Joannostir 6
6
Džeļ, 6.
1Pošļi dava gīja lisusos pe dorīg Galileiskako moros, ane Tiveriadake rīg.
2Pal Leske gīne būt mānuša, vašo dova so dikhle dživi, saje Jov kērdža pe nasvalenge,
3Iisusos gīja pe berga, te doi bešča Peskīre sikļaibnangīrensa.
4Jāvdža Patradžin Judengo svenkos.
5Iisusos, hadija jakha te dikša, so būt mānuša javena ke Jov, rakirla Filiposke: kai menge kinas māre, sobi len čhālakiras?
6Rakirdža dava, sprobindoi les; hai Kokoro džindža, so kamdža kērel.
7Filipos otphendža Leske: lenge po dui šel dinariji najāla doša māre, sobi svakoneske lendir resel nabūt.
8Jek Leskīro sikļaibnangīrendir, Simonosko Petrisko pšal, Andreijos, phenela Leske:
9Dai isi jeke rakloreske pandž ačmeņitka māre te dui māčore; ne so dava vaš jake būtenge?
10Iisusos phendža: phenen lenge mebešen. Isis pe do štetos būt čharja. Te jake bešle mānuša giniben ko pandžvardeš šela.
11Iisusos, lel māre del porikirben, rozdija sikļaibnangīrenge, ne sikļaibnangīre bešibnangīrenge, te mače nin, ako cik, kon kamdža.
12Te kedi čhāline, togi phendža Peskīre sikļaibnangīrenge: zakeden otjačīne kuski, sobi niči nanašadžol.
13Te zakedīne, te pherdžakirde dešodui korobki kuskensa pandž ačmeņitka mārendir, so jačīne dolendir, saje hāne.
14Togi mānuša, saje dikhle dživos, kerdo Iisusosa, phendle: dava lašņes do prorokos, sajeske čhebi javel ano svetos.
15Iisusos, halija; so kamena jāven, čorahanes len Les te kēren kraļiske, noko jedženo gija pe berga.
16Kedi beļveļ jāvdža, togi Leskīre sikļaibnangīre gīne tele ko moros.
17Te, zagīne ane laiva, te mukhlepen pe dorīg moros, ane Kapernauma. Jača čemno; ne Iisusos najavdža ke jone.
18Phurdija zorali balval, te moros lija hadelpes.
19Mukhindoipes žin ko bištepandž vai trijanda staģiji, jone dikhle so javela Iisusos piro moros te paše uže ke laiva, te vistrahandīne.
20Ne Jov phendža lenge: dava Me; nastrahadžon.
21Jone kamdle len Les ane laiva; te zaras laiva dotardija ko bregos, kai mukhlepen.
22Ano vār dīves mānuša, saje isis tarde pe dorīg moros, dikhle, so doi, butir jek laivatir, an saji zagīne Leskīre sikļaibnangīre, vār naisis, te so Iisusos nazagija ane laiva Peskīre sikļaibnangīrensa, ne otmukhlepen jedžene Leskīre sikļaibnangīre.
23Te jāvdle Tiveriadatir vār laivi paše ke do štetos, kai hāne māre saje švenčakirdža Raij.
24Te jake, kedi mānuša dikhle, so doi nāni Iisusos, ni Leskīre sikļabnangīre, togi gīne ano laivi, te dodīne plima ane Kapernauma, rodindoi Iisusos.
25Te, latle Les pe dorīg moros, te phendle Leske: Ravvi! kedi Tu dai jāvdžan?
26Iisusos phendža lenge otpheniben: lašņes, lašņes rakirava tumenge: tume rodena na vašo dova, so dikhle dživi, ne vašo dova, so hāne māro te čhālīne.
27Trādentumen na vaš do haben sav šņikini, ne vaš haben, sav jačela an sajek džīben, savo dela tumen mānušesko Čhāvo; hai pe Leske čhudža peskīri pečaķ#6, 27 zeģeļa.. Dād, Dēvel.
28Te jake phendle Leske: so menge kēras, mejālas Davleskīri butin.
29Iisusos phendža lenge otpheniben: daja isi Davleskīri butin, sobi tume pačan an Doleske, Sajes Jov bičadža.
30Pe dava phendle Leske: savo Tu menge desa značuma, sobi me dikhas te pačas Tuke? so Tu kēresa?
31Dāda māre hāne manna ane čuči phu, sir opre čhindlo: māro bolibnastir dija lenge han (Psal. 77, 24).
32Iisusos phendža lenge: lašņes, lašņes rakirava tumenge: na Moisejos dija tumenge māro bolibnastir, ne Dād Mīro dela tumen čačuno māro bolibnastir.
33Hai Davlesko māro isi dova, savo jāvela bolibnastir te dela džīben svetoske.
34Pe dava phendle Leske: Raija! pode menge sajek dasav māro.
35Iisusos phendža lenge: Me isom džībnasko māro; jāvibnaskīro ke Me najāla ane bok, te pačaibnaskīro an Mange najāla slāpūšo ņigdi.
36Ne Me phendžom tumenge, so tume dikhle Man, te napačana.
37Sāro, so dela Dād Mange, ke Me dojāvela; te jāvibnaskīres ke Me navitrādava avri.
38Hai Me jāvdžom telle bolibnastir na vaš dova, sobi kērav voļa Mīri, ne voļa bičaibnaskīreskīri Man Dādeskīri.
39Voļa bičaibnaskīreskīri Man Dādeskīri isi doja, sobi dolestir, so Jov Man dija, niso nazgiņakirav, ne sāro dova opre dzangavav ano statno dīves.
40Voļa bičaibnaskīreskīri Man isi doja, sobi svako, dikhibnaskīro Čhāves te pačaibnaskīro an Leske, mejāl leske džīben sajek; te Me les opre džangavava ano statno dīves.
41Līne phučon pe Leske Judi vaš dova, so Jov phendža: Me isom māro, jāvibnaskīro bolibnastir.
42Te rakirdle: na Iisusos hobi dava, Ijosifosko čhāvo, Koneskīres dādes te da me džinas? Sir‐že Jov rakirla: Me jāvdžom telle bolibnastir?
43Iisusos phendža lenge ano otpheniben: naphučon maškir tumenge.
44Nikon našti dojāvel ke Me, keļi nadotirdela les Dād, bičaibnaskīro Man; te Me opre džandava les ano statno dīves.
45Prorokende opre čhindlo: te jāna sāre andre sikļakirde Davlestir. Svako, šunindoi Dādestir te andre sikļakirindopes, jāvela ke Me (Isaija 54, 13).
46Dava na dova, sobi kon dikhjasis Dādes, sir feņu Dova, Kon isi Dādestir; Jov dikhja Dādes.
47Lašņes, lašņes rakirava tumenge: kon pačala an Mange doleske isi sajek džīben.
48Me isom džībnasko māro.
49Dāda tumāre hāne manna ane čuči phu, te mēne.
50Māro, sav jāvela telle bolibnastir, dasav isi, kon hala les namerla.
51Me isom džīdo māro, sav javela telle bolibnastir; habnaskīro da māro jāla džīdo sajek; māro, sav Me dava, isi Mīre masa, saje Me otdava vaš svetosko džīben.
52Togi Judi līne phučon maškir penge, rakirindoi; sir Jov vašti del menge has Peskīre masa?
53Iisusos phendža lenge: lašņes, lašņes rakirava tumenge: keļi tume nahana mānušeskīre Čhāveskīre masa te napjena Leskīre rata, togi džīben an tumenge najāla.
54Kon hala Mīro mas te pjela Mīre rata doleske isi džīben sajek; te Me doles džangava opre ano statno dīves.
55Hai Mīro mas čačo isi hāben, te Mīre rata isi čačo pīben.
56Kon hala Mīro mas te pjela Mīre rata jačela sajek an Mange, te Me an leske.
57Sir Man bičadža džīdo Dād, te Me džīva druh Dādeske, te jake kon Man hala džīdo jāla druh Mange.
58Dava isi māro, javdlo bolibnastir. Na jake, sir dāda tumāre hāne manna, te mēne: kon hala da māro džīdo jāla sajek.
59Dava Jov phendža ane khangīri, sikļakirindoi ane Kapernauma.
60Būt Leskīre sikļaibnangīrendir, šunindoi dova, rakirdle: sai vārčana lava! kon vašti dava šunel?
61Ne Iisusos, džinindoi Kokoro an Peske, so sikļaibnangīre Leskīre pe dava phučona, phendža lenge: hobi dava tumen čipini?
62So, keļi tume dikhena mānušeskīre Čhāves so džala opre doi, kai isis vāgo?
63Duhos džīdo kērla; masa niso nakērna lačo. Lava, saje rakirava Me tumenge, isi duhos te džīben.
64Ne isi tumendir vār napačaibnangīre. Hai Iisusos pšeršumastir džindža, kon isi napačaibnangīre te kon pšedela Les.
65Te phendža: vaš dava rakirdžom Me tumenge, so nikon našti javel ke Me, keļi najāla dova dīno leske Mīre Dādestir.
66Da brīžatir būt Leskīre siklaibnangīrendir otgīne Lestir, te nagīne Lesa.
67Togi Iisusos phendža dešodujenge: nakamena tume nin otdžan?
68Simonos Petris otphendža Leske: Raija! ke kon me džas? Tuke isi lava sajek džībnaskīre.
69Te me pačandijam te dodžindžam, so Tu Hristos, Čhāvo džīdo Davleskīro.
70Iisusos otphendža lenge: te hobi dešodujen tumen navidikšom Me? ne jek tumendir beng.
71Dava rakirdža Jov Judostir Simonoskīre čhāvestir Iskariotostir; hai dava kamdža pšedel Les, jov isis jek dešodujendir.
നിലവിൽ തിരഞ്ഞെടുത്തിരിക്കുന്നു:
Joannostir 6: LET1933
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© British and Foreign Bible Society 1933, 2016
