BINZEN 9
9
Sunggigü le Noah zen Kejozenkelo
1Sunggigü le jochü pe Noah lo a-nyenyu dan tsüo, a-nyugun ka, “Yhunchvülo, tson-o hagun tsipwen no kazü aphu nyu yhun lolo. 2Nyukhu, tegü lo tsehü aphu no hagun nshvuo yhunti. A-nyugun aphu khipe nkekvu hensin shü laso. 3Tsüdan-e lo tehen kenjvü-e nle tyü logwa: No nchvü thyü lotse ale tsüdan aphu pe ntsü laso. 4Thakon me tsüle thyü a-zi le kebin pe a-thyü kesin-o tyünya; keyhun ronzin güle a-zi ka kebin genyu ale nno tsü tyü nya lotse shü. 5Ligü higü temi keyhun ronzin lo laya tselo, shaja pe a-tsüti. Nyukhu ligü higü-e temi keyhun ronzin lokela gü ale kesi shaja pe tsüti. 6Temi ligü higü temi dushvu yatselo, temi no a-dushvu lati, Sunggigü le a-npfü a-hontse kethyü temi thyü keshü genyu.
7“Nle yhunchvülo mvu loshvu, tson-o ntsipwen no kazü aphu nyu yhun lolo.”
8Sunggigü le Noah lo a-nyudan ka zo, 9“Hire, ale hagun lo hagun tsipwen zen-o ntsoka kejozen bin nyo, 10lo yhun kehü aphu tegü, lo nyukhu aphu, nzen-o run günyu chwiryü kelo lihi-e. 11Ale jo hidan pe hagun zen kejozen bin nle: Zü Kemihen no yhunkehü dan aphu nke nila loha; zükemihen no thame ka-e kazü gü nke nila loho. 12Ale hagun lo yhun kehü aphu zen kethonthen kejozenlo kela higü zansü, 13Ale a levü pe nmhuge shüshü bin nle. Tsü pe ale kazü gü zen-o kejozenkelo zansü gü thyüti. 14Ale nmhu pe kazü gü henshü lo zengo le chwikeryü ka, 15Ale hagun lo nyukhu dan aphu ka zükemihen no yhun kehü dan aphu nke nila loha tse zokeshü ajo rüchün loti. 16Zengo le nmhuge chwi keryü ka, ale tsü shwishüo ale lo kazü so yhun kehü aphu jaka kethonthen kejozen kenjü gü rüchün loti. 17Tson-o Sunggigü le Noah ka, higü hile ale lo kazü so yhun kehü aphu jaka kejozen kela zansü güle,” tsonshü.
Noah lo A-nyudan
18Noah nyenyu run gü nyu chwikeryü dan le Shem, Ham, lo Jafet. (Ham le Kanan a-pvü gü.) 19Noah nyenyu mishen dan hile kazü so ge kebin temi aphu bon dan.
20Noah le loketsü nyu nme, lo a-le vainsha lotsü keritsin gü. 21A-le vainsha zu tsülo njio nzünla, tson-o a-phinya ben nya mvutse a-phi ka nyu hü. 22Tsüka Kanan apvü Ham le a-pvü le kenben kehü hyushüo chwigü a-tsa hvuka zoshü. 23Tsontsin Shem lo Jafet au le phi nme pe au buthun ge shülo-o, sizin tesen yügü au pvü le kenben kehü tsü henshü; au le rani kebin genyu au pvü le kenben kehü tsü hyumvu. 24Noah le ntsen soryü kelo siki a-nyu nchegü le a-ge dihontse thyü shü yo shalo, 25tson-o a-le zo,
“Kanan no keswekesü pfü lalo!
A-no a-tsa hvu go thyüti.
26Npugü a Sunggigü no jochü pe Shem tsülo!
lo Kanan no a-go thyülo.
27Sunggigü no Jafet thyü pe chonkenye shülo!
A-tsipwen no Shem temi dan zen-o yhunlo!
Lo Kanan no a-go thyülo.”
28Zükemihen siki Noah le chen 350 yhun lo 29tson-o chen 950 ka sila.
നിലവിൽ തിരഞ്ഞെടുത്തിരിക്കുന്നു:
BINZEN 9: REGSBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
