Yohani 8

1Loli u Yesu akabuka pighamba ilya Misyunguti. 2Pandabindabi nkani akinjila sona mu Nyumba iya Chala. Abantu bosi bakamubunganila, akikala pasi nukwanda pakubamanyizya. 3Abamanyisi aba Ndaghilo naba Falisayi bakiza nu mukolo yuyo bakamulema pa bulowe nukumwimika pakasi pa bantu bosi. 4Po bakamubuzya u Yesu bakati, “Wee Mumanyisi, umukolo uyu bamulemite pa bulowe. 5#Lev. 20.10; Ukk. 22.22-24Indaghilo izya Mozesi zikalamula ukuti umuntu yunuyu aghoghiwanje na mabwe. Losi ulu awe ukuti choni?” 6Bakanena zinizi ukuti bamuteghe mukanenele, umwakuti bamususye. Loli u Yesu akinama nukusimba pasi na kafingwi kache.

7Bo balindiye bulo pakumulalusya, u Yesu akinuka nukubabuzya ukuti, “Yuyo atanangitepo nalumolumo, we yuyo andile pakumusumba nibwe umukolo uyu.” 8Po akinama sona nukusimba pasi. 9Bo bivwa zinizi, bosi bakepaghapo, wekaweka, ukwandila abasongo. U Yesu akasyala mwene nu mukolo yula, bo imiliye palapala. 10U Yesu akinuka nukumulalusya umukolo yula ukuti, “Nkimba bali ko kwiyi? Atasyalitepo nayumo umuntu uwakukususya?”

11Umukolo yula akamwamula akati, “Wee Mwene, nayumo umuntu.”

U Yesu akati, “Nane bulo ntakukususya. Bukagha, utakabombaye sona imbibi.”]#8.11 Amasimbo ghamo aminji aghakale sona nu busanusi ubwakwanda bute nu mutu uwa 8.1-11; iyamwabo yili nayo bo pachilapo u Yohani 21.24; iyinji yili nayo bo pachilapo u Luka 21.38; loli ghoka ghuli nayo bo pachilapo u Yohani 7.36.

U Yesu we lukozyo ulwa chisu ichapasi

12 # Mat. 5.14; Yoh. 9.5 U Yesu akanena sona naba Falisayi akati, “Ane ne lukozyo ulwa chisu ichapasi. Umuntu wesi yuyo akunkonka akwiza pakuba nu lukozyo ulwa bumi, po atakwiza pakwendamo nalumolumo muchisi.”

13 # Yoh. 5.31 Aba Falisayi bakanena nawe bakati, “Awe ukwisimikizya wemwene, ulusimikizyo lwako lute lwanaloli.”

14U Yesu akabamula akati, “Napapo nkwisimikizya nemwene, ulusimikizyo lwane lwanaloli pakuti imenye kuko infumite na kuko nkubuka. Mutamenyeko kuko infumite na kuko nkubuka. 15Amwe mukulonga ukuyana ni nyinong'ono izya buntu, loli ane ntakumulonga nayumo umuntu. 16Loli nanti inkulonga, ubulongi bwane bwanaloli pakuti inte nemwene, loli indi poka nu Tata yuyo akantuma. 17#Ukk. 19.15Zisimbiwe mu Ndaghilo zyinyu ukuti nanti ubwakaboni ubwa bantu babili bwayana, kokuti ubwakaboni bwabo bwanaloli. 18Nkwisimikizya nemwene, po wepe Utata yuyo akantuma, akunsimikizya.”

19Bakamulalusya bakati, “Ali ko kwiyi ughuso?”

U Yesu akamula akati, “Ane mutamenye, wepe nu Tata mutamumenye. Nanti mukamanyagha ane, ngali wepe Utata wane mumumenye.”

20U Yesu akanena amazyu ghosi ghanagha bo akumanyizya mu Nyumba iya Chala, muchipinda mumo mukaba ichakusopelamo ivyabupi. Loli atakabapo nayumo umuntu uwakumulema pakuti akabalilo kache kakaba kachili katakwanite.

Amwe mutangabukako kuko nkubuka

21U Yesu akababuzya sona akati, “Ane nkubuka, po mukwiza pakundonda, loli mukwiza pakufwa pachifukwa icha mbibi zyinyu. Mutangabukako kuko nkubuka.” 22Po abalaghili aba Chiyuda bakanena bakati, “Akunena ukuti kuko akubuka tutangabukako. Nkimba ichi chikung'anamula ukuti akwiza pakwighogha mwene?” 23U Yesu akabamula akati, “Amwe mwe bantu aba muchisu ichapasi, loli ane inkafuma kumwanya. Amwe mwe bantu aba muchisu ichapasi, loli ane inte ne uwa muchisu ichapasi. 24Ichi cho chifukwa inkababuzya ukuti mukwiza pakufwa pachifukwa icha mbibi zyinyu. Mukwiza pakufwa pachifukwa icha mbibi zyinyu nanti mutakusubila ukuti, ‘Ane Nene.’ ”

25Bakamulalusya bakati, “Nkimba we wenu?”

U Yesu akamula akati, “Chicho nababuzya ukwandila ko kubwandilo.#8.25 Chicho…ko kubwandilo: Pamo Nkimba cho choni chicho mukulonda sona kukwane? 26Indi nazyo inyinji izyakunena nizya amwe, nyinji nkani zyakubasusya nazyo. Loli yuyo akantuma wanaloli, po inkuchibuzya ichisu chapasi zyene zizyo nivuye kukwache.”

27Batakazyaghannya ukuti u Yesu akanenagha kukwabo nizya Wise. 28U Yesu akanena nabo akati, “Bo mukumupayika u Mwana uwa Muntu, panapo mukwiza pakumanya ukuti, ‘Ane Nene,’ sona mukwiza pakumanya ukuti ntakubomba nachimo nu bulaghili ubwane nu bwane, loli nkunena zyene zizyo Utata ambuzizye ukuti inene. 29Po yuyo akantuma ali poka nane. Atandekite nemwene pakuti akabalilo kosi nkubomba zizyo zikumuhobosya.”

30Bo u Yesu anena zinizi, abantu abinji bakamusubila.

Ubwanaloli bukwiza pakubasatula

31Po u Yesu akababuzya aba Yuda babo bakamusubila akati, “Mwe bamanyili bane naloli, nanti mukwivwila amazyu ghane. 32Amwe mukwiza pakubumanya ubwanaloli, sona ubwanaloli bukwiza pakubasatula.”

33 # Mat. 3.9; Luk. 3.8 Bakamwamula bakati, “Aswe twe baluko ulwa Abulahamu, tute nalumolumo bazya aba muntu yumo. Po, ukung'anamula ichoni pakunena ukuti mukwiza pakuba mwe babuke?” 34U Yesu akabamula akati, “Naloli inkubabuzya ukuti umuntu wesi yuyo akubomba imbibi, muzya uwa mbibi. 35Umuzya atakubapo nalumolumo uwa bwila na bwila munyumba, loli umwana uwa munyumba yila we wabwila na bwila. 36Nanti u Mwana akubasatula, po naloli mukwiza pakuba mwe babuke. 37Inzimenye ukuti mwe baluko ulwa Abulahamu, loli mukulonda pakungogha pakuti mukubukana ubumanyisi bwane. 38Ane nkunena zizyo nazyennya kwa Tata wane, loli amwe mukubomba zizyo ughuso ababuzizye.”

39Abene bakamwamula bakati, “Aswe utata we Abulahamu.” U Yesu akabamula akati, “Nanti mukabanga bana aba Abulahamu, ngali mukubomba#8.39 Nanti…mukubomba: Pamo Nanti naloli mwe bana…po namwe bulo bomba. imbombo zizyo u Abulahamu akabombagha. 40Loli amwe mukulonda pakungogha, umuntu yuyo ababuzizye ubwanaloli, bubo nivuye kwa Chala. Izi zite zyo zizyo u Abulahamu akabomba. 41Amwe mukubomba imbombo izya tata winyu.” Abene bakamwamula bakati, “Aswe tute twe basosi, tuli nu tata weka mpela, yuyo we Chala.”

42U Yesu akababuzya akati, “Nanti u Chala akabanga we Ghuso, ngali munganite pakuti nizite ukufuma kwa Chala, po losi ulu indi pachisu ichapasi pano. Intakiza nu bulaghili ubwane nu bwane, loli nu bulaghili ubwa yuyo akantuma. 43Nkimba choni chicho mutakuzyaghannya zizyo nkunena? Pachifukwa chakuti mutangivwisya amazyu ghagho nkunena. 44Amwe mwe bana aba Satana, po mukulonda pakukonka ivinyonywa ivya ghuso. Ukwandila ko kubwandilo umwene akaba mughoghi, sona ate nalumolumo kulubazu ulwa bwanaloli pakuti ubwanaloli mumwache butalimo. Umwene pakunena ubumyasi, cho chakulya chache pakuti umwene we mumyasi, sona we mwenecho uwa bumyasi bosi. 45Loli pakuti nkunena ubwanaloli, cho chifukwa mutakunsubila. 46Nkimba alimo weka mumwinyu yuyo angasimikizya ukuti ne mubibi? Nanti nkunena ubwanaloli, po nkimba choni chicho mutakunsubila? 47Abana aba Chala bakwivwa zizyo u Chala akunena. Loli amwe mute mwe bana aba Chala, po cho chifukwa mutakwivwisya.”

U Yesu akunena nizya Abulahamu

48Aba Yuda bakamulalusya u Yesu bakati, “Nkimba tutakunena ubwanaloli bo tukuti we Musamaliya, sona nukuti uli nu muzimu umubibi?”

49U Yesu akabamula akati, “Ane inte nu muzimu umubibi. Ane inkumuchindika Utata, loli amwe mutakunchindika. 50Ane ntakwilondela nemwene umuchizi, loli aliko weka yuyo akundondela umuchizi, sona we yuyo umulongi. 51Naloli inkubabuzya ukuti umuntu wesi yuyo akughivwila amazyu ghane atakwiza pakufwa nalumo.” 52Abene bakamubuzya bakati, “Ilelo twamanya ukuti uli nu muzimu umubibi. U Abulahamu akafwa, bope na balaghuzi bakafwa, loli awe ukunena ukuti, ‘Umuntu wesi yuyo akughivwila amazyu ghane atakwiza pakufwa nalumo.’ 53Nkimba awe we songo ukumuchila nu tata u Abulahamu yuyo akafwa? Sona bope na balaghuzi bakafwa. Nkimba ukwinong'ona ukuti we wenu?”

54U Yesu akamula akati, “Nanti nkichindikagha nemwene ngali umuchizi wane wabulo. We Tata yuyo akunchindika, yuyo amwe mwebene mukuti we Chala winyu. 55Amwe mutamumenyepo nalumo, loli ane imumenye. Nanti natinji ntamumenye, ngali ne mumyasi ngati mwemwe. Loli ane imumenye, sona nkwivwila amazyu ghache. 56Ughuso u Abulahamu akahoboka nkani bo akulindilila ukwiza kwane, po bo anyennya akahoboka nkani.” 57Abene bakamubuzya u Yesu bakati, “Wewe utafikite na maka 50, po ukunena buli-buli ukuti umwenizye#8.57 umwenizye: Amasimbo ghamo aghakale ghasimbite ukuti akabennya. u Abulahamu?” 58U Yesu akabamula akati, “Naloli inkubabuzya ukuti ane nkabako kale bo nu Abulahamu achili pakupapiwa.” 59Po bakaseba amabwe ukuti bamusumbe nagho, loli u Yesu akaleghannya nukwepamo mu Nyumba iya Chala yila.

നിലവിൽ തിരഞ്ഞെടുത്തിരിക്കുന്നു:

Yohani 8: LMBNT2016

ഹൈലൈറ്റ് ചെയ്യുക

പങ്ക് വെക്കു

പകർത്തുക