MARKA 5
5
Gerasin rama khawhri zâwl sukdam
(Mt 8.28-34; Lk 8.26-39)
1Chun, dîl râl, Gerasin#“Gedarin” ti khawm a nih mihai ram chu an hung tlung a.
2Chun, lawnga inthawka a suok chau chun mi pakhat, khawhri inthieng naw iman thlâna inthawka hung suok chun ân tuokpui ta a;
3chu mipa chun thlâna dâm chun umna a nei hlak a, tukhawmin khaidiet khawmin an khit thei ta naw a;
4kawlhai le khaidiethai khawmin an khit rawp ta hlak a, anachu khaidiethai dâm chu a keitan a, kawlhai dâm khawm chu a sukbawng pei hlak a; tukhawmin an sukdawl zo naw a.
5A sûn a zânin thlânahai le tlângahai chun a khêk hlak a, lung dâm khawmin ân ât rawp hlak a.
6Chun, hlataka inthawkin Isu chu a hei hmu phingleh a tlân a, chibai a va bûk a.
7 #
Tt 16.17; Heb 7.1; Mk 1.24 Chun, râwl inringtaka khêkin, “Isu, Pathien Chunghnungtak Naupa, kei le nang ieng am ei inzâwlna a um a? Mi sawisa naw hrâm dingin Pathien hmingin ka ngên ṭal che a nih,” a ta.
8(Isu chun a kuomah, “Nang khawhri inthieng naw, mihriem sûnga hi suok rawh,” a lo ti nghâl ta a.)
9Chun, Isu#Gr.Ama chun, “I hming ieng am a na?” tîn ân dawn a. Ama chun a kuomah, “Ka hming chu Legion#Legion Rome Sipai 6,000 pâwl hming a nih, tamtak kan ni si a,” a ta.
10Chun, chu rama inthawk chun anni tir hmang lo dingin Isu kuomah a ngên ṭal ta a.
11Chun, chutaka tlâng panga chun vawk ruol tamtak an tla a.
12Chun, khawhri inthieng nawhai chun, “Vawkhai kuoma sawn mîn fêtir rawh; an sûnga kan lût theina dingin,” tiin a kuomah an ngên a.
13Ama chun a phal pêk a. Chuongchun, khawhri inthieng nawhai chu an suok a, vawkhai sûnga chun an lût a, chuongchun, vawk ruol chu (sâng hni lai an na) rawlah an tlân thla a, dîlah an tlân lût a; chuongchun, dîla chun tui an inhâk hlum ta a.
14Chun, a vâituhai chu an tlân a, khuo le lohaia dâm chun an hril a. Chun, “Ieng am a ni ta leh?” tia en dingin an hung khâwm tâwl a.
15Chun, Isu kuom an hung tlung a, khawhri iman, Legion iman kha, puon sila, lungril ngai puta ṭhung an hmu a, chuongchun, an ṭi ta a.
16Chun, a hretuhai chun khawhri imanpa chunga thil hung tlung zie le, vawk chanchinhai chu chuonghai kuoma chun an lo hril a.
17Chun, chuonghai chun Isu chu an rama inthawka suok dingin an ngên ta a.
18Chun, lawnga a chuong ding lai takin, khawhri imanpa khan Isu kuoma um zing a ngên a.
19Nisienlakhawm, Isûn a phal naw a, a kuomah, “I ina i ruolhai kuomah fe la, Lalpain thil a thawpêk che hi a ropuizie le a lunginsietzie che hi va hril rawh,” a ti ta lem a.
20 #
Mk 7.31
Chuongchun, a fe a, Dekapoli khuohaia chun Isûn a ta dinga thil a thawpêkhai ropuizie chu a khêk vêlpui ta a; chun, mi po po chun mak an ti hle a.
Nuhmei thipût sukdamna le Jaira naunu keithona
(Mt 9.18-26; Lk 8.40-56)
21Chun, Isu chu lawnga râl khing tieng a hung kai nâwk chun, mipui nasatak a kuomah an hung khâwm a, ama chu dîl panga chun a um a.
22Chun, inkhâwmna hotuhai laia mi pakhat, a hming Jaira chu a hung a, Isu a hmu phingleh a ke bulah a bawkkhup a,
23“Ka naunu naupangte a thi vâng vâng a, a hung hara, a hung dam theina dingin, hunga a chunga i kut innghat dingin ka ngên che,” tiin a ngên ṭal a.
24Chuongchun, Isu chu ama le chun an va fe a, chun, mipui nasatakin an zui a, an hneng sup sup a.
25Chun, nuhmei pakhat kum sâwmpahni thipûtin a damnaw a,
26dâktawr tamtak kuomah nasatakin a tuor ta a, a nei po po khawm chu a sêng zo ta a, ṭhathnem nêkin a zuol deu deu lem a.
27Chu minu chun Isu chanchin a lo hriet a, a hnungah mipui lai chun a hung a, a puon chu a them a,
28“A puon chau khawm them lang sukdamin um el ka tih,” a ti lungril a nih.
29Chuongchun, kârlovin a thipût chu a hung bo nghâl ta a, a natna chu sukdam a ni tah ti a taksa chun ân hriet ta a.
30Chun, Isu chun a sûnga thilthawtheina chu a suok ti a lo hriet a, mipui lai chun a ngha vêl nghâl ta a, “Tu am a na ka puon them kha?” a ta.
31Chun, a inchûktirhai chun a kuomah, “Mipuiin an hneng sup sup che hi i hmu nghâl a, ‘Tu am a na a mi them,?’ iengtiziea ti am i na?” an ta.
32Chun, ama chun a themtu chu hmu tumin a en vêl a.
33Chuongchun, nuhmei chun a chunga Isu thil thawzie chu hrein ṭi le inthin pumin a hung a, a hmaah a bawkkhup a, a kuomah thu indiktakin a hril vawng ta a.
34Chun, ama chun a kuomah, “Ka naunu, i ringna hi i dampui a nih, lungmuongtakin fe la, i natna chu lo dam sawng ta raw se,” a ta.
35A la ṭawng zing laiin inkhâwmna in hotu ina inthawkin mi an hung a, “I naunu a thi tah, iengdingin am inchûktirtu hi la suksâwl rawp i ta?” an ta.
36Isu ruok chun, an thu hril chu ngaisak lovin inkhâwmna in hotu kuoma chun, “Ṭi naw, awi el rawh,” a ta.
37Chun, Peter hai, Jakob hai, Jakob unau Johan hai chau naw chu tukhawm ama zui ve a phal ta naw a.
38Chun, inkhâwmna in hotu in chu an va tlung a, Isu chun an lo buoi mur mur le, an lo ṭap veng vung a, an khêk tuor tuor chu a va hmu a.
39Chun, a va lût chun, an kuomah, “Iengdinga inri veng vunga ṭap am in na? naupang chu a thi nawh, a in lem a nih,” a ta.
40Anni hlak chun an nuisan el a; ama hlak chun an rêngin a hnawt dawk a, naupang nu le pa le a kuoma umhai chu a ṭhuoi a, naupang umnaa chun a va lût a.
41Chun, naupang kut chu a chel a, a kuoma chun,“Talitha kumi,” a ta. Chu chu, “Bawinu tho rawh ka ti che,” tina a nih.
42Chun, naupangnu chu a hung tho a, a fe thei nghâl ta a; ama chu kum sâwmpahni mi a ni hrim ta a. Chun, anni chun namênin mak an ti naw a.
43 #
Mt 9.18-26; Lk 8.40-56 Chun, amân an kuomah, “Hi hi tukhawmin hre naw raw hai se,” a ti tlat a, chun fâk ding pêk ding thu a pêk ta a.
നിലവിൽ തിരഞ്ഞെടുത്തിരിക്കുന്നു:
MARKA 5: HMOVBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
