Jọnu 11

Ọnwu Lázarọsu

1O nweru nwoke lanụ ọbu, ẹwha iya bụ Lázarọsu, bụ onye Bétani. Nwoke ono bẹ ẹhu l'adụdua mma. Bétani bụ mkpụkpu Méri yẹle nwune iya nke nwanyị, bụ Mata bu. 2Méri-a bụ nwanyị ono, mekochaaru wota mmanụ, l'eshi mkpọ bya etee Onye-Nwe-Ọha l'ọkpa iya whẹ ẹbo gude ẹgbushi dụ iya l'ishi huchashia ye ya. Ọ bụru nwune iya nke nwoke ono, bụ Lázarọsu bẹ ẹhu guderu.

3Ọo ya bụ, unwune iya nke nwanyị whẹ zhia ozhi t'e zhia Jisọsu l'ọnya iya ono, o yeru obu bẹ ẹhu l'eme.

4Jisọsu nụle iya whọ; ọ sụ: “Ẹhu ono, l'eme Lázarọsu te emetakwa iya nke anwụhu. Ọ kwa iwhe l'e-gude kwabẹ Chileke ugvu, eshikwa iya whọ jaa Nwa Chileke ajaja.”

5Jisọsu yenukaru Mata obu mẹe nwune iya nke nwanyị mẹe Lázarọsu. 6Ọo ya bụ, Jisọsu nụlewho lẹ Lázarọsu daburu l'ẹhu; ọ kpọo nwụkfu nọfua abalị labọ l'ẹka ono, ọ nọ. 7E megelewho, ọ sụ ndu l'etso ụzo iya: “Unu t'anyi dawhu azụ lẹ Judíya.”

8Ndu l'etso ụzo iya sụ iya: “O-zhi-iwhe m'ọ bụ-wokwaa ntaa bẹ ndu Ju shi eme tẹ whẹ gude ẹwhuru tugbua ghu. ?Ọo ya b'ị sụru l'iidawhu azụ l'ẹka ono ọdo?”

9Jisọsu sụ: “?Tọ dụ awa iri l'ẹbo bẹ dụ l'eswe ujiku lanụ? Onye ono, l'eje iwhe l'echi-eswe ta akpokutajekwa iwhe daa, o noo l'onye ono gude iwhoro nke eli-mgboko-o awhụ ụzo. 10Ọle onye l'eje ije l'ẹnyashi l'akpokutaje iwhe daa nkele iwhoro ono ta adụdu iya l'ẹhu.” 11O kfugelewho iwhe ono, ọ sụ whẹ: “Ọnya anyi Lázarọsu bẹ mgbẹnya rwekotaakwaru, ọle mu l'e-jekwaa je ekutee ya lẹ mgbẹnya ọbu.”

12Whẹ sụ iya: “Onye-Nwe-Ọha, ọ -bụru l'ọo mgbẹnya bẹ l'ooku bẹ l'oo-mehuakwaro nteke o tehuru.” 13Ndu l'etso ụzo iya gbẹenu nọdu g'ọo mgbẹnya mmaanụ bẹ Lázarọsu l'eku. Ọle iwhe Jisọsu l'ekfu nteke ono bụ l'ọ nwụhuwaru anwụhu. 14Tọ dụ iya bụ lẹ Jisọsu ekfuru whẹ iya kajaa ya akaja sụ whẹ: “Lázarọsu nwụhuakwaru. 15Ọ kwarọ iswi ẹhu unu bẹ meru ẹhu l'atsọ mu ụtso lẹ mu ta anọdudu l'ẹka ono. Ọo iwhe ono l'e-me t'unu kweta, ọle ọbu, unu gbashi t'anyi jekfu iya.”

16Tọ́mosu, bụ onye l'eekuje Ejima sụ ndu gẹ whẹ tụkoru etso ụzo Jisọsu: “Unu t'anyi tsokwaru Onye-Nwe-Ọha jee nke ọwhu anyi l'iya l'a-nwụhukota l'ẹka lanụ.”

Jisọsu l'onwiya bụ oteta l'ọnwu bụru ndzụ

17Ọo ya bụ nteke Jisọsu byarụ, ọ whụa lẹ Lázarọsu b'e gbee liwanu, ọ nọ-kwewanu idzu l'ilu ono. 18Bétani bẹ dụkubekwaa Jerúsalẹmu ntse. Iwhe ọ bụ bụlewho iwhe ha g'ọo manyịru labọ m'e -shi Jerúsalẹmu. 19O noo iwhe meru ndu Ju ha l'igweligwe byakfuta Mata yẹle Méri tẹ whẹ bya awhụaru whẹ imiko nke nwune whẹ ono, nwụhuru nụ.

20Mata nụlewho lẹ Jisọsu l'abya; ọ gbaje iya ndzuta. Méri nọduro l'ụlo nteke ono. 21Mata sụ Jisọsu: “Onye-Nwe-Ọha, ọ -bụ l'ọo iwhe l'ị nọ l'ẹka-a mẹ nwune mu nwoke ono tẹge anwụhukwa. 22Mbụkwa mẹe ntaa bẹ mu malẹkwaru-a l'iwhe bụ-zhia iwhe ị sụru tẹ Chileke meeru ghu bẹ l'oo-melekwaru ghu-a iwhe ọbu.”

23Jisọsu sụ iya: “Nwune ghu nwoke l'e-tetakwa-a nọdu ndzụ ọdo.”

24Mata sụ iya: “Mu makwarụ-a l'oo-teta nọdu ndzụ ọdo mbọku ikpazụ nteke madzụ l'e-shi l'ọnwu teta nọdukota ndzụ”.

25Jisọsu sụ iya: “Ọo mbẹdua bụ onye ọbu l'emeje ndu nwụhuru anwụhu whẹ eteta, mu anụ whẹ ndzụ. Iwhe bụ onye woru onwiya ye mu l'ẹka l'a-nọdu ndzụ, e behuduru onye ọbu nwụhu anwụhu. 26Tẹmenu iwhe bụ onye nọ ndzụ woru onwiya ye mu l'ẹka ta abyadụ l'a-nwụhu anwụhu jeye lẹ tututu-mịmimi. ?I kweru l'okfu mu ono, tẹ ti kwetadu?”

27Mata sụ iya: “Ee-e! Onye-Nwe-Ọha, lẹ mu kwekwaru-a l'ọo ghu bụ Kuráyisutu ọbu, bụ Nwa Chileke bụ iya bụ onye ọbu, l'a-bya lẹ mgboko-o.”

Ẹnya-mini ghakahụru Jisọsu l'ẹnya

28Mata kfugelewho nno, ọ bya alaa je ekucha nwune iya Méri ekucha, dzụaru iya ndzụdzuka sụ iya: “O-zhi-iwhe nọkwa l'ẹka-a, mbụ l'ookukwa ghu oku.” 29Ọ nụle iya whọ, o zhilihulekwawho lọbaru jekfushia Jisọsu. 30Nteke ono bẹ Jisọsu l'ẹteke abatakwaanụ m'ọo l'ime mkpụkpu ono. Ẹka, ọ nọ bụkwaduro l'ẹka whọ Mata jekfuru iya. 31Ndu Ju ono, whẹ lẹ Méri nọ l'ụlo whẹ l'aadụ iya obu ono wụfuta, wutsoru iya gẹ whẹ whụru g'o zhilihuru kfụfu etezhi. Whẹ gbee nọdu nụ gẹ l'oojewaa l'ilu ono ọorya ẹkwa l'ẹka ono.

32Ọo ya bụ, Méri byarwutalewho ẹka ono, Jisọsu nọ; ọ bya awhụle iya whọ, ọ bya arwezhita iya lẹ mgboro ọkpa sụ iya; “Onye-Nwe-Ọha, ọ -bụ l'ọo iwhe l'i nọduhawaa l'ẹka-a mẹ nwune mu nwoke tẹge anwụhukwa.”

33Jisọsu whụlewho Méri gẹ l'ọorya ẹkwa mẹkwawho gẹ ndu Ju whẹ lẹ Méri ọbu lị tụkoru aryakaa ẹkwa, ẹhu ghulahaa ya eghu, iwhe ono l'atsụkwa iya whọ l'ẹhu atsụshi iyẹ ya ike. 34Ọ sụ whẹ: “?Ọo l'awee bẹ unu liru iya?”

Whẹ sụ iya: “Onye-Nwe-Ọha, bya bya awhụ ẹka ọbu.”

35Ẹnya-mini ghakahụ Jisọsu l'ẹnya. 36Ọo ya bụ: ndu Ju sụ: “Oowa-ee! Unu lewaro g'o yeberu Lázarọsu obu.”

37O nweru ndu ọwhu harụ sụ: “?Ọ fụtaru lẹ nwoke-e meru onye l'atsọ ishi, ọ whụlahaa ụzo tẹge adụdu ike mee Lázarọsu t'ọ bọ nwụhushi?”

Jisọsu l'eme tẹ Lázarọsu shi l'ọnwu teta gbalihu

38Anwụhu Lázarọsu ono ghulahaa Jisọsu eghu ọdo, ọ tụgbua jeshia l'ilu ẹka ono, e liru Lázarọsu. Ilu ọbu bẹ bụ ọgba, e gudekwawho eze-ẹwhuru swichia ọnu iya. 39Jisọsu sụ: “Unu swifu eze-ẹwhuru ono.”

Ọo ya bụ: Mata bụ iya bụ onye ọbu, nwune iya nwụhuru ọbu sụ iya: “Onye-Nwe-Ọha mẹ ntaa bẹ l'ọo-nọokwanu eshi nshi. M'ọ kwarọo ntanụ bụ idzu-a b'e liru iya.”

40Jisọsu sụ iya: “?Mu ta asụdu ghu l'ọ -bụru l'i kwetaru, bẹ l'ii-gude ẹnya ghu whụ lẹge Chileke gude egoshi gẹ ya dụ-be biribiri.” 41Ọo ya bụ lẹ whẹ abya eswifu ẹwhuru ono; Jisọsu bya apalia iwhu imeli sụ: “Nna, mu l'ekele ghu ekele nkele ị nụwaru olu mu. 42Mu makwarụ-a l'ọ tọ dụdu nteke l'ịiti nụje olu mu. Ọle ọo iswi ẹhu ndu-a kfụkube ẹka-a bẹ mu kwoberu ekfu ọwa nke ọwhu whẹ l'e-kweta l'ọo ghu-a zhiru mu tẹ mu bya.” 43O kfugelewho nno, ọ ryashịa ya ike sụ: “Lázarọsu; fụta l'ẹka ono.” 44Nwoke ono, nwụhuru anwụhu bya afụta yẹle ẹkwa ọcha ono, e gude whuchia ya ẹka mẹe ọkpa mẹe ẹkwa-odzu ọwhu e gudekwawho whuchia ya iwhu. Jisọsu sụ whẹ: “Unu tọshia ya iwhe ono haa ya t'ọ lashia.”

Idzu nke t'e gbua Jisọsu

45Igweligwe ndu Ju ono, wutsoru Méri bya egude ẹnya whẹ whụa iwhe ono, Jisọsu meru, whẹ kweta nkiya. 46Ọle o nweleru-a ndu ọwhu jekfuru ndu Fárisii je akọoru whẹ iwhe ono, Jisọsu meru. 47Tọ dụ iya bụ lẹ ndu ishi ndu l'agbajẹ ẹja nụ Chileke mẹe ndu Fárisii abya akpakọo ọgbo-ikpe, l'etsoje whẹ ekpe ikpe sụ: “?Ndẹe g'anyi l'e-me iwhe-e? Nwoke-e l'emeshinukakwa igweligwe iwhe-awhụrulenya. 48Ọ -bụru l'anyi haa ya t'o meje iwhe-e l'oome, bẹ madzụ lile l'a-tụkokwa kwetakota nkiya, ndu Romu l'a-byakwa atụko eze-ụlo anyi-a mẹe mba anyi l'owhu lwụa ọlwu-ọchi.”

49Ọle onye lanụ l'ime whẹ, ẹwha iya bụ Káyafasu bụ iya bụ onye ishi ndu l'agbajẹ ẹja nụ Chileke nke awha ononalanụ bẹ sụru whẹ: “Unu ta amakwa iwhe ilile. 50?Unu ta amadụ l'ọo-karụ unu mma t'onye lanụ nwụhu-chiaru ndu Ju l'owhu, amamẹ l'onye lanụ nọ ndzụ; ọha l'owhu tụko bụru kpurupyata?” 51Ọ tọ bụkwa iya gude ike nke onwiya kfua okfu ono, ọle eshi ọ bụ iya bụ onye ishi ndu l'agbajẹ ẹja nụ Chileke nke awha ono b'ọ whụru lẹ Jisọsu l'e-bekochaa nwụ-chiaru ọha l'owhu ọnwu. 52Mbụ ọ tọlekwaa ọha nwẹkiya bẹ l'ọo-nwuchiru ọnwu, ọle ọ kwawhọ nggẹ o shi nno chịkobe ụnwu Chileke ono, gbakashịhuru dzuru mgboko-o tẹ whẹ bụru nnanụ.

53Ọo ya bụ, ndu ishi ndu Ju shiwaro eshi mbọku ono chịlahaa idzu gẹ whẹ l'e-shi kpanyia ya ẹnya. 54Ọo ya bụ iwhe meru Jisọsu ta akpahẹ ntụsaru-ẹhu l'echi ndu Ju. O shi l'ẹka ono tụgbua jeshia alị ọbu, dụkube echi-ẹgu, je abahụ lẹ mkpụkpu ọbu, dụ l'ẹka ono, l'eekuje Ífuremu. Ọ laa ẹka ono je anọdu yẹle ndu l'etso ụzo iya.

55Nteke ono bẹ oge O-je-ghata ndu Ju tẹwaru l'ukfu. Igweligwe madzụ shichaa l'alị ndu Ju jeshia Jerúsalẹmu eje emeedaa nsọ ọsafu onwonye mmerwu tẹmenu abahụ lẹ oge ono. 56Whẹ tụko elewhe ẹnya Jisọsu. Whẹ dzukolewho l'eze-ụlo Chileke; whẹ l'ajịkaa ibe whẹ: “?Ndẹe gẹ unubẹdua l'arị iya? ?Ọ dụ unu gẹ l'ọo-bya ori-oge-e?” 57Ndu ishi ndu l'agbajẹ ẹja nụ Chileke mẹe ndu Fárisii kfuwaru iya kepyaa ya akụ, sụ l'ọ -bụru l'ọ dụ onye marụ ẹka ọ nọ, t'onye ọbu mee tẹ whẹ marụ nke ọwhu whẹ l'e-je egude iya.

നിലവിൽ തിരഞ്ഞെടുത്തിരിക്കുന്നു:

Jọnu 11: Ezaa

ഹൈലൈറ്റ് ചെയ്യുക

പങ്ക് വെക്കു

പകർത്തുക