Yohani 15

U Yesu we lutabo ulwa mampesya ulwanaloli

1“Ane ne lutabo ulwa mampesya ulwanaloli, loli Utata we mulimi. 2Akudumula papane akasamba kosi kako katakwela ivikomwa, loli akupalantila akasamba kosi kako kakwela ivikomwa, umwakuti kele ivikomwa ivyinji. 3Amwe mwe bapalantiwe zila pachifukwa icha mazyu ghagho nababuzizye. 4Mubanje mumwane, po inkwiza pakwikala mumwinyu. Akasamba katangela ivikomwa pakene nanti katamamatilanite kulutabo ulwa mampesya. Namwe bulo mutangampa ivikomwa nanti mutakuba mumwane.

5“Ane ne lutabo ulwa mampesya, sona amwe mwe isamba zyache. Umuntu wesi yuyo akwikala mumwane, sona nane mumwache, akwiza pakupa ivikomwa inyinji. Pakuti ukusita ane mutangabomba nachimo. 6Umuntu wesi yuyo atakwikala mumwane akusumbiwa kuzi ngati ko kasamba nukumila. Utusamba ngati to utu bakutubungannya poka nukusumbiwa pamoto, nukochiwa. 7Nanti amwe mukwikala mumwane, ghope amazyu ghane ghakwikala mumwinyu, mukwiza pakulaba chosi chicho mukulonda, po mukwiza pakuchipokela. 8Ubuchindamu ubwa Tata wane bukulanjiziwa bo mukupa ivikomwa ivyinji. Po bunubu amwe mukulanjizya ukuti mwe bamanyili bane abanaloli. 9Ukuyana na mumo Utata anganiye, momumo nane bulo imbaghaniye. Mubanje mulughano ulwane. 10Nanti mukukonka amalamulo ghane, mukwiza pakwikalagha mulughano ulwane, ukuyana na mumo nane nivwiliye amalamulo agha Tata wane nukwikala mulughano ulwache.

11“Nababuzya zinizi ukuti ubuhobosu bwane bubanje mumwinyu nukuti ubuhobosu bwinyu bubanje bwakufikapo. 12#Yoh. 13.34, 15.17; 1 Yoh. 3.23; 2 Yoh. 5Ili lyo lilamulo lyane: Mughananaye ukuyana na mumo nane imbaghaniye. 13Nayumo umuntu yuyo ali nu lughano ulukulu nkani ukuchila ulu ulwakuti abutaghe ubumi bwache pachifukwa icha bamanyani bache. 14Amwe mwe bamanyani bane nanti mukubomba zizyo nkubalamula. 15Intakubanena sona ukuti mwe bambombo pakuti uwambombo atakumanya zizyo umwene wache akubomba. Loli nkubanena amwe bamanyani bane pakuti nababuzizye zyosi zizyo nivuye kwa Tata wane. 16Mute mwemwe mukansala awe, loli nene inkabasala amwe. Po inkabasala nukubimika ukuti mubuke nukupa ivikomwa inyinji, ivikomwa zizyo zikwiza pakubangako bwila. Sona Utata akwiza pakubapa chosi chicho mukulabila mwitabwa lyane. 17Po ili lyo lilamulo lyane: Mughananaye.

Ulubengo ulwa pachisu ichapasi

18“Nanti abantu aba muchisu ichapasi bakubabenga, po mukumbukaye ukuti bakanda pakumbenga ane, bo bachili pakubabenga amwe. 19Nanti mukabanga mwe bantu aba muchisu ichapasi, po ngali bantu aba muchisu ichapasi babaghanite amwe pakuti muli poka nabo. Loli inkabasala amwe pakasi pa bantu aba muchisu ichapasi, po mute sona bantu aba muchisu ichapasi. Ichi cho chifukwa bantu aba muchisu ichapasi bakubabenga. 20#Mat. 10.24; Luk. 6.40; Yoh. 13.16Kumbuka zizyo inkababuzya ukuti, ‘Uwambombo ate wapamwanya ukumuchila u mwene wache, awe.’ Nanti abantu bakanvwima ane, bakwiza pakubavwima namwe bulo. Nanti bakivwila ubumanyisi bwane, bakwiza pakwivwila nu bumanyisi bwinyu bulo. 21Bakwiza pakubabombela zyosi zinizi pachifukwa icha mwe bane pakuti batakumanya yuyo akantuma. 22Nanti ntakizagha nukunena nabo, ngali bate ni mbibi nayimoyimo. Loli ilelo patalipo na pabukanilo ubwa mbibi zyabo. 23Umuntu wesi yuyo ambengite, amubengite nu Tata wane bulo. 24Nanti ntakabombaghamo mumwabo imbombo zizyo nayumo umuntu yuyo akazibombamo nalumo, po ngali bate ni mbibi. Napapo ilelo bennya ivintu vivyo nabomba, loli bakwendelela pakumbenga ane nu Tata wane. 25#Mas. 35.19, 69.4Loli ichi chikabombiwa ukuti amazyu ghabo ghasimbiwe mu Ndaghilo zyabo ghakwanilisiwe ukuti, ‘Bakambenga pabusita chifukwa nachimochimo.’

26“Umwavwilizi akwiza, u Muzimu Umuzelu, yuyo akuvumbula ubwanaloli ubwa Chala, sona yuyo akufuma kwa Tata. Inkwiza pakubatumila ukufuma kwa Tata, po akwiza pakusimikizya nizya ane. 27Sona namwe bulo mukwiza pakusimikizya nizya ane pakuti mukabanga nane ukwandila ko kubwandilo.”

നിലവിൽ തിരഞ്ഞെടുത്തിരിക്കുന്നു:

Yohani 15: LMBNT2016

ഹൈലൈറ്റ് ചെയ്യുക

പങ്ക് വെക്കു

പകർത്തുക