu nai di he,” twna sa the.
23“Khoutei, ‘Chaengluangdai khatni kaidai tin tou thangc tei tatna kai padik khang kaw guang tho,’ twna kaipouc tei rui kabangc khou tei sa the. 24Ai rui nangniw khou sa tuang e: Kabailoumei nunc tei gaanv khat na sini atuang khwmkih taektw tw tow ni tu hamh e!”
Jisu Thei Laymei Thukh
(Met 10.37-38)
25Meic kangdai Jisu thei lay tat khwan e. Khoutei Jisu kaniw biak thangc karih patna sa the: 26“Thow pw ni aziap sw ni twna guang lana, kapui kapu ta, kanow kanac nunc ta, kachaic kakainac nunc ta, khatni karingcpaan kahak ta karaeng mak ge thei, kamei aziap sw ngam mak ge.#Met 10.37 27Thow pw ni katuang kros puancna athei lay mak ge thei, kamei aziap sw ngam mak ge.#Met 10.38; 16.24; Mrk 8.34; Luk 9.23
28“Thow pw ni kai gaymei sw ni tw e thei, kamei dungc keyna, mi kai tei sw luai khang ngam puni dai cho twna kamei kachakh chak rey pw lak nah cho? 29Kamei rui kaibam na kahouhlou lana luai ngam ti mak ge thei, hei tei howmei guay rui sinnuina, 30‘Mi pu hei kahouh thu kahouhlou dyng the, tiki luai ngam mak khe,’ twna sa puni.
31“Hamh e thei guangh akhat rui guangh akhat ta rih adow ni khou, kata adow khang guangmei meic ching nchuih ta karicmei ching ruh rui adow ngam puni dai cho twna kamei dungc keyna kaphianh rey pw lak nah cho? 32Kamei ngam lak ge thei, kaniw guang tangh mak khou, meic ndiulouna guat sw khang sw puni. 33Hei tei kumcna, thow pw ni ramh guayna ganclou ngam makpui mei tei aziap sw ngam mak ge.
Gaeng Makmei Tey
(Met 5.13; Mrk 9.50)
34“Ntey hei gay e, tiki hei tei bumc taan e thei, akumhna mi ti hei tibumc dat nina cho? 35Kandih khang ni, chaba khang ni hei tei gaeng dat mak khe. Hei tei ganc the.
“Chu khang nukuanc naimei guay rui chu la tho!”
നിലവിൽ തിരഞ്ഞെടുത്തിരിക്കുന്നു:
LUK 14: RONGBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
