LUKA 19
19
Isu le Zakai
1Chun, Isu Jeriko khuoah a lût a, a fethleng ding a na.
2Chun, ngai ta, mi pakhat a hming Zakai a um a; ama chu siedâwl hotu a na, a hausa hle a.
3Chun, Isu chu mi ieng ang am a ni hmu a tum a; mipui leiin a hmu thei naw a, ama hlak ân hnuoi si a.
4Chuongchun, a tlân khal a, a en dingin theichang lêrah a lâwn a; chu lampui chu a hung hraw ding a ni leiin.
5Chun, Isu chu chu hmun a tlung chun a tang a, a kuomah, “Zakai, hung ṭum vak rawh; vawisûn i inah ka tlung ding a nih,” a ta.
6Chun, inhmawtakin a ṭum a, hlimtakin ama chu ân tlungtir ta a.
7Chun, chu chu an hmu phingleh an rêngin, “Mi suol kuoma tlung dingin a lût ta saw,” an ti a, an chier a.
8Chun, Zakai chu a ngir a, Lalpa kuoma chun, “Ngai ta, Lalpa, ka sum zâtve pasiehai kuomah pêng ka ta; chun, tu chunga khawm thil ieng khawm lo hlêpru ka ni chun a lêt liin thung nâwk ka tih,” a ta.
9Chun, Isûn Zakai chungthu a hril a, “Vawisûn hi ina hin sandamna a hung tlung tah, ama khawm Abraham naupa a ni si a.
10 #
Mt 18.11
Bohmanghai zawnga sandam dingin Mihriem Naupa hi a hung a ni hrim a nih,” a ta.
Rângkachak tangka tekhithu
(Mt 25.14-30)
11 #
Mt 25.14-30
Chun, chuong thuhai chu an ngâi laiin, Jerusalem a hnai ta leiin le Pathien ram hung inlang nghâl ding nia an ring leiin tekhithu a hril sa a.
12Chuongchun, hieng thu hi a hril a, “Mi ṭha tû amanih ram awpna thu laa hung kîr nâwk dingin ram hlatakah a fe a.
13A fe dingin a suokhai sâwm a ko a, an kuomah rângkachak tangka sâwm a pêk a, an kuomah, ‘Ka hung tlung nâwk hmakhat chu hi hin lo sumdâwng ro,’ a ta.
14Nisienlakhawm, a khuohaiin an theida a, ‘Hi mipa hi kan lal dingin kan dit nawh,’ ti dingin a hnungah palai an intlântir ve a.
15“Chun, ram awpna thu chu a lâka a hung kir nâwk chun, a suok tangka a ipêkhai chu, an sukpung dân inhrietna dingin ân kotir a.
16Chun, a hmasatak chu a hung a, ‘Pu, i rângkachak tangka kha sâwmin a pung,’ a ta.
17Ama chun a kuomah, ‘Suok ṭha, i thaw ṭha ie, tlâwmtê chungah ring i um leiin khaw sâwm chungah hotuin um rawh,’ a ta.
18Chun, a dawttu chu a hung a, ‘Pu, i rângkachak tangka kha pangain a pung ie,’ a ta.
19Chun, ama chun ama kuoma khawm chun, ‘Nang khawm khaw panga chungah hotuin um rawh,’ a ta.
20“Chun, mi dang a hung a, ‘Pu, en ta, hi i rângkachak tangka kha! thlanhrûkna puonin ka fûn zing;
21mi vîntak i ni leiin ka ṭi che a nih; i sie naw khawm i lâk hlak a, i tu naw khawm i sîk hlak si a,’ a ta.
22“Chun, ama chun a kuomah, ‘Suok suol, i ṭawngbau suok ngeiin kân thiem naw che. Mi vîntak ka na, ka sie naw khawm ka lâk a, ka tu naw khawm ka sîk hlak ti i hriet maw?
23A ni sa chun, ka tangka hi iengdinga sumdâwng ina i sie naw am a na? Chuongchun, ka hung hin a pung leh ka hung ṭhîn ding bah,’ a ta.
24Chun, a kâwla ngirhai kuomah, ‘A rângkachak tangka kha lâkpêk unla, rângkachak tangka sâwm neitu kuomah pe ro,’ a ta.
25Chun, anni chun a kuomah, ‘Pu, ama chun rângkachak tangka sâwm a nei annawm’ an ta.
26 #
Mt 13.12; Mk 4.25; Lk 8.18 ‘Ka ti cheu hi, a nei taphawt chu pe belsâng an ta, a nei naw chu a nei sun khawm chu lâkpêk an tih.
27Nisienlakhawm, hieng a mi dotuhai an lal dinga mi dit nawhai hi hung ṭhuoi unla, ka hmaah that ro,’ a ti a,” a ta.
Isu Jerusalema ropuitaka a lût
(Mt 21.1-11; Mk 11.1-11; Jn 12.12-19)
28Chun, chuong ang thu a hril zo chun Jerusalem panin a hmasa a.
29Bethphage le Bethani khaw kâwl, Oliv tlâng an ti chu a tlung chun, inchûktirhai laia mi pahni a tir a,
30“In hma zâwn khuoa sawn va fe unla, chuongchun, in lût hlimin sabengtungtê thlung tukhawm la chuongna ngai naw va hmûng in tih; chu chu sût unla, hung kei ro.
31Chun, tûkhawmin, ‘Iengdinga in sût am?’ tia an indawn cheu chun, ‘Lalpain a mamaw a nih,’ tiin hril ro,” a ta.
32Chun, a tirhai chu an fe ta a, an kuoma a hril ang ngeiin an va hmu a.
33Chun, sabengtungtê chu an sût lai chun, a neituhaiin an kuomah, “Sabengtungtê kha iengdinga in sût am?” an ta.
34Chun, anni chun, “Lalpain a mamaw a nih,” an ti a.
35Chuongchun, Isu kuomah an hung kei a; chun, sabengtungtê chunga chun an puonhai an pha a, a chungah Isu an inchuongtir a.
36Chun, a fena ding lampuia chun an puonhai an pha pei a.
37Chun, a tlung ding tâwmin, Oliv tlâng liem tâwmin inchûktir mipui po po chun a thilmak thawhai po po an hmu leiin an lâwm a, râwl inringtakin Pathien an inpâk a,
38 #
Sm 118.26
“Lalpa hminga hung chu inpâkin um raw se; vânah inremna inlêng sienla, achunghnungtaka khin ropuina um raw se,” tiin.
39Chun, mipui laia Pharisai ṭhenkhatin a kuomah, “Inchûktirtu, i închûktirhai hi kâwk rawh,” an ta.
40Ama ruok chun, “Ka hril cheu hi, hienghai hi an to zing chun, lunghai bêk an khêk suok ding a nih,” a ta, a dawn a.
41Chun, a tlung ding ṭepin, khuo chu a hmu a, a ṭap ngha a,
42“Aw, nang hin tuta sûng hin thlamuongna ding thu hi lo hre hrâm la chu aw! Nisienlakhawm, tuhin chu i hmu thei nawna dingin ân thup ta si a.
43Hieng ang nihai hi i chungah a la tlung ding a ni si a; i râlhaiin i vêlin hnuoi kul siem an ta, inhuol an ti che a;
44i sûngah i nauhai le nang leh hnuoiah pei rak an ti che; i sûngah lung inthuo hrim hrim hla naw ni hai, an fang lai che i hriet naw leiin,” tiin.
Isûn Biekin a sukthieng
(Mt 21.12-17; Mk 11.15-19; Jn 2.13-22)
45Chun, Pathien biekina chun a va lût a, iengkhat zawrtuhai chu a hnawt dawk ta a;
46 #
Is 56.7; Jer 7.11 an kuomah, “ ‘Ka in chu ṭawngṭaina in nîng a tih,’ ti ziek a nih; nangni ruok chun suomhmanghai pûkah in siem lem hi,” a ta.
47 #
Lk 21.37
Chun, ni tin Pathien biekina chun ân chûktir hlak a. Chun, thiempu lalhai le Dân inchûktirtuhai leh, vântlâng laia hotu deuhaiin, ama sukbohmang an tum a;
48nisienlakhawm, mihaiin ṭhahnemngaitaka thu an ngai leiin, a thaw ngaina an hriet si nawh.
നിലവിൽ തിരഞ്ഞെടുത്തിരിക്കുന്നു:
LUKA 19: HMOVBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
