JENESIS 3
3
Ka jingbymkohnguh u briew
1 #
Jpw. 12:9; 20:2 Te u bseiñ u long uba sianti tam na ki mrad baroh kiba U Trai U Blei u la lah thaw. Uta u bseiñ u ong ha kata ka briew, “Hato ka dei shisha ba U Blei u ong ba phim bit ban bam ïa u soh na uno uno u dieng ha kper?”
2Kata ka briew ka jubab, “Ngi lah ban bam ïa u soh na uno uno u dieng ha kper, 3lait noh tang ïa u soh jong uta u dieng uba hapdeng ka kper. U Blei u la ong ba ngim bit ban bam ïa u soh jong uta u dieng lane wat tang ban ktah ruh ïa u, ïoh ngi ïap.”
4Te uta u bseiñ u ong ha kata ka briew, “Kata kam dei kaba shisha, phin ym ïap. 5U Blei u ong kumta namar u tip ba phi tang shu bam ïa u, phin sa long kum U Blei bad tip kaei kaba bha bad kaei kaba sniew.”
6Ka briew ka la ïohi haduh katno uta u dieng u long uba itynnat bad haduh katno u soh jong u, u long uba ibang, bad ka la pyrkhat ruh haduh katno kan long kaba phylla ban long kaba stad. Kumta ka la shim ïa u soh bad ka la bam. Nangta ka la ai lem ha u tnga jong ka, bad u ruh u la bam ïa uta u soh. 7Mar kumta hi hadien ba ki lah bam ïa u, la ai ha ki ka jingsngewthuh bad ki la sngewthuh ba ki long lyngkhuit; kumta ki la suh lang ïa ki sla dieng Dumbur ban da ïa lade.
8Ha kata ka janmiet, ki ïohsngew ïa U Trai U Blei ba u ïaid ha kper; bad ki la rieh na u hapdeng ki dieng. 9Hynrei U Trai U Blei u la khot ïa u briew, “Ha-ei me don?”
10U te u jubab, “Nga la ïohsngew ïa me ha ka kper; nga la sheptieng bad nga la rieh na me, namar nga la lyngkhuit.”
11Bad U Blei u ong, “Mano ba la ïathuh ïa me ba me la lyngkhuit? Hato me la bam ïa u soh uba nga la ong ïa me ban ym bam?”
12Uta u briew u ong, “Ka briew kaba me la buh hangne bad nga, ka la ai ha nga ïa u soh, bad nga la bam.”
13 #
2 Kor. 11:3; 1 Tim. 2:14 Te U Trai U Blei u ong ha kata ka briew, “Balei pha leh ïa kane?” Ka jubab, “Uta u bseiñ u la pynbieit ïa nga ban bam ïa u.”
U Blei u rai pynshitom
14Nangta U Trai U Blei u ong ha uta u bseiñ, “Yn pynshitom ïa me namar kane; tang ma me hi na ki mrad baroh men kit ïa kane ka jingtim: Naduh mynta, men par da ka kpoh, bad men hap bam ïa ka dewmet katba me dang im. 15#Jpw. 12:17Ngan pynlong ïa me bad ka briew ban ïa-isih iwei ïa iwei pat, u symbai jong ka bad u symbai jong me kin ïailong ki nongshun. U symbai jong ka un pynlwet ïa ka khlieh jong me, bad me pat men puh ïa ka khongdong'jat jong u symbai jong ka.”
16Ha kata ka briew pat u ong, “Ngan pynjur ïa ka jingjynjar jong pha haba pha punkhun, bad ïa ka jingshitom jong pha haba pha kha khun. La katta ruh, phan ïai kwah ïa la u tnga, pynban yn pyndem ïa pha ha u.”
17 #
Heb. 6:8
Bad ha u briew u ong, “Me la shahshkor ïa ka tnga jong me bad ba me la bam ïa u soh uba nga la ong ïa me ban ym bam. Namar kaei kaba me la leh, ka khyndew kan don hapoh ka jingtim. Men hap trei shitom baroh shi rta jingim ban pynlong ïa ka ban pynmih ka jingbam babiang na ka bynta jong me. 18Kan sa pynmih ïa ki ñiut bad ki dieng shiah; bad men hap bam da u jhur khlaw. 19Men hap trei shitom bad jaw syep ban pynlong ïa ka khyndew ban pynmih ei ei, tad haduh ba men da leit phai pat sha ka khyndew na kaba la thaw ïa me. La thaw ïa me na ka dewmet, bad men sa kylla dewmet sa shisien pat.”
20U Adam u khot kyrteng ïa la ka tnga “Ka Im”, namar ka long ka kmie jong ki briew baroh. 21Bad U Trai U Blei u shna jingkup na ki snieh mrad ïa u Adam bad ka tnga jong u, bad u la pynkup ïa ki.
La beh noh ïa u Adam bad ka Im na ka Kper Eden
22 #
Jpw. 22:14
Te U Trai U Blei u ong, “Mynta kine ki briew ki la kylla long kum ma ngi bad ki la don ka jingtip ïa kaba bha bad ïa kaba sniew. Ym dei ban shah ïa ki ban kheit ïa u soh na u dieng ba ai jingim, ban bam ïa u, bad ban im junom.” 23Kumta U Trai U Blei u la beh noh ïa ki na ka Kper Eden, bad u pynlong ïa ki ban rep ïa ka khyndew na kaba la thaw ïa ki. 24Nangta ha ka phang mihngi jong ka kper u la buh ïa ki kherub bad ka waitlam bameh ding kaba phai ha baroh ki liang. Kata ka la long ban ïada ïano ïano na kaba wan hajan u dieng ba ai jingim.
നിലവിൽ തിരഞ്ഞെടുത്തിരിക്കുന്നു:
JENESIS 3: KHACLBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khasi CL Bible
Copyright © Bible Society of India, 2016.
Used by permission. All rights reserved worldwide.
