Jọnu 12

Jisọsu b'a kwabẹru ugvu lẹ Bétani

(Mát. 26:6-13; Mak. 14:3-9)

1O wudulewho abalị ishii tẹmenu a bahụ l'ori-oge O-je-ghata ono, Jisọsu tụgbua jeshia Bétani. Bétani bụ mkpụkpu Lázarọsu bu bụ iya bụ nwoke ono, Jisọsu mejeru o shi l'ọnwu teta nọdu ndzụ. 2O rwua ẹka ono, whẹ shiaru iya nri ẹbyii. Ọ bụru Mata bụ onye ọwhu l'akwashịru whẹ nri, ọwhube Lázarọsu tsoru lẹ ndu whẹ lẹ Jisọsu tụkoru eri nri ono. 3Ọo ya bụ, Méri gbalihu je ewota akpamụ, ọ dụ mbụ mmanụ ọbu, l'eshi mkpọ, vu aswa. Mmanụ ono bụ nadụ, guru egu b'e gude mee ya. O je ewota iya bya etee Jisọsu gude ẹgbushi iya huchashia ọkpa Jisọsu ono. Mkpọ mmanụ ono tụko ụlo ono vọo kfurukfuru. 4Ọle ọwhube Júdasu Isukáriyọtu, bụ onye lanụ l'ime ndu l'etso ụzo iya, bụ iya bụ onye ọbu, l'e-bekoo mee t'e gude Jisọsu, tụfuleruwho ọnu sụ: 5“?Ndẹe iwhe meru t'e wota mmanụ ọwa je eree reta owhu pọngu lẹ pọngu iri wota keeru ndu l'amaa gẹ whẹ l'eme?” 6Iwhe Júdasu kwoberu kfua iwhe ono ta abụkwa l'ọo g'ọ bya eyebe ndu l'amaa gẹ whẹ l'eme obu. Iwhe o kwoberu ekfu iya kwa l'ọ bụ iwhuru. Ọo ya l'egudeje ẹkpa, okpoga whẹ l'adụje, l'oozhitaje iwhe e yeru iya.

7Jisọsu sụ iya: “Sefu nwanyị-a ọnu l'ẹhu, parụ iya haa t'ọ kwakọbe iwhe o gude dobe ngabẹru mbọku l'ee-li mụbe Jisọsu. 8Unu lẹ ndu l'adụa g'ọ harụ whẹ bupyabe nteke nteke, ọle mbẹdua ta abyadụ nke tẹ mu l'unu bupyabe ebupyabe.”

Idzu t'e gbua Lázarọsu

9Ọ bya ebe nteke igweligwe ndu Ju nụru l'ọo lẹ Bétani bẹ Jisọsu nọ, whẹ wụru jeshia ẹka ono. Ọ tọ lẹkwaa Jisọsu bẹ whẹ chọru jee kpụ. Whẹ jekwaruwho tẹ whẹ whụada Lázarọsu, bụ onye ono, o meru o shi l'ọnwu teta. 10Ndu ishi ndu l'agbajẹ ẹja nụ Chileke chịkwaawho idzu lẹ whẹ l'e-gbufukwaawho ọwhube Lázarọsu ono. 11Iwhe meru whẹ sụ lẹ whẹ l'e-gbufua ọwhube Lázarọsu bụ nkele ọo l'okfu ẹhu iya bẹ igweligwe ndu Ju kwoberu anashịhu ndu ishi whẹ agbakashịhu, ejekaa okweta nke Jisọsu.

Jisọsu l'abahụ Jerúsalẹmu

(Mát. 21:1-11; Mak. 11:1-11; Luk. 19:28-40)

12O rwua echile iya, ọha ono, byarụ ori-oge O-je-ghata ono nụa lẹ Jisọsu l'abya Jerúsalẹmu. 13Ọo ya bụ, whẹ gbafụta-gee, bya abakọo igu-nkfụ gude agbata iya ndzuta. Whẹ l'atụ orooroo asụje: “Ndo-o! Onye Chileke gọru ọnu-ọma b'ọ bụ, mbụ onye ono Onye-Nwe-Ọha zhiru t'ọ bya. Ajaja bụ nke Eze ndu Ízurẹlu!”

14Ọo ya bụ, Jisọsu bya awhụa nwa nkakfụ-ịgara, o nokoru iya bụ iya bụ iwhe ọbu, e deru l'ẹkwo Okfu Chileke sụ:

15“Ba atsụkwa egvu, gụbe nwada Záyọnu,

lẹ ntaa bẹ eze ghu nọokwaa l'eli nwa nkakfụ-ịgara abya.”

16Iwhe ono te eshi edoje ndu l'etso ụzo iya ẹnya lẹ mgbe mbụ. Ọle ọ bya ebelewho nteke ono, Chileke kubataru Jisọsu l'ime igwe, kwabẹ iya ugvu ka l'ugvu, whẹ gbee nteke ono rịta iwhe ono, e deru l'okfu ẹka iya. Whẹ mewaru iya iwhe ono, ẹkwo-okfu Chileke kfuru.

17Nteke ono, Jisọsu kuru Lázarọsu oku mee ya ọ nọdu-whu ndzụ azụ, shi l'ẹka ono, e liru iya fụta b'a ha l'igweligwe dọru l'ẹka ono. Ọ bụru igweligwe ndu ono bẹ kfukashiru ndu ọdo iwhe ono, nwụru nụ. 18O noo iwhe meru a habe l'igweligwe nno gbata Jisọsu ndzuta. Whẹ nụhawaru l'ọo Jisọsu bẹ meru iwhe-awhụrulenya ono. 19Ndu Fárisii l'ekfuje l'ime onwowhe asụje: “Unu awhụwaa, l'idzu anyi ọbu abadẹnu l'alị, unu lewaro gẹ mgboko owhu zelihuru awụ etso iya.”

Ndu Girísu harụ achọ Jisọsu

20Ndu shi alị Girísu harụ lịru lẹ ndu jeru ọbaru Chileke ẹja lẹ Jerúsalẹmu nteke ono, l'eeri oge ono. 21Ndu ono bya awụ-kfuta Fílipu. Fílipu bụ onye Bẹtusáyida, bụ mkpụkpu, dụ lẹ Gálili. Whẹ wukfuta iya je asụ iya: “Nwoke ibe mu ?ndẹnu gẹ l'eeme t'anyi lẹ Jisọsu whụ?”

22Ọo ya bụ, Fílipu je ekfuru iya Ánduru. Ánduru yẹle Fílipu lịru je ekfuru iya Jisọsu. 23Jisọsu sụ whẹ: “Ẹhee! O rwuwaru nteke ọbu, l'aa-whụ Abụbu-Ndiwhe l'ọdu-biribiri iya. 24Iwhe unu l'a-malẹwho bụ l'ọo gẹ akpụru witi lanụ l'adabajẹ l'alị rehu tẹmenu ya amịde, bụkwa gẹ mbẹdua nwụhuje. Mu -anwụhua bẹ mu l'a-bụkwa nkụnyi. Ọle mu -nwụhu, mu adụ g'ọo akpụru witi lanụ ono, megeeru vuta bya amịshia mebyi, bụ iya bụ l'aa-dụ l'igwe shi l'ẹka mu nweru ndzụ ọwhuu. 25Onye yeru ẹnya lẹ ndzụ iya l'e-tuwhakwa iya, ọle onye kpọru ndzụ iya ashị lẹ mgboko-o bẹ l'e-gude iya gbata ndzụ tututu-mịmimi. 26Onye bụ onye l'ejeru mu ozhi, t'onye ọbu bya etsoru mu nke ọwhu bụkwanu: ẹka, mu nọ bẹ bụkwawho ẹka onye ọbu, l'ejeru mu ozhi l'a-nọ. Onye bụ onye l'ejeru mu ozhi bẹ Nna mu l'e-yejeru ugvu.

Jisọsu l'ekfu okfu ọnwu iya

27“Sụa, ọ kwa ntaa bẹ obu l'awa mu mini. ?Ndẹe iwhe mu l'e-kfu? ?Tọo tẹ mu sụ: ‘Nna, dzọo mu l'awa ọwa’? Tụswekwa, o kwa iwhe-e l'abya ememe l'awa-a bẹ mu kwoberu bya. 28Nna menua t'a whụ ọdu-biribiri ẹwha ghu!”

Tọ dụ iya bụ l'o nweru olu, shi l'imigwe, sụru: “Mu meekwaru a whụa ọdu-biribiri ono, mu jekwanu l'e-mebaa t'a whụ iya ọdo.”

29Igwe-ọha, ono kfụkube ẹka ono nụa olu ono, whẹ sụ l'ọo igweli deru edede. Ndu harụ sụ: “Ọ kwa ojozhi-imigwe kfuru yeru iya.”

30Jisọsu sụ whẹ: “Ọo iswi ẹhu unu b'e kwoberu kfua okfu ono. Ọ tọ kwa mbẹdua b'e kwoberu kfua ya. 31Ọ kwa ntaa bẹ Chileke l'e-kpe ndu mgboko-o ikpe. Ọ kwa ntaa b'a bya l'e-chikpo ike nke onye ono bụ iya bụ ishi l'achị ndu mgboko-o. 32Nteke ono l'ee-wolilewho mụbe Jisọsu l'alị bẹ mu l'atụko onyemonye dutakota tẹ whẹ tsoru mu.” 33O kfuru nno gude goshi l'aa-kpọpyabe iya l'eli oswebe, ya anọdu l'ẹka ono nwụhu.

34Igwe-ọha ono sụ iya: “Anyi nụwaru iwhe e deru l'ẹkwo iwu whẹ sụ lẹ Kuráyisutu ọbu l'a-nọgburu jeye lẹ tututu-mịmimi. ?Ndẹe g'o gude i gbee sụ lẹ Abụbu-Ndiwhe nwụhufutaje? ?O zhia onye bụ Abụbu-Ndiwhe ọbu?”

35Jisọsu sụ whẹ: “Iwhoro ono bụfukwaa nwanshị bẹ l'ọo-dụfua l'echilabọ unu. Unu lọbakwaawho nlọba ije nteke iwhoro dụkwadu l'echilabọ unu, a nọnyaduawho, ọochi gude unu. O noo l'onye l'eje ije l'ẹkpuroochi ta amajẹdu ẹka l'oowhuku eshi eshi. 36Ọwhu t'unu kweta nke iwhoro ono nteke iwhoro ono dụkwadua swiru unu nke ọwhu unu l'a-bụ ndu bu l'ẹka iwhoro l'echi.”

Ndu Ju bụ ekwegekwe

Jisọsu kfugelewho iwhe ono, ọ lụfu l'ẹka ono je edomia onwiya, whẹ ta awhụhe iya. 37Ọo ezhi-okfu l'o mehawaru iwhe-awhụrulenya, ha l'igweligwe l'iwhu whẹ, ọle whẹ te ekwetadu l'ọo ya bụ onye ọbu, Chileke zhiru t'ọ bya ọbu. 38Ọ bụru iya bụ l'iwhe ọbu, o kfuru mbụ Ayizáya, bụ onye nkfuchiru Chileke avụkota g'o kfuru iya. Ọ sụru:

“Onye-Nwe-Ọha, ?ọo onye ngabẹ-zhiaru nchị l'iwhe anyi l'ekfu?

?Ọo onye bẹ Chileke goshiru ike shi iya l'ẹka?”

39O noo iwhe meru whẹ te ekweta. Nkele Ayizáya kfukwaruwho ọdo sụ:

40“Chileke mewaru whẹ, whẹ tsọlahaa ishi.

O mewaru whẹ, whẹ bụru obu-l'akpụ-njọ,

A nọnyadaawho, whẹ gude ẹnya whẹ whụa ụzo,

Ọriri rwua whẹ ọhu ẹwho,

Whẹ bya agbanwee lwakfuta mu tẹ mu gwọkwaa whẹ.”

41Ọo Jisọsu bẹ Ayizáya l'ekfu okfu iya ono. Iwhe o kwoberu kfua iwhe ono bụ l'ọ whụhawaruro ọdu-biribiri nkiya.

42E jia ekfu, a dụakwawho l'igweligwe kweta l'ọo ya bụ onye ọbu, Chileke yeru t'ọ bya, mbụkwa je akpaa lẹ ndu ishi kwetagekwaaru l'ọo ya. Ọle whẹ ta adụdu ike kfufuta iya nkele whẹ l'atsụnuka ndu Fárisii egvu; a nọnyadaawho e kefu whẹ l'oke sụ tẹ whẹ ba abatajẹhe ụlo-ndzuko. 43O noo lẹ whẹ ka oye ẹnya l'ọja ama ọwhu ndiwhe l'aja whẹ amamẹ ọwhu Chileke gẹge aja whẹ.

Okfu, Jisọsu kfuru l'ekpe madzụ ikpe

44Jisọsu ryaa ya aryarya sụ: “Onye ono, woru onwiya ye mụbe Jisọsu l'ẹka ta abụkwa mụbe Jisọsu bẹ onye ọbu woru onwiya ye l'ẹka, ọ kwa onye ono, zhiru mu tẹ mu bya bẹ onye ọbu woru onwiya ye l'ẹka iya. 45Onye whụru mụbe Jisọsu whụakwaru onye ono, zhiru mu tẹ mu bya. 46Mbẹdua l'onwomu byarụ tẹ mu bya abụru iwhoro l'eli-mgboko-o nke ọwhu bụkwanu onye woru onwiya ye mu l'ẹka t'onye ọbu ba anọduhe l'ẹkpuroochi. 47Onye nụ-geru-a iwhe-e mu l'ekfu-a, onye ono te emehe iya ememe, mu te ekpekwa onye ono ikpe, o noo lẹ mu ta abyadụ okpe ndiwhe ikpe. Iwhe mu byarụ bụkwa tẹ mu dzọta ndiwhe. 48Sụa, onye ono jịkaru mu nụ, onye ono te ekwe nata iwhe mu l'ekfu bẹ nwekwaruro onye l'ekpe iya ikpe. Ọo okfu ono, mu kfuru l'a-bụ onye ikpe iya lẹ mbọku ikpazụ. 49O noo nkele ọ tọ bụdu ike nkemu bẹ mu gude ekfu iwhe mu l'ekfu. Ọo Nna ono, bụ iya zhiru mu, mu bya bụ onye karụ mu iwhe mu l'e-kfu, kakwarụ mu whọ gẹ mu l'ekfu iya. 50Mu makwarụwho l'iwhe ono, ọ sụru tẹ mu kfua bẹ l'anụje ndzụ tututu-mịmimi. Ọo ya bụ l'iwhe bụ iwhe mu l'ekfu bẹ bụlewho iwhe Nna sụru tẹ mu kfua bẹ mu l'ekfu.”

നിലവിൽ തിരഞ്ഞെടുത്തിരിക്കുന്നു:

Jọnu 12: Ezaa

ഹൈലൈറ്റ് ചെയ്യുക

പങ്ക് വെക്കു

പകർത്തുക