Jọnu 6

Jisọsu l'anụ ụnu iri l'ẹbo l'ụkporo iri nri

(Mát. 4:13-21; Mak. 6:30-44; Luk. 9:10-17)

1E megelewho ya, Jisọsu tụgbua jeshia azụ eze-ẹnyimu Gálili azụ iya ọwhu, bụkwa iya whọ bụ eze-ẹnyimu Tayibíriyasu. 2Igweligwe madzụ l'awụ gidigidi etso iya nkele whẹ whụwaru iwhe-awhụrulenya, o meshiru nteke ono, o meru ndu ẹhu l'adụa mma whẹ mehuchaa. 3Jisọsu bya enyikota ẹka ono, bụ ọ-ka-l'ugvu-ugvu ono je anọdu anọdu l'ẹka ono yẹle ndu l'etso ụzo iya. 4Nteke ono bẹ oge ono, ndu Ju l'erije, l'eekuje oge O-je-ghata dụwa ntse. 5Jisọsu bya apalia ẹnya whụa lẹ ndu l'awụ abyakfuta iya ha l'igwe shii. Ọ sụ Fílipu: “?Ọo awee bẹ anyi l'a-zụta buredi tẹ ndu-a ria nri?” 6Iwhe o kwoberu kfua nno ta abụkwa l'ọ tọ madụ iwhe l'oo-me, oomelekwaa tẹ ya maadarụ iwhe Fílipu l'e-kfu.

7Fílipu sụ iya: “Mẹ l'ee-gudekwa iwhe ka ụkporo pọngu zụa buredi m'ọ -bụruwho l'ee-me t'o rwugbaru whẹ l'ọnu ilile.”

8Onye lanụ lẹ ndu ono, l'etso ụzo iya, mbụ Ánduru, bụ nwune Sáyịmonu Pyita sụ iya: 9“O nwekwaru nwata nwokoro nshịi, nọ l'ẹka-a, gude ishi buredi balị ise, ọwa ẹji ẹma labọ, o bekwanu ?ọ dụkwanu iwhe iwhe ono bụ l'ẹka igwe ọha-a nọ?”

10Jisọsu sụ whẹ: “Unu kfuru whẹ tẹ whẹ nọdu-gee anọdu l'alị.” Whẹ nọshia l'alị l'ẹka ono. Ẹka ono bẹ ụnwu irwu ẹwu dụ shii. Unwoke, nọ l'ẹka ono dụ ụnu iri l'ẹbo l'ụkporo iri. 11Jisọsu bya achịta buredi ono, bya ekelegelewho Chileke ekele, ọ bya ekeshiaru iya ndu ono, nọ l'ẹka ono. O mekwaawho ọwhube ẹma whọ nno. Onyenọnu rita rijia ẹwho iya. 12Whẹ rijishichaa ẹwho whẹ, Jisọsu sụ ndu l'etso ụzo iya: “Unu tụtukobe ụnwu ibiribe iya ọwhu whẹ riwhodoru t'ọ bọ dụ ọwhu l'a-la l'iyi.” 13Whẹ bya atụtua ụnwu ibiribe iya ọwhu shi l'ishi buredi ise ono; tụtu-jia ya nkata-ivu iri l'ẹbo, bụ ọwhu ndu ono riwhodoru.

14Ndu ono whụlewho iwhe-awhụrulenya ono, Jisọsu meru; whẹ sụ: “Ọ kwa ọkpobe-okfu l'ọo nwoke-e bụ onye nkfuchiru Chileke ọbu, l'a-bya mgboko-o!” 15Jisọsu malẹruwho lẹ whẹ l'abya iya akpụta nke ẹhuka tẹ whẹ mee ya eze whẹ, o dawhushia azụ ọdo l'ugvu ugvu who nwẹkiya.

Jisọsu l'eje ije l'eli mini

(Mát. 14:22-33; Mak. 6:45-52)

16O rwulewho l'urwẹnyashi, ndu l'etso ụzo iya tụgbua jeshia l'eze-ẹnyimu whọ. 17Whẹ bahụ l'ụgbo, ngagbụru iya eme tẹ whẹ ghabua lẹ mini ono jeshia Kapániyọmu. A nọo jeye ọchi kpua ẹhu, Jisọsu ta abyakfuta whẹ. 18Oke whẹrewhere wata ewhewhe nke ọwhu eze-ẹnyimu ono watarụ ọtu oke akpara-mini atụshi iya ike. 19Whẹ ngalẹwho ụgbo ono iwhe rwuru manyịru ẹto je l'ẹno; whẹ whụa Jisọsu gẹ l'ooje ije l'eli mini ono eje abyakụbe ụgbo whẹ. Meji tọfu whẹ. 20Jisọsu sụ whẹ: “Unu ba atsụshi egvu, l'ọ kwa-a mbẹdua!” 21Ọ bụru l'ookfuru nno meru o whede whẹ uwhere tẹ whẹ kubata iya l'ụgbo whẹ. E jia ekfu, ụgbo whẹ ono lụfuwanu l'eli-mgboko ẹka whẹ l'eje.

A dụ l'igwe achọ Jisọsu

22Ọ bya ebelewho echile iya, ndu ọwhu shi nọdu l'azụ eze-ẹnyimu azụ iya ọwhu bebe marụ l'ọo ụgbo lanụ bẹ likwaduru-a l'ẹka ono. Whẹ makwarụwho lẹ Jisọsu te etsodu ndu l'etso ụzo iya bahụ l'ụgbo nke whẹ, l'ọo ndu ono, l'etso ụzo iya tụgburu nwẹka whẹ. 23O nwekwaruwho igweligwe ụgbo ọdo, shi Tayibíriyasu byakụbe ẹka ono ntse bụ iya bụ mgboro ẹka ono, whẹ nọdu ria buredi whẹ nteke ono, Onye-Nwe-Ọha kelegeleruwho Chileke ekelewho. 24Ọo ya bụ, igwe-ọha ono whụlewho lẹ Jisọsu ta anọdu l'ẹka ono, ndu l'etso ụzo iya ta anọ iya; whẹ tụko wụba l'ụgbo chọru Jisọsu jeshia Kapániyọmu.

Jisọsu bụ nri, l'anụ ndzụ

25Whẹ chọ-vulewho Jisọsu l'azụ eze-ẹnyimu ono azụ iya ọwhu, whẹ sụ iya: “O-zhi-iwhe, ?ọ hụnu nteke ole b'i rwuru azụ iya-a?”

26Jisọsu sụ whẹ: “Iwhe mu l'eme t'o doo unu ẹnya bụ l'iwhe unu kwoberu achọ-whe mu ntaa ta abụkwa l'ọo l'unu whụru iwhe-awhụrulenya, mu meru, iwhe unu kwoberu achọ mu kwa lẹ mu nụru unu buredi, unu ria, rijia ẹwho. 27Ọwhu t'unu be esegbushihe onwunu l'anya nri ọwhu bụ ọla-l'iyi. Unu sejechia anya nri ọwhu l'a-nọ-zhiewho anụ unu ndzụ tututu-mịmimi bụ iya bụ ọwhu mụbe Abụbu-Ndiwhe l'a-nụ unu. O noo l'ọo mbẹdua, bụ Abụbu-Ndiwhe bẹ Chileke, bụ Nna meru t'e shi l'ẹka whụa ike, l'egoshi l'o noo iwhe meru yẹbe Nna sụ t'ọ bya.”

28Whẹ jị iya: “Ọo gụnu bẹ anyi l'a-nọ eme ya abụru iya bụ l'anyi l'eje ozhi Chileke?”

29Jisọsu sụ whẹ: “Iwhe ọbu, bụ ozhi Chileke bụ t'unu woru onwunu ye onye ono, Chileke zhiru t'ọ bya ono l'ẹka.”

30Ọo ya bụ, whẹ sụ iya: “Ndẹe! ?Ọo ẹgube iwhe-awhụrulenya, dụ ọdu agha bẹ l'ii-meru goshi anyi t'anyi gude ẹnya anyi whụ iya, kwetakwawho woru onwanyi ye ghu l'ẹka ọbu? ?Ndẹnu iwhe ọbu, l'ii-me? 31Lẹ nteke ndụ-ichee bẹ nna anyi ochee whẹ rikwaru nri ono, bụ mana nteke ono, whẹ nọ l'echi-ẹgu. Ọ kwa iya bụ iwhe ọbu, e deru l'ẹkwo Okfu Chileke sụ: ‘Ọ nụru anyi nri, shi l'imigwe t'anyi ria.’ ”

32Jisọsu sụ whẹ: “Iwhe mu l'akarụ unu bụ: Nri onona, Nna mu shi l'ẹka Mósisu nụ unu ono kwa nri ọwhu shi l'ọkpobe nri ọwhu shi l'imigwe. 33Nri ono, Chileke l'anụje ono bẹ bụkwa onye ono, shi l'imigwe bya, tẹmenu ọ bụru iya bụ onye l'anụje ndiwhe ndzụ.”

34Whẹ sụ iya: “Onye-Nwe-Ọha, byiko nụjenu anyi ẹgube nri onona nteke nteke.”

35Jisọsu sụ whẹ: “Ọ kwa mbẹdua l'onwomu bụ nri l'anụje ndzụ, onye byakfutaru mu nụ bẹ ẹgu l'a-byadụa l'agụbaa ọdo, ọdo bụru l'onye ono, kweru nọdu mu l'ẹka bẹ ẹgu-mini l'ẹte agụdu ọdo. 36Ọle mu kfuakwaru iya unu sụ unu l'unu whụwaru mu, obenu l'unu te ekwetadu woru onwunu ye mu l'ẹka. 37Ọle iwhe bụ ndu lile Nna mu nụru mu l'a-byakfutakota mu, tọ hẹ lẹ mu bya l'a-chịfu iwhe bụ onye byakfutaru mu nụ. 38O noo l'ọo l'imigwe bẹ mu shi bya. Iwhe mu byarụ ta akwa tẹ mu bya emee uche-obu nke onwomu, ọ kwa uche-obu onye zhiru mu tẹ mu bya bẹ mu byarụ ememe. 39Iwhe bụkwanu uche-obu onye ono, zhiru mu nụ bụ t'ọ bọ dụkwa ndu lile ono, o yeru mu l'ẹka onye ọwhu l'a-nahụ mu tuwhahu m'ọo nnanụ, gbahaa tẹ mu tụko whẹ mee tẹ whẹ tetakota gbalishihu nọdu ndzụ mbọku ikpazụ. 40O noo l'iwhe dụ Nna mu ono ree bụ t'iwhe bụ onye whụru Nwa iya, wokwaruwho onwiya ye iya l'ẹka t'onye ono nweru ndzụ tututu-mịmimi. Mu emekwaawho onye ọbu ya eshi l'ọnwu teta nọdu ndzụ mbọku ikpazụ.”

41Ọo ya bụ, ndu Ju dederu iya nwirinwiri l'ẹka ono nkele ọo l'ọ sụru: “Ọo mbẹdua l'onwomu bụ nri ọbu, shi l'imigwe bya.” 42Whẹ sụ: “?Mọ tọ nụa nwoke-e bụ Jisọsu nwa Jósẹfu, mbụ onye anyi marụ nna iya, marụ ne iya majia ya ẹnya? ?Ndẹhunu g'o meru ọ bya asụ ntaa lẹ ya shi l'imigwe bya?”

43Jisọsu sụ whẹ: “Unu be edeshiroo nwirinwiri l'ime onwunu. 44Ọ tọ dụdu onye ono bya l'a-byakfuta mu nụ, m'ọ -bụa l'ọo Nna mu ono, zhiru mu nụ kulitaru onye ọbu, nteke ono mbẹdua l'onwomu emee onye ono, ya eshi l'ọnwu teta nọdu ndzụ mbọku ikpazụ. 45Ndu nkfuchiru Chileke dekwaru l'ẹkwo sụ: ‘Ọo Chileke l'e-zhi onyenọnu iwhe.’ Iwhe bụ onye ono, nụwaru nke Nna, nọdukwawho iya whọ l'ẹka, nwụta ẹka iya, l'a-byakfuta mụbe Jisọsu. 46Iwhe mu l'ekfu ta abụkwa l'ọ dụ onye whụjebuwaru Nna ono, gbahalẹwho onye ono, bụ iya shi Chileke l'ẹka bya. Ọo yẹbedua bụ onye whụjebuwaru iya. 47Iwhe mu l'ekfuleruwho unu bụ: l'onye woru onwiya ye mu l'ẹka bẹ nọokwa ndzụ tututu-mịmimi. 48Ọo mbẹdua, bụ Jisọsu bụ nri l'anụ ndzụ. 49Nna unu oche whẹ riru nri ono, bụ mana l'echi-ẹgu, whẹ nwụhulee. 50Ọle nri ọwa, shi l'imigwe bẹ bụ nri ọwhu l'anụje ndzụ, mbụ nri ọwhu bụ: onye riru iya nụ, onye ọbu ta anwụhuhedu anwụhu. 51Ọo mụbe Jisọsu bụ nri, nọ ndzụ, shi l'imigwe bya. Onye bụ-zhia onye riru nri ono l'a-nọgbuwaruroo ndzu jeye lẹ tututu-mịmimi. Nri ono, mu l'a-nụ ono bụ anụ-ẹhu mu. Mu l'e-woru iya nụ l'iswi ẹhu ndu mgboko-o.”

52Ndu Ju tugbushide onwowhe lẹ ntụtu-ẹgo sụ: “?Ndẹe gẹ nwoke-e l'e-me nụ anyi anụ-ẹhu iya t'anyi ria?”

53Jisọsu sụ whẹ: “Tẹ mu kfua ya t'o doo unu ẹnya. Ọ -bụdua l'unu riru anụ-ẹhu Abụbu-Ndiwhe, ngụa mmee ya bẹ unu l'ete enwekwa ndzụ l'ime ẹhu unu. 54Iwhe bụ onye ono, l'eri anụ-ẹhu mụbe Jisọsu, angụ mmee mu bẹ nwewaa ndzụ tututu-mịmimi, tẹhenu mu je l'e-me onye ono ya eshi l'ọnwu teta nọdu ndzụ mbọku ikpazụ. 55O noo l'anụ-ẹhu mu kwatarụ bụru ọkpobe nri eriri, mmee mu bụkwaruwho ọkpobe iwhe angụngu. 56Onye ono, l'eri anụ-ẹhu mu, angụkwawho mmee mu nọwaa l'ime mu, mu nọdukwawho onye ono l'ime. 57Ọo Nna ono bụ iya bụ ishi ndzụ zhiru mu tẹ mu bya, ọ bụkwaru iya whọ bẹ mu kwoberu nọdu ndzụ. O nokwawho g'iwhe bụ onye ono, l'eri anụ-ẹhu mụbe Jisọsu l'e-kwobe mụbe Jisọsu ọbu nọdu ndzụ. 58Ọo ya bụ l'o noo nri ọbu, shi l'imigwe bya ndono. Ọ tọ bụdu ẹgube iya ọwhu ochee-oroke unu whẹ rigeeru, whẹ nwụhulee. Onye bụ onye riru nri-a l'a-nọgbuwaruroo ndzụ jeye lẹ tututu-mịmimi.”

59Iwhe ono bụkota iwhe Jisọsu nọdu kfushia nteke l'oozhi iwhe l'ụlo-ndzuko ndu Ju lẹ Kapániyọmu.

Okfu ndzụ tututu-mịmimi

60Ọo ya bụ, igweligwe madzụ lẹ ndu l'etso Jisọsu bya anụa iwhe ono, whẹ sụ: “Ha! Okfu ọwa l'atakwa ẹrwu lẹ nchị. Ọ t'ọ dụkwa nke anụnu.”

61Ọle Jisọsu mawarụ l'onwiya lẹ ndu l'etso iya nụ l'ede nwirinwiri l'okfu ono, ya kfuru. Ọ sụ whẹ: “?Ọo iwhe ono, mu kfuru l'eghu unu eghu? 62?Ndẹ-zhia gẹ l'ọo-dụ mẹ unu whụa Abụbu-Ndiwhe g'ọ tụgburu imeli alawhu azụ l'ẹka, o shi nọduhawaa? 63Ọo Ume Chileke l'anụje ndzụ, ọwhube anụ-ẹhu madzụ bẹ bụ iwhe mmaanụ l'ẹte adụa iwhe ọli. Okfu mu shi nkeshi-a kfushitaru unu bụkwa Ume, bụkwaruwho ndzụ. 64Ọle m'o nwekwaru ndu ọwhu l'ẹteke ekwee woru onwowhe ye mu l'ẹka lẹge unu ha-a.” O noo lẹ Jisọsu shihawaro lẹ mbụlembu marụ ndu ọwhu ọbu, l'ete ekwee woru onwowhe ye iya l'ẹka, makwarụwho onye ọwhu ọbu, l'ee-megee mee t'a kpụta iya. 65Ọ sụ: “O noo iwhe ọbu, mu kwoberu sụ unu l'ọ tọ dụdu onye fụru byakfuta mu l'abụa l'ọo Nna mu b'o shi l'ẹka.”

66Jisọsu kfugelewho iwhe ono, ọ bụru iya kpatarụ igweligwe ndu ono, shi etso iya nụ ono tsuwhuchaa azụ, whẹ te etsojehe iya. 67Jisọsu sụ ọwhube ụmadzu iri l'ẹbo ono, l'etso ụzo iya: “?Ndẹe gẹ unubẹdua l'arị iya, unu l'a-gbakashịhufua?”

68Sáyịmonu Pyita sụ iya: “Onye-Nwe-Ọha ?ọ hụnu onye ole ọdo bẹ anyi l'a-nọ agba agbakfu? Ọo gụbedua gude okfu, l'anụje ndzụ tututu-mịmimi. 69Anyi kwetaakwaa, anyi byaakwaa amarụ l'ọo ghu bụ onye ono, dụ nsọ, shi Chileke l'ẹka.”

70Jisọsu sụ whẹ: “?Tọ dụ mbẹdua gude ẹka mu họta unu, mbụ unubẹ ndu ozhi iri l'ẹbo ono? Ọle ọo onye lanụ l'ime unu gbechia bya abụru Oshifutuswe.” 71Onye l'ookfu iwhe ono ele ẹnya bụkwanuru Júdasu, bụ nwa Sáyịmonu Isukáriyọtu, o noo l'ọo Júdasu bụ onye ọbu, l'ee-megee gbaa ikumu, e gude iya, mbụ ọ bụkwaru-a onye lanụ l'ime ụmadzu iri l'ẹbo ono, l'etso ụzo Jisọsu.

നിലവിൽ തിരഞ്ഞെടുത്തിരിക്കുന്നു:

Jọnu 6: Ezaa

ഹൈലൈറ്റ് ചെയ്യുക

പങ്ക് വെക്കു

പകർത്തുക