MARKA 3
3
Kutzeng sukdam
(Mt 12.9-14; Lk 6.6-11)
1Chun, inkhâwmna ina chun a lût nâwk a, chutaka chun mi pakhat kutzeng hi a lo um a.
2Chun, ama an hêk theina dingin Châwlnin a sukdam ding le sukdam naw ding an enthlit a.
3Ama chun kutzeng kuoma chun, “Hung ngîr dawk rawh,” a ta.
4Chun, an kuoma chun, “Châwlni hin sukṭhat am a thieng, suksiet? sandam am a thieng sukhlum?” tiin ân dawn a. Nisienlakhawm, an to zing a.
5Chun, an lungril ngar zie chu pawitipêk bêk bêkin, lungsen puma anni a en vêl hnungin, chu mipa kuoma chun, “I kut phar rawh,” a ta. Chun, a hang phar dawk a, a kut chu a dam ta a.
6Chun, Pharisaihai chu an suok a, ama an sukhlum thei dân ding ngaituoin Herod pâwla mihai le chun an inrâwn nghâl ta a.
Dîl panga mi tamtak sukdam
(Mt 16.16; Lk 6.17-19)
7Chun, Isu chu a inchûktirhai le chun dîl tieng an fe hmang ta a, chuongchun, Galili rama inthawkin mipui nasatakin an zui ta a.
8Chun, a thil thaw ropuizie chu an hrietin, Judai rama inthawk dâmin, Jerusalema inthawk dâmin, Idumai rama inthawk dâmin, Tura le Sidon khuo vêla inthawk dâmin mipui nasatak a kuomah an hung ve a.
9Chun, mipui lei chun a ta dinga lawnglêng pakhat lo siemrêlpêk dingin a închûktirhai a hril a. “Chuong naw chun mi hneng hut hut rawi an tih,” a ta.
10 #
Mk 4.1; Lk 5.1-3 Mi tamtak a sukdam nghâl ta a; chuongchun, natna nei po po chun ama an them theina dingin an bûm tul tul a.
11Khawhri inthieng nawhai khawmin ama an hmu po leh a hmaa bawkkhupin, “Nang Pathien Naupa chu i nih,” tiin an khêk hlak a.
12Chun, ama chun a chanchin chu puong lo dingin an kuomah a ti tlat pei a.
Isûn tirko sâwm le pahni a thlang
(Mt 10.1-4; Lk 6.12-16)
13Chun, tlânga chun a hang fe a, amain a dit pohai chu a ko a, chuongchun, anni chu a kuomah an hang fe a.
14Chun, sâwm le pahni a ruot a#Ziek ṭhenah chun “tirkohai ti ân bûk a,” ti a ṭhang, a kuoma an um theina dingin le thu hril dinga a tir dawk theina ding le,
15khawhrihai hnawt dawkna thu nei dinga a tir dawk theina dingin.
16Chuonghai chu, Simon, Peter a înbûk hai;
17Zebedai naupa Jakob le Jakob unaupa Johan hai dâm, (chuonghai chu “Boanerges” ân bûk a, chu chu “Vâninrûm Nauhai,” tina a nih.)
18Andri hai, Philip hai, Bartholomai hai, Matthai hai, Thoma hai, Alphai naupa Jakob hai, Thaddai hai, Kanaana Simon hai;
19a înmantirtu Juda Iskariot hai dâm kha an nih.
Isu le Beelzebub
(Mt 12.22-23; Lk 11.14-23; 12.10)
20Chun, inah a va lût a. Chun, mipui chu an hung khâwm nâwk a, chuongchun, bei takngiel khawm an fâk thei ta naw a.
21Chun, a sûnghai chun chu chu an hriet a, “ân vêt a ni chu tie,” tiin, ama man tumin an inthawk a.
22 #
Mt 9.34; 10.25 Chun, Dân Inchûktirtuhai Jerusalema inthawka hung thlahai chun, “Beelzebub#Ziek ṭhenah “Beelzebul” ti a nih a zâwl a ni hi,” an ti a. “Khawhri lal lei annâwm khawhrihai a hnawt dawk hlak hi,” an ti bawk a.
23Chun, Isu chun Dân inchûktirtuhai chu a ko a, tekhithuin an kuomah, “Setanin Setan bawk iengtin am hnawt dawk thei a ta?
24Ram khawm ama le ama ân do chun, chu ram chu ngîr suok thei naw ni.
25Sûng khat khawm anni le anni an indo chun, chuhai sûng chu ngîr suok thei naw ni hai.
26Setan khawm ama le ama indo a, ân khing si chun, ngîr suok thei naw ni a, bohmang el lem a tih.
27Tukhawm mi hrât ina lûtin a sum chu a lâkpêk thei ngai nawh, mi hrât chu an phier hmasa zet naw chun; chu hnunga ruok chun a in chu inrampêk el an tih.
28Titakzetin ka hril cheu hi, mihriem nauhai hi an suolna po poa le, Pathien an hrilsietna kawng tinrênga khawm chun ngaidam nîng an tih;
29 #
Lk 12.10; 4.1; Lk 5.1-3 tukhawm Thlarau Inthieng meu hrilsetu ruok chun ienglai khawmin ngaidamna hmu naw ni, chatuona thiemnaw changna suol maw chu phur lem a tih,” a ti a.
30(“Khawhri inthieng naw a zâwl a nih,” an ti lei khan chu chu a hril a nih.)
Isu nu le a unauhai
(Mt 12.46-50; Lk 8.19-21)
31Chun, a nu le a unauhai chu an hung a, tuolah an ngîr a, ama ko dingin mi an tir a.
32Chun, a sîr vêl lai chun mipui an lo ṭhung tâwl a; chun, a kuoma chun, “Ngai ta, tuola sawn i nu le i unauhaiin an zawng che,” an ta.
33Chun, ama chun an kuomah, “Ka nu le ka unauhai chu tuhai am an na?” tiin an dawn a.
34Chun, a kâwla ṭhunghai chu a hei en vêl a, “En ta u, ka nu le ka unauhai hi!
35Tukhawm Pathien dit zâwng thawtu phawt chu, chuonghai ngei chu ka unauhai, ka farnuhai, ka nuhai an nih annâwm,” a ta.
നിലവിൽ തിരഞ്ഞെടുത്തിരിക്കുന്നു:
MARKA 3: HMOVBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
