JOHAN 8
8
Nuhmei uire an man thu
1Isu ruok chu Oliv tlângah a fe ta lem a.
2Chun, zingkâr inhmatakin Pathien biekinah a lût nâwk a, mi po po a kuomah an hung a; chun, ama chu a ṭhung a, anni ân chûktir a.
3Chun, Dân inchûktirtuhai le Pharisaihaiin nuhmei pakhat a uiret leia an man an hung ṭhuoi a; a laiah an inngîrtir a.
4Isu kuomah, “Inchûktirtu, hi nuhmei hi a uiret lai an man a nih, a uiret lai takin.
5 #
Lev 20.10; Dt 22.22-24 Dân Lekhabuah Mosiein hieng ang mi hi lunga dêng hlum thu a mi pêk a; nangin iengtin am i ngai a?” an ta.
6Chu thu chu ama fiena dingin an thaw a nih, a hêkna ding an hmu theina dingin. Chuongchun, Isu a kûn a, a kutpârin hnuoi a ziek a.
7Chun, an indawn sek sek leiin ama chu a tho a, an kuomah, “Nangni laia suol nei naw naw chun ama chu lungin dêng hmasa raw se,” a ta.
8Chun, a kûn nâwk a, a kutpârin hnuoi a ziek nâwk a.
9Chun, anni chun a thu hril chu an hrietin, a upatakin a phut a, a tâwp chenin, pakhat khatin an inrel hmang ta pei a; chuongchun, Isu chau a um ta a, nuhmei a laia a umna ngaia um le khan.
10Chun, Isu a tho a, a kuomah, “Nuhmei, khâwlai am an um ta a? Tukhawmin thiemnaw an inchangtir naw che a ni maw?” a ta.
11Ama chun, “Lalpa, tukhawmin an mîn changtir nawh,” a ta. Chun, Isûn, “Kei khawmin thiemnaw kân changtir naw che; fe la, tuta hnung chu suksuol nâwk ta naw,” a ta.]#Ziekna ṭhena chu bung 7.53-8.11 hi a um nawh
Isu khawvêl var chu
12Chun, Isûn an kuomah thu a hril nâwk a, “Kei khawvêl êntu ka nih, tûkhawm a mi zui chu inthimah lêng tawp naw ni; hringna var nei lem a tih,” a ta.
13Chuongchun, Pharisaihaiin a kuomah, “Mâni thu inhriettir i nih, i thu inhriettir ân dik nawh,” an ta.
14Isûn an kuomah, “Mâni thu inhriettir lang khawm ka thu inhriettir ân dik a nih; keiin ka hung suokna le ka fena ding chin khawm ka hriet a; nangni chun chu ka hung suokna le ka fena ding chin khawm in hriet si nawh.
15Nangnîn tisa dânin in sawisêl hlak; kei ruok chun tukhawm ka sawisêl nawh.
16Anih, sawisêl lang khawm ka sawisêlna chu indik a tih; keia khât chau ka ni naw a, kei le Pa a mi tirtu leh kan ni lem leiin.
17Anih, in Dân Lekhabua khawm, ‘Mi pahni thu ân dik,’ ti ziek a ni bawk annâwm.
18Kei hi mâni thu inhriettirtu ka nih, Pa a mi tirtu chun ka thu ân hriettir bawk,” a ta, a dawn a.
19Chun, anni chun a kuomah, “I pa khâwlai am?” an ti a. Isûn “Nangnîn kei in mi hriet nawh, ka Pa khawm in hriet nawh; kei mi hrie ni unla chu, ka Pa khawm hrieng in tih,” a ta.
20Chuong thu chu Pathien biekin- ah inchûktir malamin, thawlâwm siena hmunah a hril a; tukhawmin ama an man si nawh, a hun a la tlung naw leiin.
Ka fenaah in hung thei nawh
21Chun, ama chun an kuomah, “Ka fe hmang ding a ni hi, nangnîn mi zawng in ta, in suol nei zingin thîng in tih; ka fena dingah hung thei naw ti niu,” a ti nâwk a.
22Chun, Judahaiin, “ ‘Ka fena dingah hung thei naw ti niu,’ a ti hi ân sukhlum ding am a nih?” an ta.
23Ama chun an kuomah, “Nangni hnuoi tienga inthawka suok in nih, kei chu chung tienga suok ka nih; nangni hi khawvêla suok in nih, kei chu hi khawvêla suok ka ni nawh.
24Chuleiin, in kuomah, ‘In suol nei zingin thîng in tih,’ ka ti kha; ama chu ka nih ti in awi naw chun, in suol nei zingin thi mawl in tih,” a ta.
25Chun, anni chun a kuomah, “Tû am i ni leh?” an ti a. Isûn an kuomah, “A tira inthawkin in kuomah ka hril hlak kha.
26Nangni chungchâng thua hin thil tamtak hril ding le ngaituo ding ka nei; ieng khawm ni raw se, a mi tirtu chu mi indiktak a nih; a kuoma inthawka thu ka hriet taphawt khawvêl kuomah ka hril hi,” a ta.
27Pa thu an kuomah a hril ti an hriet nawh.
28Chuongchun, Isu bawkin, “Nangnîn Mihriem Naupa hi in khai kâng hnungin, ama chu ka ni le, kei mâni thuin thil iengkhawm ka thaw naw a, Pain a mi hril ang peiin hieng thu hi ka hril a nih ti la hung hrieng in tih.
29A mi tirtu chu ka kuomah a um, a mi thlâthlam nawh; a thil lâwm zâwng taphawt ka thaw pei hlak leiin,” a ta.
30Chun, chuong thu chu a hril laiin mi tamtakin ama chu an ring ta a.
Thutak chun inzalêntir a ti cheu
31Chuongchun, Isûn a ringtu Judahai kuoma chun, “Ka thua in um zing chun, ka inchûktirhai ni taktak in tih;
32chun, thutak hrieng in ta, thutak chun suok ni bân a ti cheu,” a ta.
33 #
Mt 3.9; Lk 3.8 Anni chun a kuomah, “Abraham thlahai kan nih ie, tu chen hin tu suoka khawm kan la um ngai nawh, ‘Suok ni bân a ti cheu,’ ieng ti tia i ti am a na?” an ta.
34Isûn an kuomah, “Titakzetin, titakzetin ka hril cheu hi, tûkhawm thil suksuol taphawt chu suol suok a nih.
35Suok chu kumkhuoin inah a um zing nawh; naupa ruok chu kumkhuoin a um zing hlak.
36Chuongchun, Naupa hin ân zalêntir cheu chun, zalên tak tak tâng in tih.
37Abraham thlahai in nih ti ka hriet deh; ni unla khawm mi that in tum si, ka thu hin in lungrilah umna a nei naw leiin.
38Keiin ka Pa kuoma thil ka hmu chu ka hril hlak; nangni khawmin in pa kuoma thil in hriet chu in thaw hlak,” a ta.
In pa Diebol chu
39Chun, anni chun a kuomah, “Kan pa Abraham a nih,” an ti a, an dawn a. Isûn an kuomah, “Abraham nauhai in ni chun, Abraham thil thaw naw ti niu am.
40Nisienlakhawm, tuhin mi that in tum si. Pathien kuoma inthawka thutak ka ihriet hriltu cheu ka nih in sawnnaw; Abraham chun hieng hin a thaw naw kha.
41Nangni chun chu in pa thil chu in thaw hlak,” a ta. Anni chun a kuomah, “Uire naua pieng kan ni naw ie, Pa pakhat chau kan nei, Pathien chu,” an ta.
42Isûn an kuomah, “Pathien in Pa a ni chun nangnîn mi hmangai naw ti niu am; Pathien kuoma inthawka suok le a kuoma inthawka hung ka ni si a; keima thua hung ka ni bawk nawh, ama chun a mi tir lem a nih.
43Iengdinga ka ṭawng umzie in hriet naw am a na? Ka thu hril in ngai phâk naw lei a nih.
44Nangni chu in pa Diebola inthawka suok in na, in pa dit zâwng thaw in nuom a nih. Ama chu a tîra inthawk tuolthattu a nih, thutakah a ngîr ngai nawh, a sûngah thutak hrim a um naw leiin. Khêl thu a hrilin a mizie dungzuiin a hril hlak, khêlhlip a ni si; thukhêl pa khawm a nih.
45Thutak ka hril leiin nangnîn in mi ring naw a nih.
46Nangni lai tûin am suol kawngah thiemnaw mîn changtir a ta? Thutak ka hril khawmin nangnîn iengdinga in mi ring naw am a na?
47Pathien kuoma inthawka suok chun Pathien thu a pawm hlak; hi lei hin in pawm naw a nih, Pathien kuoma inthawka suok in ni naw leiin,” a ta.
Abraham um hmaa um tah Isu
48Chun, Judahai chun a kuomah, “Samari mi khawhri zâwl i nih kan ti kha kan ti indik ngawt a ni naw am a nih?” an ta, an dawn a.
49Isûn, “Khawhri zâwl ka ni naw ie, ka Pa ka chawimawi a ni lem; nangnîn ka hming in suksiet hi.
50Mâni mawina zawng ka ni nawh; a zawngtu le a ngaituotu mi pakhat a um a nih.
51Titakzetin, titakzetin ka hril cheu hi, miin ka thu a zâwm chun, kumkhuoin thi ni hmêl hmu naw ni,” a ta.
52Judahaiin a kuomah, “Khawhri zâwl i nih ti tuhin kan hriet tah. Abraham a thi tah, zâwlneihai leh, nangin, ‘Miin ka thu a zâwm chun, kumkhuoin thina intem naw nih,’ i ti si a.
53Kan thlatu Abraham nêkin i ropui lem am a nih? Ama khawm a thi tah, zâwlneihai khawm an thi tah; tuin am însiem leh?” an ta.
54Chun, Isûn “Mâni inchawimawi lang, ka mawi ienga ding khawm a ni nawh: ‘Kan Pathien,’ in ti, ka Pa chu, a mi chawimawitu a nih;
55nangnîn ama in hriet si nawh; kei ruok chun ama ka hriet; ‘Ama ka hriet nawh,’ ti lang nangni anga khêlhlip bawk nîng ka tih; chuongchun, ama ka hriet a, a thu khawm ka zâwm hlak.
56In thlatu Abraham kha ka ni hmu ding a ni leiin a hlim bêk bêk hlak; chun, a hmu ngei a, a lâwm hle a,” a ta, a dawn a.
57Chun, Judahai chun a kuomah, “Nang kum sâwmnga khawm la tling lo el che a, Abraham i hmu am a nih?” an ta.
58Isûn an kuomah, “Titakzetin, titakzetin ka hril cheu hi, Abraham um hma khawmin ka um,” a ta.
59Chuongchun, ama dêngna dingin lung an rût a; nisienlakhawm, Isu ân bi hmang a, Pathien biekina inthawk chu a suok ta a.
നിലവിൽ തിരഞ്ഞെടുത്തിരിക്കുന്നു:
JOHAN 8: HMOVBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
