LUKA 22
22
Jisua that rang tlia an phan
(Mat.26:1-5; Mk.14:1-2; Joh.11:45-53)
1Khante, Bairiam Kût, Kalkan Kût an iti ngai khah a hong nâi tâk a.#Fes.12:1-27. 2Thiampu lalhei neh Dân inriseituhei khan mipui an ṭi sikin inrûkka Jisua an that rang dan an zong tâk a.
Judan Jisua inman a tum
(Mat.26:14-16; Mk.14:10-11)
3Kôilôm Sômleiinikahei lâia tep Juda Iskariota an iti ngai sungah khan Soitana a lût a. 4Khanchu, a va fe a, thiampu lalhei neh ulianhei ziangah Jisua ân man rang tlia a va sîrpui tâk a. 5Anni khah an lei lôm ok a, sum ipe an inkung a. 6Juda khom khan â ham a, mipui riatno kâra inmanna rang zoron ṭum a zong tâk a.
Kalkan Kût ruai an inrifûk
(Mat.26:17-25; Mk.14:12-21; Joh.13:21-30)
7Khante, Bairiam Kût nikhua, Kalkan Kût berate an that ngai nikhua khah a hong tlung a. #Fes.12:18-20; Dn nik.16:5-8. 8Khanchu, Jisuan Kalkan Kût ruai inrifûk rangin Petera neh Johana khah a tir a.
9Khante, anni khan a ziangah, “Takâm inrifûk unlang ni nuam?” an ti a.
10An ziangah, “Khopui nin lût kaneh, mi bêla tui ichôi tong nin ta, a lûtna inah zui thal rei. 11Khanchu, inchongpu ziangah, ‘Minriseitun, ki kôilômhei neh Kalkan Kût kin fâkna rang chontan khah taktiang im a ti,’ ti rei. 12Khanchu, ani khan chuanchung chontan rizat tak, neinun om isa nangni inmûng a ta, amakhan Kalkan Kût ruai chu inrifûk rei,” a ti a.
13Khante, an fe a, an zianga a ti lam angkah takin an va mu a, Kalkan Kût ruai chu an inrifûk tâk a.
Pumapa Zânbu
(Mat.26:26-30; Mk.14:22-26; 1 Kor.11:23-25)
14Khante, a fâk zoro a hong nitin chu a Kôilômhei ziangah khalai arkhîl tâk a. 15An ziangah, “Ki tuang man hi Kalkan Kût ruai hih nangni fapui kî nuam tak tak a nit. 16Nangni ke ril, Pathian Ramah a tak tak a tlung mâkah chu fah khâi no ning e,” a ti a.
17Khanungchu, kilât a lâk a, Pathian ziangah lômthu â sîr zoiin, an ziangah, “Amahih lah unla, in rei. 18Nangni ke ril, atûna rithoka Pathian ram zuang tlung mâkah chu hi uain hih in khâi no ning e,” a ti a.
19Khanungchu, ibai a lâk a, Pathian ziangah lômthu â sîr zoiin a khoi a, an ziangah a pêk a, “Amahih ki taksa, nin ta ranga pe chu a nit; nin ne riatmaina rangin tho ngai rei,” a ti a. 20Zânbu an fâk zoiin chu khangkah vangin kilât khah a lâk a, “Ama kilât hih Pathian thuthlung thar, ki thisena namindet, nin ta ranga bun suak chu a nit.#Jer.31:31-34.
21“Khannisela, en ta u, nen mantu rang khan hi khalai hih a ne iotpui a nit. 22Pathian inkung lam angkan Miriam Naipa hih thîng a ti; nikhomseh, ân mantu chung chu a înkhôk a nit,” a ti a.
23Khanungchu, an lâia tukhôk tak im khangkana tho rang khah ai nit rang tâk itin an ridon risak a.
Tûm â roinpui tak
24Khante, kôilômhei lâiah a tukhôk tak im â roinpui taka be rang iti risêlna a om a.#Mat.18:1; Mk.9:34; Lk.9:46. 25Jisuan an ziangah, “Jentail rênghei chu an mihei chungah an inlal tak tak ngai a, richam ineihei lakin chu ‘Mipui rualhei,’ #22:25 ‘Thiliṭha thotua’ iti thei a nit. iti riminghei an ribe ngai a.#Mat.20:25-27; Mk.10:42; Joh.13:3-16. 26Khannisela, nangni chu khangkan ni no tin u, nin lâia â roinpui tak chu â chîn tak angkan om sela, ruaitu tak chu isom angkan om riseh.#Mat.23:11; Mk.9:35; Lk.9:48. 27Tûm â roinpui ual, khalai rikhîltu khâm, khalai idôtu khâm? Khalai rikhîltu khah ni no nîm a? Khannisela, kei chu nin lâiah isom angkan kî om a nit.
28“Dengthei intak ki tong kârka ne ompuituhei nin nit. 29Ki Pan ram a ne înkung pêk angkah takin kei khomin ram nangni ki înkung pêk a nit. 30Khanchu, ki ramah khan ki dochamah fâng nin ta, in nin ta, rêngṭhungmuna ṭhungin Israel nam sômleiinikahei chungah roi rêl nin ti.#Mat.19:28; Mk.10:37; Thup.3:21; 20:4.
Peteran a phial rang thu
(Mat.26:31-35; Mk.14:27-31; Joh.13:36-38)
31“Simon, Simon, ringai ta, bu tak neh arsi an îṭhâp ngai angkana nangni fia a, â ṭha neh â sia nangni thlei rangin Soitanan phalna a mu tâk. 32Khanniseh, ni iamna a boi nona rangin nang ki ṭongṭai pêk. Ki tiang mâi ni ngat nôk tikin ni suapuihei nen det rang a nit,” a ti a.
33Petera khan a sâm a, “Puma, ni zianga lung ina tâng rang neh ithi rang khomin nang izui mai kî huam a nit,” a ti a.
34Jisuan a ziangah khan, “Peter, nang ke ril, ‘Ani khah reh mang e,’ itia voi thumkah ni ne phial mâkah chu vuanzânah hin âr khuang no nih,” a ti a.
Sumkok, choli, khandai chôi loi rang
35Khante, Jisuan an ziangah, “Sumkok hei, choli hei, pheikok hei, chôi loia nangni ki tir lâiah khan im nin irsam a om?” itin ardon a.
Anni khan, “Ite risam mang ung e,” an ti a.#Mat.10:9,10; Mk.6:8,9; Lk.9:3; 10:4.
36Jisuan, “Atûn chu sumkok inei khan chôi sela, choli nei khomin chôi ta riseh; khandai nei ino khomin a zakua zuar sela richoh riseh. 37Nangni ke ril, ‘Ani kha mi sual lâiah itep a nit tâk,’ iti Thubu-a riziak khah ki chunga tlung ngêt rang a nit. Ki chungthu riziaka om khah ai tlung idik rang tâk a nit,” a ti a. #Isa.53:12. 38Kôilômhein a ziangah, “Pumapa, en ta, hin khandai inikah chu a om,” an ti a.
Ani khan, “Ân rup tâk,” a ti a.
Oliv tlângah Jisua a ṭongṭai
(Mat.26:36-46; Mk.14:32-42)
39Khante, khopui ata khah a suak a, a tho ngai lam angkan Oliv tlângah khan a fe tâk a; a kôilômhei khomin an zui a. 40A mun a tlungin chu an ziangah, “Thlêmna nin lût nona rangin ṭongṭai rei,” a ti a.
41Khanungchu, an ziang ata khah lunga dêng phâk tenah a vân fiar a, arkhûk a dil a, a ṭongṭai a. 42“Epa, ni nuamin chu hi dengtheina kilât hih ki ziang ata khâi roh. Nikhomsela, keima richam ni loiin, nangma richam ni riseh,” a ti a.#Mk.10:38; Joh.18:11. 43Khanchu, rivân ata vântirtôn a ziangah a zuang inlâr a, râtna a zuang pêk a. 44Arthla â vâi tak tak a, ṭhatnemringai nôk ualin a ṭongṭai a; arthlân khah thisen angkan rinêngah a far a.
45Khante, a ṭongṭai zoiin chu kôilômhei ziangah a hong a, ngaisiatin â sôi rai sika in thlar khah a hong mu a. 46An ziangah, “Ithôm nin iin thlar? Thoi unla, thlêmnah nin lût nona rangin ṭongṭai rei,” a ti a.
Jisua an man thu
(Mat.26:47-56; Mk.14:43-50; Joh.18:3-11)
47Khante, Jisua a la ṭong mai lâiin mipui an hong tlung a, Kôilôm Sômleiinikahei lâia ṭang Juda an iti khan ma a hong iruai a, ifôp itumin Jisua khah a hong pun a. 48Nikhomsela, Jisuan a ziangah, “Juda, Miriam Naipa hih ifôpin na inman rang nî ti?” a ti a.
49Khante, a zianga kôilôm iomhei khan thil hong itlung rang khah an mun chu a ziangah, “Puma, kin khandai mang kin tîm?” an ti a. 50Khante, an lâia khatkah khan Thiampu Laltak isom khah a sât a, â kuar changtianga khah a sât iṭhul pêk a.
51Nikhomsela, Jisuan, “Ân rup tâk,” a ti a. Kha mi kuar khah a tôn pêk a, ân dam tâk a.
52Khanungchu, thiampu lalhei, Tempil ulianhei, upahei, ama man ranga honghei ziangah khan Jisuan, “Suammi man rang angkan khandai neh tôkmol ichôiin nin hong irthok kêng na? 53Nîn tin Tempilah nin lâiah ki om a, ne man mak chei a; nikhomsela, atûn izîng thuneinan roi a rêl lâi hih nin sin tho zoro chu a nit,” a ti a.
Peteran Jisua a phial
(Mat.26:57-58,69-75; Mk.14:53-54,66-72; Joh.18:12-18,25-27)
54Khante, Jisua khah an man tâk a, Thiampu laltak inah an ṭhui a. Petera khan ilah takka tah a zui a. 55In rikul sung tualah khan mei an sêm a, mei iua ṭhung rikhîlhei lâiah khan Petera khom a va ṭhung a. 56Mei kôla an iṭhung lâi khah isom nupang khatkah hin a mu a, a en ngit a, “Hi mi khom hih Jisua zianga om ngai khah a nit,” a ti a.
57Khanniseh Petera khan, “Nupangnu, ani khah reh ngai mang e,” itin a phial a.
58A nakan ualah chu mi dang khatkah hin Petera khah a hong mu a, a ziangah, “Nang khom an lâia mi ni nit hih,” a ti a.
Khannisela, Petera khan, “Miriam, kei chu ni tlak mang e,” a ti a.
59Khante, dârkâr khatkah vêl nungah khan mi dangin, “Hi mi khom hih Jisua zianga om ngai a nit hite, Galili mi kêng ai nit,” a ti ngit a.
60Khannisela, Petera khan a sâm a, “Miriam, nî ti khah kî riat tlak ino a nit,” a ti a. Voikarengin, a la ṭong mai lâi takin âr a khuang tâk a. 61Khanchu, Pumapa khah arhêl a, Petera khah a en a. Khanchu, Petera khan, Pumapan a zianga, “Vuanzân âr khuang man voi thumkah ne phial ni ti,” ai ti pêk khah a riat suak a. 62Khanchu, Petera khah putiang a suak a, a ṭap ngûi ngûi tâk a.
Jisua an phengsan a, an itôk
(Mat.26:67-68; Mk.14:65)
63Khante, â mantuhei khan Jisua khah nuiza siamnan an mang a, an itôk a. 64A mâi an hup pêk a, “Ti roh, tûm nang ihêm ni iam?” itin an ridon a. 65Êrona ṭong ṭha no tak tak a chungah an tho a.
Sanhedrin maah Jisua â ding
(Mat.26:59-66; Mk.14:55-64; Joh.18:19-24)
66Khante, khovâr kaneh chu vântlâng upahei, thiampu lalhei, Dân inriseituhei khah an ribûm a; an roirêlnaah khan Jisua kha an hong ṭhui a, 67a ziangah, “Ne ril roh, Mesia ni nit im?” an ti a.
Jisuan, “Nangni ril khom inlang iam no tin u. 68Ṭong nangni ridon inlang khom ne sâm no tin u. 69Nikhomsela, atûn ata chu Miriam Naipa hih Pathian Tinrêngthothei changtiang iṭhung tâng a ti,” a ti a.
70An rêngka khan, “Khate, Pathian Naipa nî nit na?” an ti a.
Ani khan a sâm a, “A nit nin ne ti tâk khate,” a ti a.
71Khanchu, “Ite riatpuitu dang nang khai mak e, eimani zelin ai ti ei riat tâk,” an ti a.
നിലവിൽ തിരഞ്ഞെടുത്തിരിക്കുന്നു:
LUKA 22: BIATBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The Bible Society of India
© 2014, Used by permission. All rights reserved. More
