JENESIS 11
11
Kaba tei ïa u mot Babel
1Ha kaba nyngkong, ki briew ha ka pyrthei baroh ki la don tang kawei ka ktien ka thylliej bad pyndonkam ïa kijuh ki kyntien. 2Te ynda ki briew ki la ïaid kylleng ha ka phang mihngi, ki la poi sha ka pyntha ha Babilonia bad ki la ïashong sah hangta. 3Ki la ïa-ong para ma ki, “Ale! ngin ïathaw maw-it bad ngin thang pyneh ïa ki.” Kumta ki la ïoh maw-it ban tei, bad ka bsiang ban pyndait lang ïa ki. 4Ki ïa-ong, “Mynta to ngin ïatei kawei ka nongbah kaba don u mot uba kot haduh sahit bneng, ba kumta, ngin lah ban thaw nam ïa lade bad ym ban ïasakma ha kylleng ka pyrthei.”
5Nangta U Trai u la wan hiar ban khmih ïa kata ka nongbah bad ïa uta u mot uba ki la lah tei, 6bad u la ong, “Mynta te, kine baroh ki la long uwei u paid bynriew bad ki ïakren kawei ka ktien; kane ka dei tang ka jingsdang jong kaei kaba kin sa leh. Shen shen kin lah ban leh ïa kano kano kat kaba ki thmu! 7Ïa, ngin ïaleit hiar bad pynkhleh ïa ka ktien jong ki, ba kumta kin ym ïasngewthuh shuh iwei ïa iwei pat.” 8Kumta U Trai u la pynsaphred ïa ki ha kylleng ka pyrthei, bad ki la sangeh noh ha kaba tei ïa ka nongbah. 9Ïa ka nongbah la khot kyrteng ka Babel, namar dei hangta ba U Trai u la pynkhleh ïa ka ktien jong ki briew baroh; bad nangta la pynsaphred ïa ki sha kylleng ka pyrthei.
Ki khun ki ksiew jong u Shem
(1 Khrn. 1:24-27)
10Kine ki long ki khun ki ksiew jong u Shem. Ar snem hadien ka jingshlei um, haba u Shem u la dap shispah snem ka rta, u la ïoh khun shynrang, u Arpakhshad. 11Hadien kata, u la im sa sanspah snem bad u la ïoh ruh sa kiwei pat ki khun.
12Haba u Arpakhshad u la dap laiphew san snem ka rta, u la ïoh khun shynrang, u Shelah; 13hadien kata u la im sa sawspah lai snem, bad u la ïoh ruh sa kiwei pat ki khun.
14Haba u Shelah u la dap laiphew snem ka rta, u la ïoh khun shynrang, u Eber; 15hadien kata u la im sa sawspah lai snem, bad u la ïoh ruh sa kiwei pat ki khun.
16Haba u Eber u la dap laiphew saw snem ka rta, u la ïoh khun shynrang, u Peleg; 17hadien kata u la im sa sawspah laiphew snem, bad u la ïoh ruh sa kiwei pat ki khun.
18Haba u Peleg u la dap laiphew snem ka rta, u la ïoh khun shynrang, u Reu; 19hadien kata u la im sa arspah khyndai snem, bad u la ïoh ruh sa kiwei pat ki khun.
20Haba u Reu u la dap laiphew snem ka rta, u la ïoh khun shynrang, u Serug; 21hadien kata u la im sa arspah hynñiew snem, bad u la ïoh ruh sa kiwei pat ki khun.
22Haba u Serug u la dap laiphew snem ka rta, u la ïoh khun shynrang, u Nahor; 23hadien kata u la im sa arspah snem, bad u la ïoh ruh sa kiwei pat ki khun.
24Haba u Nahor u la dap arphew khyndai snem ka rta, u la ïoh khun shynrang, u Terah; 25hadien kata u la im sa shispah khatkhyndai snem, bad u la ïoh ruh sa kiwei pat ki khun.
26Hadien ba u Terah u la dap hynñiewphew snem ka rta, u la long u kpa jong u Abram, u Nahor, bad u Haran.
Ki khun ki ksiew jong u Terah
27Kine ki long ki khun ki ksiew jong u Terah, uba long u kpa jong u Abram, u Nahor, bad u Haran. U Haran u dei u kpa jong u Lot, 28bad u Haran u la ïap ha la ka jong ka shnong, ka Ur ha ka ri Babilonia, mynba u kpa jong u, u dang im. 29U Abram u la shongkurim ïa ka Sarai, bad u Nahor u la shongkurim ïa ka Milkah, ka khun jong u Haran, uba long ruh u kpa jong ka Iskah. 30Ka Sarai te kam shym la lah ban ïoh khun.
31U Terah u shim ïa u Abram u khun jong u, ïa u Lot u ksiew jong u, uba long u khun jong u Haran, bad ïa ka pyrsa kurim jong u ka Sarai, ka tnga jong u Abram, bad ki ïamih lang noh na ka shnong Ur kaba ha ka ri Babilonia ban leit sha ka ri Kanaan. Ki la leit haduh ha Haran bad ki la ïashong ïasah noh hangta. 32U Terah u la ïap hangta ha ka rta kaba arspah san snem.
നിലവിൽ തിരഞ്ഞെടുത്തിരിക്കുന്നു:
JENESIS 11: KHACLBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khasi CL Bible
Copyright © Bible Society of India, 2016.
Used by permission. All rights reserved worldwide.
