Luka 22

Ulubatiko ulwa kumughoghela u Yesu

(Mat. 26.1-5; Mlko. 14.1-2; Yoh. 11.45-53)

1 # Ukf. 12.1-27 Akabalilo aka Lusekelo ulwa Chibama ichisita chilungo, lulo bakatinji Ulusekelo ulwa Pasa kakaba papipi. 2Abaputi abasongo na bamanyisi aba Ndaghilo bakalondagha izila iya kubusyefu iyakumughoghela u Yesu pachifukwa chakuti bakanyilagha abantu.

U Yudasi akumubika u Yesu munyobe izya balwani

(Mat. 26.14-16; Mlko. 14.10-11)

3Po u Satana akinjila mwa Yudasi Sikaliyoti, yumo uwa bamanyili 12 bala. 4Po u Yudasi Sikaliyoti akabuka nukunena na baputi abasongo, sona na basongo aba balindilili aba Nyumba iya Chala nizya mumo angamubikila u Yesu kukwabo. 5Bakahoboka nkani nukwivwana nawe ukuti bakwiza pakumupa indalama 6U Yudasi akitika, sona akanda pakulonda akabalilo akiza akakumubikila u Yesu munyobe zyabo umwakusita abantu ukuzimanya.

U Yesu akubayanizizya abamanyili bache Ulusekelo ulwa Pasa

(Mat. 26.17-25; Mlko. 14.12-21; Yoh. 13.21-30)

7Bo isiku lyafika ilya Lusekelo ulwa Chibama ichisita chilungo, isiku lilyo bakaghogha umwana uwa ng'ozi uwa pachakulya icha Pasa. 8U Yesu akatuma u Pitala nu Yohani nukubabuzya ukuti, “Bukagha muyannye Ulusekelo ulwa Pasa ukuti aswe tulye.”

9Bakalalusya bakati, “Nkimba ukulonda ukuti tuluyanizizye kwiyi?”

10Akamula akati, “Bo mukwinjila mukaya akakulu nkani mukwiza pakukomana nu mwanavuli anyamuye isonta iya mizi. Mumukonke mupaka munyumba yiyo akwinjilamo, 11nukunena nu mwenenyumba ukuti, ‘Umumanyisi ukulalusya akuti nkimba ichipinda chili ko kwiyi chicho ane na bamanyili bane tukwiza pakusekelelamo Ulusekelo ulwa Pasa?’ 12Po akwiza pakubalanjizya ichipinda ichikulu chicho chili pamwanya pachamwabo, chicho chiyaniziwe kale, mulamula muyanizizyemo vyosi.”

13Abamanyili bakabuka nukwagha ivintu vyosi vili bulo mumo u Yesu akababuzizya. Po bakayannya Ulusekelo ulwa Pasa.

Ichakulya icha Mwene

(Mat. 26.26-30; Mlko. 14.22-26; 1 Kol. 11.23-25)

14Bo akabalilo kakwana, u Yesu akikala poka na batumiwa bache pabuzilo ubwakulyelapo. 15Akababuzya akati, “Nalondagha nkani ukuti indye poka namwe Ulusekelo ulwa Pasa, bo inchili pakuyimba. 16Pakuti inkubabuzya ukuti ntakwiza pakulyapo nalumolumo Ulusekelo ulu mupaka papo vyosi vyakwanilisiwa mu Bumwene ubwa Chala.”

17Po akasenda ulubako, akamupalizya u Chala nukuti, “Senda ulubako ulu mung'wele mwebosi. 18Inkubabuzya ukuti ukwandila pakabalilo aka ntakwiza pakung'wela uvinyo uyu mupaka u Chala akalindililagha Ubumwene bwache.”

19Po u Yesu akasenda ichibama, akamupalizya u Chala nukuchimenyannya. Akabapa abamanyili bache nukuti, “Ughu gho mubili wane, ghugho wapeghiwa pachifukwa icha mwemwe. Mubombaye zinizi ukuti munkumbukilayepo.” 20#Yel. 31.31-34Umwakuyana bulo, bo bamala pakulya, akabapa ulubako lula nukuti, “Ulubako ulu lyo libanda lyane ilyakusimikizya ulufingo ulwa Chala, lilyo lyatonya pachifukwa icha mwemwe.#22.20 Amasimbo ghamo aghakale ghate na mazyu agha Yesu bo amala pakunena ukuti: Ughu gho mubili wane mwivesi ilya 19 ni vesi lyosi ilya 20.

21 # Mas. 41.9 “Loli ennya. Umuntu yuyo akumbika munyobe izya balwani ali pakasi papinyu akulya poka nane. 22U Mwana uwa Muntu akwiza pakufwa ukuyana na mumo u Chala akabatikila. Loli chighune nkani nu muntu yuyo akumubika munyobe izya balwani.”

23Po bakanda pakulaluzannya benebene ukuti we wenu angabomba zinizi.

We wenu usongo?

24 # Mat. 18.1; Mlko. 9.34; Luk. 9.46 Ukudalinkana kukanda pakasi pa bamanyili ukuti we wenu we songo nkani pa bosi. 25#Mat. 20.25-27; Mlko. 10.42-44U Yesu akababuzya akati, “Abamwene aba bantu abakuzi bali na maka pa bantu babo, sona abalaghili bakulonda ukuti abantu babo babitizyanje, ‘Bamanyani aba bantu.’ 26#Mat. 23.11; Mlko. 9.35Loli ichi chite momumo chibeleye pakasi papinyu. Usongo pakasi papinyu abanje munandi, sona umulongozi abanje ngati wambombo. 27#Yoh. 13.12-15Nkimba we wenu we songo? Umuntu yuyo akwikala pasi nukulya pamo umuntu yuyo akumubombela? Naloli usongo we yuyo ali pakulya. Loli kukwinyu indi ngati ne mubombi.

28“Mwikala nane mumayimba ghane ghosi, 29ukuyana na mumo Utata wane ampeleye ubulaghili ubwakulaghilila, po nane bulo inkwiza pakubapa ubulaghili bunubu. 30#Mat. 19.28Mukwiza pakulya nukung'wela poka nane mu Bumwene bwane, sona amwe mukwiza pakwikala pa vitengo ivya bumwene pakulonga inko 12 izya ba Izilayeli.

U Yesu akunenela zila ukuti u Pitala akwiza pakumukana

(Mat. 26.31-35; Mlko. 14.27-31; Yoh. 13.36-38)

31“Simoni, Simoni! Teghelezya, u Satana amulaba u Chala ukuti amwitikizye ukuti abayele pakubapeta ngati gho malezi. 32Loli nakwiputila Simoni ukuti ulwitiko lwako lutakapotwe. Bo wapindukila sona kukwane, ubaghiye ubakazye abakamu bako.”

33U Pitala akamula akati, “Wee Mwene, niyanizye pakubuka nawe kujele nukufwa bulo poka nawe.”

34U Yesu akati, “Pitala, inkukubuzya ukuti bo ukolwe atakokolikite ubusiku ubu, ukwiza pakunkana katatu ukuti utamenye.”

Nizya kunyamula inyambi nu panga

35 # Mat. 10.9-10; Mlko. 6.8-9; Luk. 9.3, 10.4 Po u Yesu akalalusya abamanyili bache akati, “Bo nabatuma akabalilo kalakala ukusita inyambi iya ndalama, pamo iya pa bulendo, pamo inkwato, nkimba mukasobelwapo chimo?”

Bakamula bakati, “Nachimochimo.”

36U Yesu akati, “Loli ilelo umuntu wesi yuyo ali ni nyambi iya ndalama, pamo inyambi iya pa bulendo, ayisende. Umuntu wesi yuyo ate nu panga, ayighulizye inkazo yache nukughula upanga. 37#Yes. 53.12Pakuti inkukubuzya ukuti zizyo Amasimbo ghakuti, ‘Bakamongannya poka na bambibi’ zibaghiye zikwanilisiwe.”

38Abamanyili bakanena bakati, “Wee Mwene, ennya, panapa tuli nabo kale abapanga babili.”

U Yesu akamula akati, “Mpela!”#22.38 Mpela: Pamo bakwana.

U Yesu akwiputa pighamba ilya Misyunguti

(Mat. 26.36-46; Mlko. 14.32-42)

39U Yesu akafumamo mukaya akakulu nkani kala nukubuka pighamba ilya Misyunguti ukuyana na mumo akizubilila. Po abamanyili bache bakabuka poka nawe. 40Bo afika pabuzilo bula, akababuzya abamanyili bache akati, “Iputagha ukuti mutakawile munjelo.”

41Po akabuka pa butalipo papo ibwe lingafika bo akulisumba. Akafughama nukwiputa. 42Akati, “Tata wane, nanti zingabombiwa, efya ulubako ulwa ntamyo ulu kukwane. Chitakabe mumo inkulondela awe, loli mumo ukulondela.” 43Uwantumi uwa kumwanya akamubonekela nukumukazya. 44U Yesu akayimba nkani mumoyo wache nukwiputa umwakufikapo. Amafuku ghache ghakatonyela pasi ngati lyo libanda.#22.44 Amasimbo ghamo aghakale ghate ni vesi ilya 43 ni vesi ilya 44. 45Bo amala pakwiputa, akimilila nukubuka ku bamanyili bala. Akabagha baghonite utulo pakuti bakaba ni chitima nkani. 46Akababuzya akati, “Nkimba choni chicho mughonite? Nyamuka nukwiputa ukuti mutakawile munjelo.”

Bakumulema u Yesu

(Mat. 26.47-56; Mlko. 14.43-50; Yoh. 18.3-11)

47Bo u Yesu achili akunena, ichilundilo icha bantu chikafika, ichakulongoziwa nu Yudasi weka uwa bamanyili 12 bala. Akiza kwa Yesu nukumufyofyonta. 48Loli u Yesu akati, “Yudasi, naloli ukumubika u Mwana uwa Muntu munyobe izya balwani pakumufyofyonta?”

49Bo abamanyili babo bakaba nu Yesu bennya zizyo zikiza pakubombiwa, bakalalusya bakati, “Mwene, tungabombezya abapanga bitu?” 50Weka uwa bamanyili akamubola umuzya uwa Muputi Usongo nukudumula ikutu lyache ilyandilo.

51Loli u Yesu akati, “Mpela, leka.” Akalema ikutu ilya umuntu yula nukumupozya.

52Po u Yesu akababuzya abaputi abasongo na basongo aba balindilili aba Nyumba iya Chala, sona na balongozi aba Chiyuda babo bakiza pakumulema akati, “Nkimba mukwiza na bapanga ni ntughu ukuti mundeme ngati ne livyondongo? 53#Luk. 19.47, 21.37Isiku ni siku nabanga namwe mu Nyumba iya Chala, loli mutakandema. Loli akabalilo aka chisi ko kabalilo kinyu akakubombela.”

U Pitala akumukana u Yesu

(Mat. 26.57-58, 69-75; Mlko. 14.53-54, 66-72; Yoh. 18.12-18, 25-27)

54Bakamulema u Yesu nukubuka nawe kunyumba iya Muputi Usongo. U Pitala akamukonkagha pabutalipo. 55Loli bo bapemba umoto mulubinjilo, bakikala pasi nukota, u Pitala wepe akiza nukwikala poka nabo. 56Umulindu yumo uwambombo akamwennya ikaye nabo pamoto pala. Akamwenelezya nukuti, “Wepe bulo umuntu uyu akaba poka nu Yesu.”

57Loli u Pitala akakana akati, “Wee mukolo wee, umuntu uyu ntamumenye nu kumumanya.”

58Bo pachilapo akabalilo akanandi bulo umwanavuli yumo akamumanya nukuti, “Nawe bulo, we uwa bamo uwa bantu banaba.”

Loli u Pitala akamula akati, “Wee mwanavuli, inte nene!”

59Bo pachilapo sona u awala weka umuntu uyunji akiyula nkani nukuti, “Naloli, umuntu uyu akaba poka nu Yesu pakuti wepe muntu uwa mu Galileya.”

60Loli u Pitala akamula akati, “Wee mwanavuli wee, ntazimenye zizyo ukunena.”

Bo achili akunena, panapo na panapo ukolwe akakokolika. 61U Mwene akaghalabuka nukumwennya u Pitala, po u Pitala akakumbuka zizyo u Mwene akamubuzya ukuti, “Bo ukolwe atakokolikite ukwiza pakunkana katatu ukuti utamenye.” 62U Pitala akafuma kuzi nukulila nkani na masozi.

Bakumobezya nukumukoma u Yesu

(Mat. 26.67-68; Mlko. 14.65)

63Abantu babo bakamulindililagha u Yesu bakamobezya nukumukoma. 64Bakamupinya kumaso ni chitambala nukumulalusya ukuti, “Sakizya, nkimba we wenu akukoma?” 65Bakanena ivintu ivyinji ivyakumutuka.

U Yesu pamaso pa balongi

(Mat. 26.59-66; Mlko. 14.55-64; Yoh. 18.19-24)

66Bo kwacha, abalongozi aba Chiyuda, na baputi abasongo, sona na bamanyisi aba Ndaghilo bakabungana poka, po bakiza nu Yesu pamaso pa balongi. 67Bakanena bakati, “Tubuzye, nkimba awe we Kilisitu?”

Akamula akati, “Napapo ningababuzya mute munsubile; 68sona nanti nabalalusya ilalusyo, mutakwiza pakwamula. 69Loli ukwandila pakabalilo aka u Mwana uwa Muntu akwiza pakwikala kunyobe indilo iya Chala Uwamaka Ghosi.”

70Bosi bakati, “Po, nkimba awe we Mwana uwa Chala?”

Akamula akati, “Mwanena mwebene ukuti nene.”

71Po bakati, “Tutakulonda sona abakaboni abanji. Twiyivwila twebene zizyo akunena.”

നിലവിൽ തിരഞ്ഞെടുത്തിരിക്കുന്നു:

Luka 22: LMBNT2016

ഹൈലൈറ്റ് ചെയ്യുക

പങ്ക് വെക്കു

പകർത്തുക