Lukéstar 11
11
1Uló so uló molínelas‐pes jekhé thané, kerdí i mólba, jek amál phučél: Góspodi, sikljár‐ta amén, ta te molínas amén, sar sikljardjás pe amalén o Ivános‐da
2Phenél o Ísus: Kána molínen tumén, vakerén‐ta:
Dáda‐be amaró, kai sinján tu ándo nébos, t’ovél sfjáto to aláv, t’ovél to thagaripé. T’ovél to kamibé hem ándo nébos hem ándi phuv.
3De‐ta aménge séko diés amaró maŗó.
4Prostín‐ta aménge amaré bezexá, sostár amé‐da prostínas saoŗénge, kai isí aménge dlŭžniki. Ma igál amén ándo iskušenipé, amí t’ikerés amén e džungalibnástar.
5Thai phendjás lénge: Katár tuménde káske si jek amál, džal maškár i rat, phenél léske: De‐ta mánge, Sínko, trin maŗó;
6Sóske aló mánge jek amál, e droméstar avél, nanái mánge so te xaljaráv les.
7Ko isí andré vakerél: Butí ma‐de mánge, phanló isí o vudár, o čhavé miŗé ándo kéreveti isí, naští uxtjáv te dav túke.
8Amí te čalavél kai čalavél o vudár, phenáv tuménge, sóske isí jek amál léskoro nanái ka‐uxtjél, amá sóske sîkîldínel, ka‐uxtjél, kití mangél odovká, les kadél.
9Tuménge phenáv me‐da: Phučén‐ta, kadén tumén, róden‐ta, kaarakhjén, čalavén‐ta, kaphuterén tuménge.
10Sóske ko phučél, léske kadén, (odovká polučínel), ko ródel, arakhjél, ko čalavél, léske kaphuterén.
11Te mangés maŗó te dadéstar, kadél‐li túke jek baŗ? Ili te mangés jekhé mačhés, sapés‐li kadél.
12Ili te mangés jek aŗó, jek karavdiní kadél‐li?
13Tumé‐da, bilačé kai sinjén, te džanén, tumaré čhavénge armagánja te den, tumaró Dad ne‐li kabičhalél e Sfjatoné Duxós dáha evvél katár o nébos, odolkénge kai les mangén?
14Jekhé dženéstar trádelas o Ísus jekhé bengés, odovká‐da laloŗó sas. Avrjál kána aló, o laloŗó liljás te vakerél, čudínel‐pes o naródos.
15Amí isí džené, phenén: Čhivél e bengén, amí sar čhivél? Ne‐li avél léske zor katár o Belzevúlos, o thagár e bengéngoro?
16Isí avér džené mangén léstar katár o nébos jek znákos.
17Amá ov dikhél so si lénge ándi godí, phenél: Jek thagaripé kána isí les dúi thagár heláki ovél, jek kher kerdó kai isí uprál averé kherés, kaperél.
18E Bengéske‐da kána kárig les uxtjél o Bengk, sar‐li k’oovél o thagaripé léskoro? Sostár tumé phenén e Belzevulóskere silátar bengén čhiváv.
19Amí te čhiváv bengén e Belzevuléskere zorása, káskere zorása kerén čoká tumaré čhavé? Ol te sudínen tumén.
20Amá te čhiváv bengén e Devléskere anguštésa, thai e silása, hič te n’ovél aló tuménge o thagaripé e Devléskoro.
21Jek zoraló manúš xaŗésa, kîlîčjása arakhjél po dvóros, lačipnása‐da ačhón so si so nanái léske.
22Amí ta t’aavél léstar pó‐zoraló jek manúš, kačhinél les, so si so nanái, e xaŗésa, e čhurjása berabér sa kalél, averénge kadél odolká šéxja kai sas léske, e čhindé manušéske, edekí pakjoibé ándi zor léngeri.
23Ko nanái mántsa, odovká kárig mánde isí; thai ko mántsa nána kídel, odovká ándi balvál čhivél.
24O bišužó bengk kána íkljol katár o manúš, andé šuké thanéste sa phirél‐pes, ráhati rodindós. Amí ráhati nan’ arakhjél, phenél: Te džav‐mánge andé kheréste, kai íkljomas léstar.
25Avél, arakhjél les šulavdó, o kher šukár.
26Togái džal, avér eftén, léstar pó‐džungalé, bengén igálel, den andré, bešén. — Odolké manušéskoro háli, kití džungaló pó‐anglé sas, akaná duvár pó‐džungaló ovél.
27Phendjás; amí jek džuvlí isí maškár o naródos, vikínel, phenél:
Baxtaló isí o peŗ, kai biandjás tut, thai i čučí, thud kai dinjás tut.
28Amí odovká phenél: Pó‐lačés te phenés: baxtalé odolká kai šunén o aláv e Devléskoro, thai kánden.
29Kidisájle o naródos, o Ísus liljás te phenél: Adalké zamaniéskere manúš górke isí, jek znákos mangén, nána kapolučínen, k’oovél lénge sámo o znákos e prorokéskoro, e Jonáskoro.
30Sar‐če o Jónas jek znákos uló ko Ninevitídes, čoká k’oovél e Manušéskoro Čhavó ko manúš adalké zamaniéskere.
31Lénge ka‐uxtjél i júžna králitsa, len kasudínel, ka‐osudínel‐dani, sostár ói alí e dünjáskoro andár o agór, e Solomonéskoro godiaveripé te šunél, amí athé Solomonéstar jek pó‐baró isí.
32O Ninevitídes‐da ka‐uxtjén, len kasudínen, ka‐osudínen‐dani, sostár e Jonáskere propovedjéstar pišmáni ulé, amí athé Jonástar jek pó‐baró isí.
33Níko nána tharél e momeljá, thai pósle thovél la ándo garavdanó than, ili telál jek kutíja, amí thovél la uprál jek svéčnikos, ta te dikhén o svétos odolká kai avén.
34E trupóskoro svétos isí o jakhá. Sastó‐li isí to jak, čoká to trúpos‐da sa k’ovél ándo parnó, amí t’ovél bisastó to jak, o trúpos‐dani ándo kaló ka‐ačhól.
35Amí lačés te dikhés, o svétos kai túke andré isí, nanái‐li kalipé.
36Amí te isí o tsálo trúpos svétlo, te nanái baré jek kotór kaló andé léste, ka‐ačhól čoká sa ándo parnó, kasvetínel túke sar momelí.
37Vakerélas. Áke vikínel les jek rašái, maŗó ta te xal lésa jekhethané, mangél les. Ov‐da del andré o kher, bešél lésa, ta te xal.
38Dikhél o rašái, čudínel‐pes, sostár nána thovél‐pes o Ísus dži kai xal.
39Phenél lénge o Góspodos: Tumé rašajá, e khoréskoro agór, thai e čaréskoro agór, sa kosén, amí tuménge andré sa isí čoribé, sa bengipé isí.
40Ái tumé levavdé, ko kerdjás so andré isí, ne‐li kerdjás so avrjál isí‐dani?
41Odolkéstar so si tuménge, e čoŗénge‐da te den, thai k’oovél tuménge sa šužó.
42Bibáxt tuménge, rašajénge, sostár kerén ta thovén ondalékji uprál i mjátva, thai uprál o sedéfče thai upral sékakva drabá, thai nána dikhén o sudibé, thai o dexibé e Devléskoro. Sóske hem odovká, hem akavká trebínel te kerén.
43Bibáxt tuménge sostár mangén o nái‐šukár skémles ándi kangerí, thai te den tuménge selámi ándo fóros.
44Bibáxt tuménge, sikljardé, rašajá Farizéi, litsemértsi, sóske sinjén sar jek garavdó mímoras, nána díkhljovel, džan, nána džanén kai uprál les phirén.
45Jek zakónnikos vakerél léske: Ábe Baréja, adalká kána vakerés ne‐li amén‐da ladžavés?
46Phenél: Tuménge‐dáni, e zakonnikénge, bibáxt k’oovél, sostár ladavén e manušén továrja kai naští vŭ́zden, amí odolké tovarjén tumé e anguštjása‐da (e najésa) nána dokačínen.
47Bibáxt tuménge, kai kerén gróbnitsi e prorokénge. Odolkén mudardé tumaré dadá.
48Čačés tumé tumaré dadéngere butjénge lačés phenén, ol‐da len mudardé, amí tumé lénge mimorén kerén.
49Adavká isí o sebébi sóske čoká vakerél o godiaveribé e Devléskoro: Prorokén kabičhaláv lénge, thai rasilnikén, amí maškár len isí džené kai len kačhinén, kačhingjarén.
50Ta t’ovén mesúli akalké zamanjéskere manúš e ratéstar kai čhórdilo e prorokéndar, saoŗengeréndar, katár o načálos e dünjáskoro.
51Katár o rat Aviléskoro, dži ko rat Zaxariáskoro kai mudardó sas maškár e oltarjáte thai e kangerjáte. Va, phenáv tuménge, sa adavká kaizmangél o Del katár odovká ródos.
52Bibáxt tuménge, zakonnikénge, sostár liljén i klidí e džanibnáskeri. Hem tumé nána geljén andré, hem odolkén, kai kerénas andré ta te džan, nána mukljén.
53Phenélas čoká. O rašajá‐da lilé te kerén ta te zorljarén les vakeribnása, thai sa phučén les, tha but léstar manglé džewábja.
54Sa dikhén palál léste, amí čoká dikhén ta te šunén váreso léskere móstar, pále t’arakhjén doš andé léste.
നിലവിൽ തിരഞ്ഞെടുത്തിരിക്കുന്നു:
Lukéstar 11: ARL1912
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
