JOHAN 15
15
Jesu, Grepgui Dik
1“Kei grepgui dik ka hi, ka Pa akempa ahi. 2Kei a hiang gah lou peuhmah alamang a; agah peuhmah tamsem agahna ding in ahahsiang hi. 3Na kiang ua ka thugen ziak in tu'n ah na siangthou pah uhi. 4Keimah ah om gige un, kei leng noumau ah ka om gige ding. Hiang, grepgui a a-om gige keileh amah in agah thei kei bang in, nou leng keimah a na om gige kei uleh, na gah thei kei ding uhi.
5“Kei agrepgui ka hi a, nou ahiangte na hi uh. Kuapeuh keimah a om gige a, kei leng amah a ka om gigena, huai mah tampi in agah hi; keimah lou in bangmah na hihthei kei uhi. 6Mi kei a a-om gige keileh hiang bang a paihkhiak in a-om a, avuai hi; huan atawm ua mei ah apai ua, akang hi. 7Nou keimah a na om gige ua, ka thu leng noumau a a-om gigeleh na ut peuh uh ngen un, nou a ding in hih in a-om ding hi. 8Hiai ziak in tampi a na gah chiang un ka Pa pahtawi in a-om hi, huchi in ka nungzuite na hi ding uhi. 9Pa'n kei ahon it mah bang in ka hon it hi; ka itna ah om gige un. 10Nou ka thupiakte na zuih uleh ka itna ah na om gige ding uhi, ke'n ka Pa thupiakte ka zui a, a-itna a ka om gige mah bang in.
11“Ka kipah noumau a a-om gige theihna ding in leh na kipah uh akimna ding in hiai thu na kiang uah ka gen ahi. 12Hiai ka thupiak ahi, ke'n nou ka hon it bang in, noumau leng ki-ittuah un. 13Mihing in alawm a dia ahinna apiak sang a itna thupizaw kuama'n anei kei. 14Thu ka hon piak peuhmah na hih uleh ka lawmte na hi ding uh. 15Sikha ka hon chi nawn kei ding; apu thilhih sikha in atheih louh ziak in; lawmte ka hon chi zawta ding; Pa kiang a ka thil zak tengteng na kiang uah ka hon theisakta hi. 16Nou na hon tel kei ua, ke'n ka hon tel zaw hi, va gah ding leh na gah uh om gige ding in ka hon sep ahi; ka min a Pa kiang a na nget peuhmah uh ahon piakna ding in. 17Hiaite ka hon thupiak ahi, ki-ittuah chiat un.
Khovel Leh Thutak Kha
18“Khovel in nou ahon huatleh ahon huat ma in keimah ahon ho khinta chih thei un. 19Nou khovel a hi le uchin, khovel in amah a a-it ding; khovel a kipan ka hon telkhiak zawk ziak in, khovel in nou ahon hua hi. 20Apu sang in sikha athupizaw kei, chih thu ka hon hilhta hi, hiai theigige un. Amau kei ahon sawi uleh, nou leng ahon sawi ding uh; ka thu zui hita le uh, noumau thu leng azui ding uhi. 21Himahleh hiai thil tengteng ka min ziak in na tung uah ahih ding uh, hon sawlpa atheih louh ziak un. 22Kei hong pai lou in akiang uah thu gen kei leng khelhna nei lou ding hi ua, himahleh tu in akhelhna uah paulap ding aneita kei uhi. 23Kuapeuh kei hon hua in, ka Pa leng ahua ahi. 24Midang kuamah hih ngeilouhte alak ua hih lou hi taleng, khelhna nei lou ding hi ua, himahleh tu in amau kei leh ka Pa, ka nih un ahon muta uh, huat leng hon hota uhi. 25Adan uah, amau aziak om lou in hon hua uh chih, thu kigelh pen, ahong tangtunna ding ua hih uh ei ve.
26“Huan Pa a kipan Khamuanpa na kiang ua ka hon sawl ding, Pa a kipan thutak Kha ahong tun chiang in, keimah hon theihpih ding hi. 27Atung a kipan a kei toh omkhawm na hih ziak un nou leng na theihpih ding uhi.
നിലവിൽ തിരഞ്ഞെടുത്തിരിക്കുന്നു:
JOHAN 15: PAITBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
