JOHAN 4
4
Isu le Samari nuhmei
1Chun, Isûn Johan nêkin inchûktir tam lem a siem le a baptis ti Pharisaihaiin an hriet ti Lalpa chun a hriet phingleh,
2(nisienlakhawm, Isu meu chun a baptis naw a, a închûktirhaiin an baptis lem hlak),
3Judai ram chu a fe san a, Galili ramah a fe ta a.
4Chuongchun, Samari ram a fe thleng ding a na.
5 #
Gen 33.19; Jos 24.32 Chuongchun, Samari ram khaw pakhat, Sukar an ti chu a hung tlung a, Jakobin a nau Josef kuoma hmun a ipêk kâwl kha.
6Jakob tuisunsuo khawm kha chutaka chun a um. Chuongchun, Isu chu a fe sâwl leiin tuisunsuo sîra chun a ṭhung chawt a; sûn bufâk pha a nih.
7Samari nuhmei pakhat tui chawi dingin a hung a, Isûn a kuomah, “Dâwn ding mi pe rawh,” a ta.
8(A închûktirhai hlak chu fâk ding inchaw dingin khuoah an fe ta si a.)
9 #
Ezr 4.1-5; Neh 4.1-2 Chuongchun, Samari nuhmei chun a kuomah, “Nang Juda mi i na, kei Samari nuhmei ka ni si a, iengtizie am a na, ka kuoma dâwn ding i hnih?” a ta. (Judahaiin Samari mihai ieng khawm an inṭâwmpui ngai si nawh.)
10Chun, Isûn a dawn a, a kuomah, “Pathien thilpêk le, ‘Dâwn ding mi pe rawh,’ i kuoma titu hi hre la chu nangin a kuomah i hni lem ding a nih; chun, ama chun tui hring a pêk ding che a nih,” a ta.
11Chun, nuhmei chun a kuomah, “Pu, khaina iengkhawm i nei si naw a, tuisunsuo ân thûk vei leh, khâwlaia inthawkin am tui hring chu i hmu a?
12Kan pu Jakob nêkin i ropui lem am a nih? Ama chun hi tuisunsuo hi a mi pêk a, ama khawmin a dâwn a, a nauhai le a ranhai leh,” a ta.
13Chun, Isûn a dawn a, a kuomah, “Tûkhawm hi tui dâwn taphawt chu an dang châr nâwk a tih;
14tûkhawm an kuoma ka pêk ding tui dâwn taphawt ruok chu, kumkhuoin dangchâr naw ni hai, keiin an kuoma tui ka pêk ding chu, an sûngah tuihnâr hung um a ta, chatuona hringna chenin inchik dawk a tih,” a ta.
15Chun, nuhmei chun a kuomah, “Pu, chu tui chu mi pe rawh, ka dangchâr nawna ding le hi chen chena tui chawi dinga ka hung nawna dingin,” a ta.
16Chun, Isûn a kuomah, “I pasal va ko la, hitakah hung nâwk rawh,” a ta.
17Chun, nuhmei chun a kuomah, “Pasal ka nei le,” a ta, a dawn a. Isûn a kuomah, “Pasal ka nei le, i ti hi i ti dik ie;
18pasal panga i nei tah, tuta mi i nei hi i pasal a ni naw hrim a nih, hi thu hi i ti dik ie,” a ta.
19Nuhmei chun a kuomah, “Pu, zâwlnei i nih ti ka hriet tah.
20Keini thlatuhai chun hi tlânga hin Pathien chibai an bûk hlak; nisienlakhawm, nangni chun, ‘Mihriemin Pathien chibai an bûkna hmun ding chu Jerusalemah a um,’ in ti hlak,” a ta.
21Chun, Isûn a kuomah, “Nuhmei, ka thu awi rawh, hi tlânga kher naw khawm, Jerusalema kher naw khawm, Pathien chibai in bûk hun a tlung ding a ni tah.
22Nangnîn in hriet naw chibai in bûk hlak, keini chun chu kan ihriet chu chibai kan bûk hlak. Sandamna Judahaia inthawkin a hung suok ding a ni si a.
23Chuongchun, a hun a tlung ding a ni tah, tu khawm hin a tlung zing tah, chu pha chun Pathien chibai bûktu taktakhaiin thlarau le titaktakin Pa chibai bûk an tih, Pa chun chuong ang mi chu ama chibai bûktu dingin a zawng a nih.
24Pathien chu Thlarau a nih; ama chibai bûktuhaiin thlarau le titaktakin chibai an bûk ding a nih,” a ta.
25Chun, nuhmei chun a kuomah, “Messie, Krista an ti chu a hung ding a nih ti ka hriet a, ama chu a hung phaleh iengkim mi la hril a tih,” a ta.
26Chun, Isûn a kuomah, “Kei a betu che hi ama chu ka ni annâwm,” a ta.
27Chuong lai chun a închûktirhai chu an hung a, nuhmei a biek chu mak an ti hle a; nisienlakhawm, tukhawmin, “Ieng am i zawng? Iengdinga nuhmei i biek am?” khawm an ti nawh.
28Chun, nuhmei chun a tuibêl a mâksan a, khuoah a fe a, mihai kuomah,
29“Ka thilthaw taphawt mi hril peitu mi pakhat a um a, hung unla, en ta u, Krista a ni thei âwm am?” a ta.
30Chun, anni chu khuoa inthawk chun an hung suok a, a kuom tieng an pan ta a.
31Chu kâr chun inchûktirhai chun a kuomah, “Inchûktirtu, fa rawh,” an lo ti an lo ti a.
32Nisienlakhawm, ama chun an kuomah, “Bu in hriet naw fâk ding ka nei,” a ta.
33Chun, inchûktirhai chu an inbiek a, “A fâk ding miin an hung chawipêk am a ni aw,” an in ti a.
34Chun, Isûn an kuomah a hril a, “A mi tirtu dit zâwng thaw le, a sin thaw zo ding hi ka bu a nih.
35Nangnîn, ‘Bu sîkna ding thla li a la um,’ in ti a ni naw am a ni? Ngai ro, ka hril cheu hi, dâk unla, lohai en ro, tuta inthawkin sîk dingin a hmin a nih.
36A sîktu chun hlaw a hmu hlak a, chatuona hringna chena um dingin ra a sîk hlak, a tutu le a sîktu an lâwm rêl theina dingin.
37‘Pakhatin a tu a, mi dangin a sîk hlak,’ ti thu hi, chutaka chun ân dik hle a nih.
38In inrimpui naw sîk dingin ka tir cheu hi; mi dangin a thaw a, nangnîn a thawsa chu in sunzawm a nih,” a ta.
39Chun, nuhmei chun, “Ka thil- thaw po a mi hril pei,” tia ân hriettirna thu lei khan, chu khuoa um Samari mi tamtakin Isu an ring ta a.
40Chuongchun, Samari mihai chu Isu kuomah an hung a, an kuoma um dingin an ngên an ngên a; chuongchun, chutaka chun ni hni a châm a.
41Chun, mi dang tamtakin ama thu leiin an ring ve ta a.
42Chun, anni chun, nuhmei kuoma chun, “Tu zet hin chu i thu hril leia ring kan ni ta nawh; keini ngeiin a thu hril kan hriet ta a, hi mipa hi khawvêl Sandamtu a ni ngei ti kan hriet tah,” an ta.
Isûn hotu nau a sukdam
43Chun, chu ni hni hnunga chun chutaka inthawkin a suok a, Galili ramah a fe ta a.
44 #
Mt 13.57; Mk 6.4; Lk 4.24 Isu ngeiin, zâwlnei chu ama khuo tieng chun chawimawiin a um ngai nawh ti ân hriettir hlak si a.
45Chuongchun, Galili ram a hung tlungin Galili rama mihaiin an lo lâwm a, Jerusalema ruoiṭhe laia a thilthaw po po an hmu lei khan; anni khawm chu ruoiṭhenaa chun an fe ve si a.
46 #
Jn 2.1-11; 2.23 Chun, Galili rama Kana khuo, tui uoina ân changtirna kha a hung tlung nâwk a. Chun, upa tû amanih a um a, a naupa Kapernaumah a damnaw a.
47Chun, Isu Judai rama inthawkin Galili ramah a hung ti a hriet phingleh a hang fe a, a naupa zu sukdam dingin a ngên a, a thi vâng vâng si a.
48Isûn a kuomah, “Inchiknahai le thilmakhai in hmu naw chun ring tawp naw ti niu,” a ta.
49Chun, upa chun a kuomah, “Pu, ka nau thi hmain hung thla ta la,” a ta.
50Isûn a kuomah, “Fe nâwk el ta rawh, i naupa chu a dam ta ie,” a ta. Ama chun Isûn a kuoma thu a hril chu a ring a, a fe ta a.
51Chun, a fe thlâk lai zingin a suokhaiin ama an lo tuok a, “I naupa chu a dam tah,” an lo ti a.
52Ama chun an kuomah a dam phut hun lai ân dawn a. Anni chun a kuomah, “Zâni nisa inhêm chau khan a khawsik a bo tah a nih,” an ta.
53Chuongchun, a pain Isûn a kuoma, “I naupa chu a dam tah ie,” a ti lai tak chu a nih, ti a hriet ta a; chun, ama le a sûnghaiin an rêngin an ring ta a.
54Chu chu Isu Judai rama inthawka Galili rama a hung hnunga a thilmak thaw vawi hnina a nih.
നിലവിൽ തിരഞ്ഞെടുത്തിരിക്കുന്നു:
JOHAN 4: HMOVBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
