LUK 11
11
Huayneymei lam khou Dincloumei
(Met 6.9-13; 7.7-11)
1Zaeng neih khat, Jisu kabamv akhat khou huayney bam khwan e. Kumna kamei huayney tang pwkhou, kaziap gaanv khat rui, “Poubauhmei, Jahon rui kaziap nunc khang nchamloumei kumcna, aniw khang ni huayney nchamlou o,” twna Jisu khou sa the.
2Khoutei Jisu rui kaniw khou sa the, “Nangniw huayney khou mi hei kumcna ney o:
‘APu, nthanmei nang zanc ta chakhwang champouh sw diu.
Nang guangcdic guang diu.
3Neih khat khang biuhmei taektw,#hamh e thei aniw khang kage naimei taektw; hamh e thei nthuanh khang taektw.
aniw khang tingmik kathuic tiilou o.
4Aniw khou nkhuailoumei guay ta,
aniw kuakloumei kumcna,
aniw khuay guay kuaklou o.
Aniw ta nthiammei baanc khou tipatlou rio’ ”
Ney o, Tiilou Puni
5Khoutei Jisu rui kaniw khou sa the, “Nangniw pammei daeng thangc nangniw zipchwng tatna, ‘Champanv, ntyan dwm kathumh na tiilou o, 6achampanv nggin guangna kakhang titu khang maekna the,’ twna sa pwkhou, 7‘Ata sw katuakclou ri tho, kaikhamv mbangh tangna angana nunc ta zip nduangh bam di the. Ai thauna tii dat ngam mak khe,’ twna kainung thangc rui daw nuh e. 8Ai rui nangniw khou sa tuang e: mi pu tei rui kachampanv e twna thauna ntyan tei tii mak sini, kamei rui katun tancna ney bam timei zaeng rui thauna kakhang kage naimei guay tei tii puni.
9“Hei zaeng rui, ai rui nangniw khou sa tuang e: Ney o, nangniw khang tiilou puni; phu o, phu tow puni; kaikhamv nchow o, nangniw khang laanclou puni. 10Kalam thu neypui mei tei rui laatow e, phupui mei tei rui phu tow e; khatni kaikhamv nchowpui mei khang tei laanclou e.
11“Pu nunc, nangniw khou nangniw nac rui khav ney pwkhou, khav phaan nrui tii puni dina cho? 12Hamh e thei, ruayduih ney pwkhou ravga tii puni dina cho? 13Kumna, meicsimei nangniw sini nangniw nac nunc khang gaymei puat tii thay e thei, tingkauh thangc bammei nangniw pw rui thu tabui swna kakhou neymei kathuic khang Bumaengh Nthanmei tiilou mak nina cho?”
Jisu khou Ravsic Bilzebul Gut the twna Samei
(Met 12.22-30; Mrk 3.20-27)
14Jisu rui lat sa thay makmei ravsic ta nthau ganclou khwan e. Kumna ravsic tei tat pat kan pwkhou, lat sa thay makmeipu tei sa thay dat the. Khoutei meic kangdai tei ngak the. 15Tiki kaniw pang khou gaanvsaekc rui thu, “Ravsic guay tuang kapy Bilzebul#Mi hei ravsic zanc e paan rui kamei rui ravsic nunc ta tei nthau ganc bam tuang de,” twna sa the.#Met 9.34; 10.25 16Khoutei sw-nchinmei tuang tingkauh thangc rui tii key o, twna gaanvsaekc rui kata nchanvna sa the.#Met 12.38; 16.1; Mrk 8.11 17Khoutei Jisu kaniw lungning tei thay lana kaniw khou sa the, “Kalangv patna khat khat ta sw kasic khang swmei guangcdic tei mut puni, khatni kalangv patna khat khat ta sw kasic khang swmei kaikhunc tei bow puni. 18Hei tei kumcna Seitaan rui karana kata sw kasic khang sw e thei, akumhna kaguangcdic ding ngam nina cho? Ai Bilzebul paan rui ravsic nunc ta nthau ganh tuang de twna nangniw rui sapui zaeng rui, mi hei sa tuang e. 19Ai ravsic nunc ta Bilzebul paan rui nthau ganh tuang e thei, nangniw nac nunc thu thow paan rui kaniw ravsic nunc ta nthau ganh tu cho? Kaniw rui nangniw ta latzan sw puni. 20Tiki ai rui ravsic nunc ta nthau ganhmei hei Ravguangc pumtan paan rui e. Mi hei Ravguangc guangcdic nangniw khou guang tangc tina the.
21“Kapumc tanhmeipu rui rihpwan rihna piu nthuihna kakai tei gaek bam pwkhou, katuang lanv guay tei giuga dat mak khe. 22Tiki kakhang suangc tanhmeipu guangna kata ngam pwkhou, kamei kapumtan sw bammei katuang ricpwan ricna guay tei asut kan puni khatni kamei rui asut guangloumei guay tei ni laa kan puni.
23“Athei lay makmei nunc tei ata zauczihmei nunc e, khatni ai gaengc guang bammei khou hei nkhavlou makmei nunc tei hac ganhmei nunc e.#Mrk 9.40
Simei Bumaengc Gut Datmei
(Met 12.43-45)
24“Simei bumaengc meic gaanv khat khou rui tat pat lana, zaeng swloupui bamv khang ramvkaengv khou phu tat the; tiki phu tow mak khe. Khoutei, ‘Ai ganclou kanmei akai thangc tei hanc guang dat ni the,’ twna kamei ning the. 25Kumna kamei guang dat pwkhou, kai tei gey nthan thiakh thiakna tanvna lou chuy rih rilou bammei ta how the. 26Kumna kamei tat lana kakhang suangc simei bumaengc chanei ta kaw lana mi khou tei lungc the. Khoutei mi pu tuang nkhamhmei lwnlung tei reymei khang suangc si diangc the.”
Sangay Dianghpui Mei
27Jisu mi hei sa bam khou, “Nang ta puancloumei pui tei khatni nang ta puanc noucloumei pui tei sangaymei pui e,” twna meic pang khou rui ntumei gaanv khat rui kauc the.
28Tiki Jisu rui mundawna, “Sangay dianghpui mei kiu thu, Ravguangc lat hei chuna piupui mei tei de,” twna sa the.
Jona khou Sw-nchinlou Kanmei Kumhmei tei
(Met 12.38-42)
29Meic kangdai geic guang tipui ganv khou, Jisu rui sa the, “Ntaw kin khou lungc bammei nunc hei meicsimei nunc e. Sw-nchinmei taanclou khang kaniw rui sa e, tiki Jona khou swlou kanmei tei hamhna, baihmei swlou ni tu hamh e.#Met 16.4; Mrk 8.12 30Kalam thu Jona tei Ninevemei khang sw-nchinmei tuang sw kanmei kumcna, Meic Nac Mpouh hei ni mi meikin khang hei sw-nchinmei tuang sw puni.#Jon 3.4 31Mi meikin ti hei latzan swpui ganv khou Dihba thangcmei Liammavpui thauna, mi meikin hei nkhuai e twna sa puni. Kalam thu ningtyngmei Solomon lat nking khang kamei kandih tin thangc rui guang khwan e; kumna ntaw mi khou bammeipu hei Solomon suangc daihmei e.#1 Ki 10.1-10; 2 Ki 9.1-12 32Mi meikin ti hei latzan swpui nungc kiu, Ninevemei nunc thauna mi meikin hei nkhuai e twna sa puni. Kalam thu Jona rui latdinc pwkhou kaniw lungh laic kan the, kumna ntaw mi khou bammeipu hei Jona khang suangc daihmei e.#Jon 3.5
Meic Pumc khang Maibungc
(Met 5.15; 6.22-23)
33“Meic gaanv khat na sini thauhmai daanc lana nkamhlou mak ge, hamh e thei nggiuh rui gumbinlou mak ge.#Baanhhy baibal asaekc khou nggiuh rui gumlou mak ge twmei hei hylou mak ge. Tiki gutmei guay gaanhmei tei how khang kahyang khou dungclou e.#Met 5.15; Mrk 4.21; Luk 8.16 34Mik hei meic pumc tuang maibungc e. Nang mik gay ti thei nang pumc kapwm gaanc kah ka e, tiki nang mik si ti thei nang pumc zingh zing e. 35Hei zaeng rui nang lung khou naimei gaanhmei tei zingh mak khang sw o. 36Hei zaeng rui, nang pumc khou zinghmei bamv maekna kapwmna gaanc kah ka e thei, thauhmai riw rui nang ta tigaancloumei kumcna, nang pumc kapwm gaanc puni.”
Jisu rui Pharisimei khatni Riakdanv Dinhpouc nunc ta Luhmei
(Met 23.1-36; Mrk 12.38-40)
37Jisu lat sa tang pwkhou, Pharisimeipu gaanv khat rui kata nap tu nchamclou khang kaw the. Kumna kamei guangna dungckey khwan the. 38Nap tu ni khou Jisu kabaanc khiu makmei ta Pharisimeipu tei howna ngak the.
39Khoutei Poubauhmei Jisu rui kakhou sa the, “Pharisimei nangniw nkuakc khatni buangh guay thu kapaengc thaamc nthan chuy the, tiki nangniw lungc khou thu agaamvmei khatni simei rui padik ge. 40Mpangmei nunc! Kapaengc kasiamhloumeipu tei rui kalungc ni kasiamhlou tu hamh nah cho? 41Nangniw tuang nkuakc khatni buangh lungc khou naimei guay tei tu zangv khang maekmei nunc khang tii tio. Kum e thei ramh guayna nangniw khang nthan puni.
42“Pharisimei nunc, nangniw sansi e dav! Kalam thu kadam ruh tuang thu riangtu, maruai, gannuy paannu tuang nganvna tii lana nchumhna taanhmei khatni Ravguangc ta nzianmei khou thu ntaamv the. Nangniw kadam ruh tuang tiimei tei ni, nchumhna taanhmei lev Ravguangc ta nzianmei tei ni nchamcna ngaek ni tuang e.#Lev 27.30
43“Pharisimei nunc, nangniw sansi e dav! Kalam thu nangniw Sinagog khou bamvdaih dungc nii e khatni charuangc khou meic nunc rui kalumloumei ta laa nii e. 44Nangniw hei sansi e dav! Kalam thu nangniw hei, tarou e twmei thay lamc makna karuc khou meic nunc kaluih tat bammei tarou nunc tei kumc e.”
45Khoutei, “Dinhpouc, nang mi kumcna sa bammei hei rui aniw zaw ni sw kasic the,” twna Riakdanv dinhpouc gaanv khat rui sa the.
46Khoutei Jisu rui kakhou sa the, “Riakdanv dinhpouc nunc nangniw ni sansi e dav! Kalam thu nangniw rui meic nunc ta kaniw phungc tat lakmei puatphung tiphungclouna, hei tei nangniw baanc zung akhat na rui sini kahilou mak ge.
47“Nangniw sansi e dav! Kalam thu nangniw pupouc nunc rui swluai kanmei muhzwng nunc tuang tarou guay tei nangniw kasiamh e. 48Hei zaeng rui, nangniw hei, nangniw pupouc nunc rui taanc kanmei tei thaymei nunc khatni kaniw taanv ta kazuanloumei nunc e. Muhzwng nunc ta kaniw swluai the, nangniw rui kaniw tuang tarou kasiamh the. 49Hei zaeng rui, ‘Ai rui kaniw khou muhzwng nunc khatni latdiutatmei nunc ndiulou puni, kumna kaniw rui kaniw gaanvsaekc ta swluai puni khatni gaanvsaekc ta rai puni,’ twna Ravguangc Ningting rui sa the. 50Mi hei mbaanv damclou khou rui keylou kanmei muhzwng guay tuang zei manv tei mi meikin khou keylou khang e— 51Abel khou rui thauna, ravchabamv lev Nthanmei bamv kak khou swluai kanmei Zekaria nganv tuang zei manv tei keylou khang e. Ngguay, ai rui nangniw khou sa tuang e: Mi guay tuang hei mi meikin ruc khou keylou puni the.#Tha 4.8; 2 Ki 24.20-21
52“Riakdanv dinhpouc nunc, nangniw sansi e dav! Kalam thu thay nimei tuang khamvtaan tei nangniw laa kan the. Nangniw ni gut mak ge, gut nimei nunc ta ni nangniw rui sw khamv e.”
53-54Jisu mi khou tei rui tat pat dat pwkhou, Riakdanv dinhpouc nunc khatni Pharisimei nunc kaniw reic thau the, kumna kalat khou rui kata nym khang nrikna kakhou lat mpeyna thanv the.
നിലവിൽ തിരഞ്ഞെടുത്തിരിക്കുന്നു:
LUK 11: RONGBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
