GENESIS 4
4
Kain Leh Abel
1Huan, Adam in a zi Evi a luppih a; huchi in a gai a, Kain a nei hi; “Toupa panpih in pasal ka neita,” a chi hi. 2A nau Abel a hon neinawn hi. Abel belamchingmi ahi a, Kain bel leiletmi ahi. 3A nung in hichi a honghi a, Kain in Toupa kiang a lat ding in lou a piang leigahte a hontawi hi. 4Abel in leng a belamhon lak a piang masapen leh a thau pen a hontawi a, Toupa’n Abel leh a thillat a kipahpih hi. 5Himahleh Kain leh a thillat bel a kipahpih kei. Kain a heh mahmah a, a mel a liap hi. 6Toupa’n, Kain kiang ah, “Bangdia heh na hia? Bangdia na mel liap ahia? 7Hih hoih lechin pahtak na loh kei dia hia? Na hih hoih keileh khelhna kongkhak bul ah a kual nilouh a, a deihlam nangmah ahi ding, a tung ah thu na nei ding ahi,” a chi hi.
8Kain in a nau Abel a houpih a, hichi ahi a, lou a a omlai un Kain in a nau Abel a sual a, a thatta hi.
9 Toupa’n Kain kiang ah, “Na nau Abel kaw om ahia?” a chi hi. Aman, “Ka theikei, ka nau donpa ka hi ahia?” a chi hi.
10 Toupa’n, “Bang hih na tamai a? Na nau sisan aw in lei a kipan a honsam hi. 11Huaiziak in, na khut a kipan na nau sisan sang dia kam a na ka lei apan hamsiat na hita hi. 12Lei na leh in leng a hoihna a honpe nawn kei ding” a chi hi.
13Kain in, Toupa kiang ah, “N’on gawtna a na mahmah a, ka thuak zou kei ding.
14Ngai in, tuni in leitung a kipan n’on delhkheta a, Na mit muh phaklouh a sel a om ding ka hita. Lei ah taimang leh vakvai hi ding ka hita hi. Hichi ahi ding a, kuapeuh honmu in a honthat mai ding uh” a chi hi.
15 Toupa’n a kiang ah, “Huchi ahihleh, kuapeuh Kain that a mun sagih in a tung ah phu a la ding uh” a chi hi. Mi amah mu in a thah louh na ding in Toupa’n Kain a chiamtehta hi. 16Kain Toupa kiang a kipan a pawt a, Eden suahlam a Nod gam ah a tengta hi.
Kain Suante
17Kain in a zi a luppih a; Huchi in a gai a, Enok a nei hi. Khua a sat a, a khaw min a tapa tamsak in Enok a sa hi. 18Enok in tapa Irad a nei a; Irad in tapa Mahujael a nei hi. Mahujael in tapa Methusael a nei a; Methusael in tapa Lamek a nei hi. 19Lamek in zi nih a nei a; khat min Adah ahi a, khat pen min Zillah ahi. 20Adah in Jabal a nei a; amah puanin a om ganvulmite suangpa ahi. 21A nau min Jubal ahi a, amah kaihging leh tamngai tummi tengteng suangpa ahi. 22Zillah in leng Tubal Kain, dal leh sik, tuzat heizat chiteng sekmi, a nei hi. Tubal, Kain sanggamnu Naamah ahi.
23Lamek in a zite kiang ah,
Adah leh Zillahte aw, ka aw za unla;
Lamek zite aw, ka thugen ngaikhia un.
A hon liamsak ziak in mi khat ka that a,
A hon sidup sak ziak in valnou khat ka that hi.
24Kain phu bawn a mun sagih a la ding a hih uleh
Lamek phu a mun sawmsagih leh sagih in a la ding uh, a chi hi.
Seth Leh Enosh
25Adam in a zi a luppih nawn a; tapa a nei nawn a; a min Seth a sa hi. Pathian in Abel sik in chisuan ding a hon sehsakta; Kain in lah amah a thatta ngal a, a chi hi. 26Seth in leng tapa a nei a; a min Enosh a sa hi. Huai a kipan mite’n Toupa min a lou panta uhi.
നിലവിൽ തിരഞ്ഞെടുത്തിരിക്കുന്നു:
GENESIS 4: PAITBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
