JOHN 6
6
1Cu thil hna hnu ah Jesuh cu Galili tidil, Tiberia tidil an timi ral ah a kal. 2Cuticun mizaw hna cung i hmelchunhnâk a tuahmi kha an hmuh cang caah Amah cu mi tampi nih an zulh. 3Jesuh cu tlângcungah a kai i a lamkaltu hna he cuka ah an ṭhu. 4Cubangin Lanhtâk, Judah mi Thô kha a nai cang. 5Cuticun Jesuh nih a hei cuan i mibu tampi nih an rak panh kha a hmuh, Filip sinah, “Hi hna ei awk changreu hi khawzei ta dah kan cawk hnga” tiah a ti. 6Cubia cu amah hniksaknâk caah a chimmi a si, zeitintiah a tuah hngami cu Amah nih a hngalh ko. 7Filip nih, “Mikip nih tlawmte lawng an co awk hmanh ah ngamu zahnih man changreu nih a zat hna lai lo,” tiah a leh. 8A lamkaltu lak i pakhat Simon Peter unau Andria nih, 9“Barli changreu panga le nga pahnih a ngeimi pa ngakchia pakhat hika ah a um, asinain hi tluk mitam caah zeidah a si hnga?” tiah a ti. 10Jesuh nih, “Mizapi hi ṭhutter hna u” tiah a ti. Cuhmun ah cun ramhring tampi a um. Cuticun patling hna cu an ṭhu i an tamning cu 5000 hrawng an si. 11Jesuh nih changreu kha a lâk i lawmhnâk bia a chimdih in lamkaltu kha a phawt hna, cubantukin lamkaltu nih mizapi kha an phawt hna. Nga zong kha an duh zat in an phawt hna. 12Cuticun an khim hnu ah, a lamkaltu hna sinah, “Zeihmanh tlawttlau lo dingin a ṭilfuan hi char dih u,” tiah a ti. 13Cucaah an hun char hna i barli changreu panga eitu hna ṭilfuan cu sei hleihnih khat in an char. 14Jesuh nih cubantuk hmelchunhnâk a tuahmi an hmuh tikah, mizapi nih, “Hi pa hi Profet, vawlei i a ra din cu a si taktak ko,” tiah an ti. 15Cucaah Jesuh nih Amah kha siangpahrang i hranhrâm lo in canter awkah tlaihbawh an timh ti kha a hngalh tikah, tlângcungah Amah lawng in lo diam a kal. 16Zanlei ah a lamkaltu kha tidîl ah an vung ṭum. 17Tilawngah an i cit i Kapernaum lei panh in tidîl kha tan an tim. Khua muih â tim cang i Jesuh kha an sinah a phân rih lo. 18Cuticun thli fakpi in a hrang i tilet kha a sângchin leng mang. 19Cubangin mengthum mengli hrawng an tilawng an zah hnu ah Jesuh cu tidîl cungah ke in anmah a rak panh lio kha an hmuh i an ṭih. 20Asinain an sinah, “Keimah ka si, ṭih hlah u” tiah a ti hna. 21Annih nih lunglawm tein tilawngah cit dingin an cohlân i a rauhhlanah an panhmi tidil kam kha an phân cawlh. 22A thaizingah varal lei i a dirmi mizapi nih, lamkaltu hna citmi tilawng dah tilo tilawng dang a um lo i anmah lawng an i cit i Jesuh cu â cit velo ti kha an hngalh. 23Asinain Bawipa nih lawmhnâk bia a chim dih i changreu an ei nâk pawngah khan, Tiberia khua i tilawng dang an rak phân. 24Mizapi nih Jesuh le a lamkaltu an um lo ti kha an hngalh tikah, annih zong tilawngah an i cit i Jesuh kawl in kapernaûm khua an rak phân. 25Varal khat te lei i an hmuh tikah a sinah, “Rabi, zeitikahdah hika hi na phâk?” tiah an ti. 26Jesuh nih, “Biataktein, biataktein kan chimh hna, hmelchunhnâk nan hmuh ruangah, nanka kawlmi a si lo, changreu khim tein nan ei ruangah a si. 27A rawkral khomi rawl ruah ah i phar len hlah u, Mi Fapa nih pêk an timhmi hna rawl ruah tu ah i pharlen u; zeicatiah Pa Pathian nih Amah cu a chinchiah cang. 28Annih nih, “Pathian rian kan ṭuan khawh nâkhnga, zeidah kan tuah lai?” tiah an ti. 29Jesuh nih, “Pathian rianṭuan cu hihi a si, A thlahmi zumh hi,” tiah a leh hna. 30Annih nih, “Kan hmuh i kan in zumh khawh nâkhnga, zeibantuk hmelchunhnâkdah na tuah lai? zei rian dah na ṭuan lai? 31Kan pupa hna nih ramcar ah mânâ kha an ei tawn ‘Van in an sinah changreu ei awk a pêk hna,’ tiah ṭialmi bangin,” tiah an ti. 32Jesuh nih, “Biataktein, biataktein kan chimh hna, Moses nih vanin changreu an pe hna lo, asinain ka Pa nih van in changreu taktak kha an pêk hna. 33Zeitintiah Pathian changreu cu van in ara i vawlei ah a nunnâk petu ding hi a si,” tiah a ti. 34Annih nih, “Cu changreu cu kan pe zungzal ko,” tiah an ti. 35Jesuh nih, “Keimah hi nunnâk changreu cu ka si. Ka sin i a rami pauh cu a rawl a ṭâm ti lai lo. A ka zummi pauh cu a ti a hâl ti lai lo. 36Asinain nan ka hmuh ko nain nan zum lo tiah kan chimh cang hna kha. 37Pa nih aka pêkmi vialte ka sinah an ra lai, ka sin i a rami pauh cu ka dawn hna lai lo. 38Zeitintiah mah duhnâk tuah awkah van in a rami ka si lo, aka thlahtu duhnâk tuah awkah a rami ka si. 39Hihi aka thlahtu Pa duhnâk cu a si, aka pêkmi vialte thlau loin ni dongh ni ah thawhter ding hi. 40Cun hihi aka thlahtu duhning a si, Fapa a hmu i a zummi pauh nih zungzal nunnâk ngeiseh law, cun ni dongh ni ah keimah nih ka thawhter lai,” tiah a ti. 41Van i a rungṭummi changreu cu ka si, a timi ruangah Judah mi cu a cungah an zai. 42Hipa hi Josef fapa, Jesuh a si lo maw, anu le apa zong kan theih ko hna? Van in ka rung ṭum, tiah zeitindah a ti khawh? tiah an ti. 43Jesuh nih, phunzai lengmang hlah u. 44Aka thlahtu Pa nih a hnuh hna dah tilo ahcun, ahohmanh ka sinah a ra kho lo. Cun ni hmadungbik ah ka thawhter lai. 45Profet hna cauk ah, “Pathian cawnpiak in an um dih lai,” tiah ṭial a si. Pa bia thei i a cawngmi pauh cu ka sinah an ra tawn. 46Pa a hmumi an um cang tinâk a si lo, Pathian sin in a rami lawnglawng hi Pa a hmutu um chun cu a si. 47Biataktein, biataktein kan chimh hna, aka zummi pauh cu zungzal nunnâk a ngei cang. 48Keimah hi nunnâk chungreu cu ka si. 49Nan pupa hna nih ramcar ah mana an ei i an thi. 50Hihi van in a rungṭummi changreu cu a si, minih an ei i an thih ti nâkhnga lo. 51Keimah hi van in a rungṭummi changreu nung ka si. Hi changreu a eimi pauh, zungzal in a nung peng lai. Vawlei nunnâk dingah ka pêk hngami changreu cu ka taksa hi a si.” tiah a ti. 52Judah mi kha an i al i, “Hi pa nih a taksa cu ei awkah zeitindah a kan pêk khawh lai?” tiah an ti. 53Jesuh nih, “Biataktein, biataktein kan chimh hna, Mi Fapa taksa nan ei i a thisen nan din lo ahcun, nanmah tein nunnâk nan ngei lo. 54Ka taksa a ei i ka thisen a dingmi pauh cu zungzal nunnâk a ngei cang, cun ni donghni ah a mah cu ka thawhter lai. 55Zeitintiah ka taksa hi rawl tak a si i ka thisen hi dinawk taktak cu a si. 56Ka taksa a ei i ka thisen a dingmi pauh cu keimah ah a hmun i kei zong amah ah ka hmun. 57A nungmi Pa nih aka thlah i Pa thawngin a nungmi ka si bangin, aka eitu pauh cu keimah thawngin a nung ve lai. 58Hihi vanin chungreu a rungṭummi cu a si, nan pupa hna nih mânâ an ei i an thih ṭhân bantuk kha a si lo. Hi changreu a eimi cu zungzal in a nung peng lai. 59Cu bia hna cu Kapernaûm khua i Sinogog chungah chim in a cawnpiakmi an si. 60Cucaah a zultu lakah mi tampi nih cu bia cu an theih i “Hihi a har ngai ngaimi bia a si, ahonihdah a theihthiam khawh lai?” tiah an ti. 61Cu kong ah a zultu an zailen kha Jesuh nih amah tein a hngalh i an sinah, “Hi bia nih hin lung si loin an umter hna hlah maw? 62Mi Fapa hi hlan i a rak umnâk i a kai nan hmuh tikah zeitindah nan ti kun lai? 63Nuntertu cu Thlarau a si, taksa cu san a tlai lo. Nan sin i bia ka chimmi hi thlarau an si i nunnâk zong an si. 64Asinain nan lakah cheukhat zumlotu nan um,” tiah a ti. Zeitintiah Jesuh nih Amah zum lotu hna le Amah rawitu ding kha a hramthawk in a rak hngalh cang. 65Cun a chim ṭhân i, “Cucaah dahkaw nan sinah Pa nih a pêk hna dah ti lo ahcun ahohmanh ka sinah nan ra kho lo, tiah kan ti hna kha,” tiah a ti. 66Cu cân thawk in a zultu lakah mi tampi an i zûk i Amah an kawm ti lo. 67Cuticun Jesuh nih hleihnih hna sinah, “Nannih zong kal nan duh ve maw? tiah a ti. 68Simon Peter nih, “Bawipa aho sinahdah kan kal lai? Nangmah nih zungzal nunnâk bia kha na ngei. 69Krih Pathian nung Fapa na si kha kan hngalh i kan zumh,” tiah a leh. 70Jesuh nih, “Nannih hleihnih hna hi Keimah thimmi nan si lo maw? Nan lak i pakhat khuachia a hei si rih,” tiah a ti. 71Simon fapa Judas Iskariot, hleihnih hna chung i â telmi kong a chimnâk a si, zeitintiah cupa cu Amah rawitu ding kha a si.
നിലവിൽ തിരഞ്ഞെടുത്തിരിക്കുന്നു:
JOHN 6: HAKABSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
