創世記 6
6
人類个邪惡
1人類在地上開始增加个時，也有𫱔妹仔。 2該兜稱做上帝孻仔个看到人類个妹仔盡靚，就隨意擇去做𡜵娘。 3上主講：「人既然屬肉體，𠊎个靈就毋會永遠在佢底背，所以佢个壽命可以到一百二十歲。」 4該時以後，在地上有高大个人；佢等係稱做上帝个孻仔㧯人類个妹仔所𫱔个後代，係古時代个英雄㧯名人。
5上主看到人類在地上罪惡滿滿，人人心中歸日所想个全係邪惡。 6上主道嘆佢造人在地上，心中憂傷。 7上主講：「𠊎愛對地上消滅𠊎造个人類，也愛除滅獸類、爬蟲㧯飛鳥，因為𠊎後悔造它兜。」 8總係上主歡喜挪亞。
挪亞个故事
9 挪亞个後代記在下背：挪亞係正直人，係當時一個無好嫌个人；佢㧯上帝有親密个交往。 10挪亞𫱔三個孻仔，就係閃、含㧯雅弗。 11其他个人在上帝看來係邪惡个，全地充滿兇暴。 12上帝看全世界已經敗壞，所有个人在地上所行个非常邪惡。
13上帝對挪亞講：「𠊎決定愛滅掉所有个人，因為世界充滿佢等个兇暴；𠊎愛將佢等㧯這世界共下消滅。 14你愛擇松柏樹料做一隻大船；底背愛有當多間房，外背、底背全部漆松香。 15這大船愛恁樣做：長一百三十三公尺，闊二十二公尺，高十三公尺。 16四圍愛做窗門接到船頂，高四十四公分 #6:16 「四圍愛做…公分」抑係譯做「愛做天窗，四十四公分大」。。門愛安在塍頭。大船愛有上、中、下三層。 17看啊！𠊎愛俾大水氾濫大地，消滅天下一切有生命、有血氣个生物；所有在地上个攏總愛滅掉。 18總係𠊎㧯你立約。你㧯若𡜵娘、孻仔、心舅愛入去大船。 19一切有生命个動物各一對，一公一乸，你愛帶入大船，做得在你該位保全它兜个生命。 20各種飛鳥、頭牲、地上个爬蟲，逐樣一對，愛到你該位來保全生命。 21你愛積存各種食物，來做你㧯它兜个食物。」 22挪亞就完全照上帝所吩咐个去做。
നിലവിൽ തിരഞ്ഞെടുത്തിരിക്കുന്നു:
創世記 6: THV12Hdb
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© The Bible Society in Taiwan, 2012
All rights reserved
© 台灣聖經公會版權所有 2012
