ATÜTSAR 9
9
Saküüwuowa nüh Noah Sie Kütsathuozhü
1 #
Atü 1.28. Saküüwuowa nüh Noah thi ma tsari tsiatsü nü küüza, avi peluo thi saküzhi luo, thi azhihwa saküpro luo. 2Azhih vü asa aveh, amürhü vü prükütse amüwa aveh, azhih vü zhukütse aveh thi juhküji vü anga aveh noh krü thi ngo naveh, thi jümari tü noh ke vü thsemthuoh. 3Rho nü küngah küveh aveh vi noh shie sanaveh; hi nüh are kümzhiri vi noh tsüküm kümjie hi nüh zanyo aveh vi noh tsümthuoh. 4#Lev 7.26,27; 17.10-14; 19.26; Kho 12.16,23; 15.23. Thitü noh mütsa tüm üti küsa küsü thuoüji asa vü azüh penyie nü mütsa tümluo, jüma thuoüji azüh. 5Nohri kürholi zühwa tü hi nüh chieke nü vi wie naveh; asa aveh azüh thi anyira züh hi nüh vi naveh, nyi küsüküsü nga anyira züh küthü thuoüji, anyiri nüh ma züh küüthü le wie naveh; küpakenühnyunü anyiri küsa tü Saküüwuowa nüh ma mpa ma kümjie vünüh saküsa kenüh. 6#Tse 20.13; Atü 1.26. Küsüküsü nga anyira züh küthü thuoüji, anyiri nüh ma züh küüthü le wie naveh; küpakenühnyunü nyiri küsa tü Saküüwuowa nüh ma mpa ma kümjie vünüh saküsa kenüh.
7 #
Atü 1.28. Thi noh thuoüji avi pe luo thi saküzhi luo, azhih vü saküjesie luo thi saküzhi luo, ti küza
8Jüsevü nga Saküüwuowa nüh Noah thi ma tsa ma sie kütseri vü, 9“Halie, hi nüh noh thi noh küshuküra noh sevü kütseri vü, 10thi noh vü pehküveh rhoküveh asa ri aveh vü: amüwari vü, ase-ashuhri vü, azhih vü noh vü pehküveh ajuhie lovü nüh shuküruri aveh vü kütsathuozhü sanaveh. 11Hi nüh eh kütsathuozhü saküveh thuoüji juhküji ru nü asazüh küsü nga müküzorie rathuoh, thi juhküji ru le nü azhihwa müküzorierale thuoh,” ti küza. 12Jü sevü nga Saküüwuowa nüh, “Thsoshi hama tü hisü thi kürholi saküsa noh vü pehküveh aveh atüvü küru wuhleri aveh kenüh kütsathuozhü küsü: 13Hi nüh eh mote akülu vü küücha naveh, thi jüma nüh azhihwa hisü azhie vü kütsathuozhü küüsanaveh. 14Hi nüh azhih nyiehvü akülu küüshu vü thi akülu vü mote küngu vü, 15hisü azhievü thi asa kürholi saküsa aveh vü eh kütsathuozhüwa müshe naveh, thi ajuh tü küji le nü kürholi aveh küüzorie nta küsalewa nyuthuoh. 16Amotewa akülu vü peh thuoüji hi nüh jüma no nü Saküüwuowa thi azhih vü peh küveh kürholi saküsa asa aveh azhievü küsuokürho kütsathuozhüwa müshe naveh,” ti küza. 17Saküüwuowa nüh Noah vü, “Kütsathuozhü thsoshi hamatü hi thi azhih vü kürholi aveh azhievü saküsawa,” ti küza.
Noah thi Ma Tsatori
18Noah atsa juhie lovü nüh shuküwari thuoüji: Shem, Ham thi Jafet. Ham thuoüji Kanan apa. 19Hamari küche tü Noah atsa; thi mari küche vünüh azhihwa tü anyiri prora.
20Noah tü azhih kürohkütsa pokhuwa, ma nüh rhelivi zhuh kütsakhuwa; 21ma nüh rhelivi khah zhu nü müshe taji thsümnyi müsanüh ma juhthsüzheh lovü zehpeh. 22Thinü Ham, Kanan apa nüh ma pa anyiju zehküveh ngu nü alievü nüh ma nü künyi vü küza. 23Thinü Shem thi Jafet masü nüh athsü vi nü masü safü rügivü shoküta nü kümse lehwuovü nüh tsetu nü ma pa anyiju zeh küveh hietetü; masü anyiehtü masü apa vü müküüprüke kenüh masü tü masü apa satsaju zehküveh müngu nüh sa. 24Noah tü ma khah vünüh asethsüra le nü küsühra vü ma tsa riepewa nüh ma vü mowa sanüh thsüra,
25Ma nüh:
“Kanan vü kümzü waluo,
ma tü ma jienüra tükha nyiehvü tükhawa saluo,” ti küza.
26Ma nüh küüzale hü,
Vüwa eh Saküüwuowa nüh tsia Shem tsüluo;
thi Kanan tü ma tükha küüsaluo.
27Saküüwuowa nüh Jafet saküji tsüluo,
thi ma tü Shem juhthsüzheh lovü küürholuo;
thi Kanan nüh ma tükha küüsaluo, ti küza.
28Juhküji ru küm sevü Noah tü mahvi müzaküche nü tünyieke rho. 29Noah nüh kürho mahvi aveh küsaji müzatüguh nü tünyieke rho nü süm.
നിലവിൽ തിരഞ്ഞെടുത്തിരിക്കുന്നു:
ATÜTSAR 9: POCHBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
