Pédáesh 7
7
Nuhay tuppán
1Hodáyá gón Nuhá gwasht: “Taw gón wati lógay sajjahén mardomán bójigay tahá beraw, chéá ke mana gendán ke é naslá pahrézkár taw ay. 2Cha sajjahén helárén haywánán hapt jotk gón wat bar gón, narén o áiay mádagéná, cha sajjahén harámén jánwarán yakk yakk jotké, narén o áiay mádagéná, 3o cha ásmáni morgán hapt jotk, narén o mádagén, ke sarjamén zeminay sará áyáni naslá zendag bedáray. 4Hapt róchá rand, anchén hawré gwárénán ke tán chell róch o chell shapá gwárit o man wati jórh kortagén sajjahén sahdárán cha zeminá gár o gomsára kanán.” 5Harché ke Hodáwandá gwashtagat, Nuhá hamá paymá kort.
6É wahdá ke zeminay sará hár átk, Nuhay omr shash sad sál at. 7Nuh o áiay jan o chokk o neshár bójigá potertant ke cha hár o tuppáná berakkant. 8Cha helári o harámén haywán o morg o sajjahén lápkasshén jánwarán, 9jotk jotká, naréné o mádagéné, Nuhay kerrá átk o bójigá potert, hamá paymá ke Hodáyá Nuh hokm dátagat. 10Hapt róchá rand zeminay sará hár o tuppáné átk.
11Nuhay omray shash sadomi sálay domi máhay habdahomi róchá, johlánkiáni sajjahén chammag botkant o ásmánay darig pach butant. 12Chell róch o chell shapá zeminay sará hawrán gwart. 13Hamé róchay jendá Nuh o áiay chokk Sám o Hám o Yápet o Nuhay jan o sayén neshár bójigá potertant. 14Áyáni hamráhiá har paymén sahdár wati tahray hesábá gón at; har paymén dalwat wati tahray hesábá, har paymén lápkasshén jánwar wati tahray hesábá o har paymén morg wati tahray hesábá, har paymén bánzolién sahdár. 15Har sahdár ke zenday sáhi mán at, jotké jotké Nuhay kerrá átk o bójigá potert. 16Hamá paymá ke Hodáyá Nuh hokm dátagat, har sahdáray nar o mádag bójigá potertant. Nun Hodáwandá darwázag bast.
17Tán chell róchá zemin hárá mallet o áp gésh bayán but o bójigi cha zeminá borz chest kort. 18Zeminay sará áp anchó ke borzter bayán but, bójig ham ápay sarborá trappal#7:18 Trappal, bezán ápay sará yalah ent o nabokkit. but. 19Áp zeminay sarborá sakk chest but o sajjahén ásmánay chéray drostigén borzén kóh zéráp butant. 20Áp borzter rawán but o kóhi chér o andém kortant. Áp cha kóháni thollán#7:20 Tholl, bezán kóhay borzterén jágah. kesás chár gwáz#7:20 Bezán do mitar. Har doén dastáni drájiá, ke do mitara bit, gwáza gwashant. Asligén Ebráni nebeshtánka gwashit: “15 ammáh”. borzter shot. 21Zeminay saray sajjahén sahdár bérán butant; morg o dalwat o wakshién haywán o hamá sajjahén sahdár ke zeminay sará romb o ramaga kanant o sajjahén ensán ham. 22Hamá sajjahén sorendah ke hoshkén zeminá atant, hamá ke zenday sáhesh mán at, bérán butant. 23Hodáyá zeminay saray sajjahén sahdár gár o gomsár kortant. Ensán o jánwar o lápkassh o ásmánay morg, sajjahén cha zeminá gár butant. Éwaká Nuh o hamá ke gón áiá bójigá gón atant, pasht kaptant. 24Tán yakk sad o panjáh róchá zemin ápá mán póshetagat.
നിലവിൽ തിരഞ്ഞെടുത്തിരിക്കുന്നു:
Pédáesh 7: HPKB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2015-2022, Wycliffe Bible Translators, Inc. and the Balochi Bible Translation Team. All rights reserved.
