JOHAN 5
5
Bethes ’da A Hihdamna
1Huai thil nung in Judate Ankuangluina a om a; Jerusalem khua ah Jesu a hohtou hi. 2Jerusalem ah belam kongkhak kiang ah dil a om a, huai mun Hebru pau in Bethes’da a chi ua, inlim nga a nei hi. 3Huai ah tui hongtat ngak in damloute, mittawte, khebaite, zawte tampi a lum uhi. 4Bang hun hiam in huai dil ah angel a hohsuk a, tui a vatok a; kuapeuh huai tui a kitoh khit a valut masa penpen in, bangchibang natna nei hileh leng hihdam in a om zel hi. 5Huai ah kum sawmthum leh giat damlou mi kuahiam a om hi. 6Jesu’n a lum a mu a, huchibang in sawtpi a omta chih a thei a, a kiang ah, “Hihdam na ut hia?” a chi hi.
7Damloupa’n, “Pu, tui kitoh in dil a honkoih ding mi ka neikei hi, ka hohsung in midang in hon makhelh nak uh” chi in a dawng hi.
8Jesu’n a kiang ah, “Thou inla, na awngphah la inla, khe in paita in” a chi hi. 9Thakhat in huai mipa a dampah a, a awngphah la in, a paita hi. 10Huai ni khawlni ahi, huchi in Judate’n a dampa kiang ah, “Khawlni eive, na awngphah na lak a siangkei” a chi uhi.
11Aman a kiang uah, “Hon hihdampa ngeingei in ka kiang ah, na awngphah la inla, khe in paita in” honchi ahi, a chi a, a dawng hi.
12Amau a kiang ah, “Na awngphah la inla, khe in paita in, na kiang a chipa kua ahia?” a chi ua, a dong uhi.
13Himahleh a dampa’n kua ahia a hih a theikei hi, huai a mipi a om ziak un Jesu a paimangta hi.
14A denchiang in Jesu’n amah Pathian biakin ah a mu a, a kiang ah, “Ngai in, na damta hi, khialnawn ken, huchilou in zaw thil hoihlou sem na tung ah a hongtung kha ding hi” a chi hi.
15Huan huai mi a va paikhia a, Judate kiang ah “A hihdampa Jesu ahi” chih a hilh hi.
Khrist, Tapa Tungtawn a Hinna
16Huchi in khawlni a a thilhih ziak in Judate’n Jesu a engbawl uhi. 17Himahleh Jesu’n amau a houpih a, a kiang uah, “Ka Pa’n tutan pha’n nna a semzel a, ken leng ka semzel” a chi hi.
18Huchi in Judate’n hihlup a tum semsem ua, khawlni a tanlouh ziak kia ahi kei a, Pathian amah Pa a a bawl leh Pathian toh kikim a a kibawl ziak in leng ahi. 19Jesu’n a kiang uah, “Chihtaktak in, chihtaktak in, k’on hilh ahi, Tapa in amah in bangmah a hih theikei, Pa thilhih a muh kia loungal; thil a hih peuhmah, Tapa in leng a hih samzel hi. 20Pa in Tapa a it a, a thilhih peuhmah a kiang ah a musak a; hiaite sang a thilhih thupizaw a kiang ah a musak lai ding, lamdang na sak ding un. 21Pa in misite a kaithou a, hinna a piak bang in, Tapa in leng a utna na kiang ah hinna a pia hi. 22Pa in kuamah vai a hawmsak ngeikei, vai tengteng Tapa in a hawm sak zawta hi; 23Mi tengteng in Pa zahna a piak bang un, Tapa leng zahna a piakna ding un. Kuapeuh Tapa zahloute’n, Pa a sawlpa leng a zahkei uhi.
24“Chihtaktak in, chihtaktak in, k’on hilh ahi, Kuapeuh ka thu za a, hon sawlpa gingta in, tangtawn hinna a nei; siamlouh in a omkei a, sihna a kipan a pawt a, hinna ah a lut zawta hi. 25Chihtaktak in chihtaktak in k’on hilh ahi, A hun a tung dekta, tuin leng a tung lellelta, huai hun chiang in misite’n Pathian Tapa aw a za ding ua, a za peuhmah a hing ding uh. 26Pa in amah a hinna a neih bang in, Tapa in leng amah a hinna nei ding in a peta hi. 27Mihing Tapa a hih ziak in, a kiang ah thukhenna leh thuneihna a pia hi. 28Hiai lamdangsa kei un, a hun a tungta, huai hun chiang in han a om tengteng in a aw a za ding ua, 29A hong pawtvek ding uhi; thil hoih hihte hinna tang in a thounawn ding ua, thil gilou hihte siamlouh tang in a thounawn ding uhi.
Johan Theihpihna
30“Keimah in bangmah ka hih theikei; bil a ka zak bangbang in vai ka hawmzel; ka vaihawm a dik ahi, keimah deihlam in om ka tum kei a, hon sawlpa deihlama om ka tup zel ziak in.
31“Keimah tanchin theisak hileng, ka thu theihsak a dik kei ding hi. 32Ka tanchin theisak midang ahi, aman ka tanchin a theihsak a dik chih ka thei hi. 33Nou Johan kiang ah mi nasawl ua, aman thutak thu hon theisak hi. 34Thu theihsak ka san mihing a kipan ahi kei a; himahleh na hinna ding un hiai thu ka gen ahi. 35Huai Johan khawnvak kuangtak leh vaktak ahi, a vak ah nuamsak tak dih na ut uhi.
Jesu nasep Theihpihna
36“Himahleh theihsakna ka neihzaw Johan theihsakna sang in a thupizaw hi: Pa’n thilhih zohding a a honpiak, ka thilhih ngei in Pa’n honsawl chih ka tanchin a theisak hi.
Pa Theihpihna
37“Pa hon sawlpa’n leng ka tanchin a theisakta hi. Nou chiklai mah in a aw na za ngeikei ua, a mel leng na mu ngeikei uhi. 38A thu leng noumau ah na paikei uh, a sawlpa na gintak louh ziak uh ahi.
Laisiangthou Theihpihna
39“Laisiangthou na simsim ua, asung a tangtawn hinna om a na gintak ziak un: huai Laisiangthou ka tanchin theihpihna ahi. 40Himahleh hinna nei ding in ka kiang ah na hong nuam kei uhi.
41Mihing pahtawina ka sangkei. 42Himahleh nou k’on thei hi, Pathian itna noumau ah na neikei uhi. 43Ka Pa min in ka hong a, noute’n n’on kipahpih kei uh: midang amah min in hong leh amah na kipahpih ding uhi. 44Nou kipahtawi tuahna paktate’n Pathian tak kia a pawt pahtawina zong lou in bangchi’n kei n’on gingta thei ding ua? 45Ken Pa kiang a nou k’on hek ding gingta kei un: nou honhek khat a om na muan uh Mosi ngei ahi. 46Mosi gingta hile uchin aman kei tanchin gelh a, keileng n’on gingta tading uhi. 47Himahleh amah thugelh gingtalou in, bangchi’n ka thute na gingta ding ua?” a chi hi.
നിലവിൽ തിരഞ്ഞെടുത്തിരിക്കുന്നു:
JOHAN 5: PAITBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
