Matayo 9
9
Erilama ryoyu basire
1Mwingira omo bwato mwasokera oko muyi wuwe. 2Neryo lebaya mobamuletera oyu basire, iniagotsere oko ngingo yiwe; nomugulu Yesu alangira erikirirya ryabo mwabuga noyu basire ati, Mugala wage ubye nobutseme; ebibi byawe byamabuyirwa. 3Kandi lebaya abandi babasaki mobayibwira bati, Omundu oyu akatsuma. 4Nikwa Yesu, mwaminya amaringikania wabo, ati, Busana naki mukaganiraya ebibi omo mitima yenyu kwehi? 5Niki kyokyolo, eribuga, nyiti, Ebibi byawe byamabuyirwa, kutse eribuga, nyiti, Hangana uyigendere, kwehi? 6Nikwa mutoke eriminya ko Mugala womundu awite ehamuli omo kihugo yeribuyira ebibi—mwabwira oyu basire— ati, Hangana, uheke engingo yawe ugende eka. 7Neryo mwahangana mwaya eka. 8Esyondeko omugulu syalangira, mobubaha, mobapipa Mungu, oyu waha abandu ehamuli yingaha.
Eribirikirwa ryaMatayo
9Omugulu Yesu akalaba akalwayo, mwalangira omundu oyu kahulawa mo Matayo inianikere aho herisolera; mwabuga naye ati, Unyikwame. Naye mwahangana mwamukwama.
10Omugulu abya anegemere okwirya omo nyumba, lebaya, abasolesya bangi na bakola nabi mobasa mobikala haguma na Yesu na biga buwe. 11Omugulu baFarisayo balangira ebi, mobabwira abiga buwe bati, Busana naki omukangirirya wenyu akarya haguma na basolesya na bakola nabi kwehi? 12Nikwa omugulu owabya, mwabuga ati, Abakalire sibari nobwaga bwomusaki, nikwa abalwere. 13Mugende mwige omusindo weki, kiti, Ngasonda eriganyira, butsira obuhere. Kusangwa sinasa eribirikira abatunganene, nikwa bakola nabi.
Eritsira
14Neryo abiga ba Yoane mobamuhikako, bati, Busana naki itwe na baFarisayo tukayira, nikwa abiga bawe sibeyira kwehi? 15Yesu mwabuga nabo ati, Abageni beriherukania bangatoka eririra omugulu iba womuheruki ane nabo kwehi? Nikwa ebiro bikandisyasa, iba womuheruki abilusibwa kubo, oko mugulu oyo basyatsira. 16Sihari mundu oyu kahira ekitomeko ekihyakihya oko lukimba lwakera, kusangwa ekitomeko kikatula olukimba, ilwatulika kwilaba. 17Kandi ebinyu bihyabihya sibihirawa omo ngobi ya kera yebinyu; byamahirwamo esyongobi sikatulika nebinyu ibyutika, nesyongobi isyahera; nikwa ebinyu bihyabihya bikahirawa omo syongobi nyihya, nebyosi ibyabyaho.
Mwali wa Yairo
18Abere akabuga nabo, lebaya, omurongani mwasa mwamukukamira ati, Mwali wage amahola; nikwa wase umuhire kwebyala byawe, akandibyaho. 19Yesu mwahangana mwamukwama nabiga buwe. 20Neryo lebaya, omukali oyo wagalawa nerisenda ryomusasi emituta ikumi nibiri mwasa enyuma kwiye mwatula oko musike wolukimba luwe; 21kusangwa ayibwira ati, Nanatatula risa oko lukimba luwe, ngandilamibwa. 22Yesu mwabinduka, mwamulangira mwamubwira ati, Usikaye omutima, mwali wage; erikirirya ryawe ryamakulamya. Neryo-neryo omukali oyo mwalamibwa. 23Omugulu Yesu abere abihika omo nyumba yomurongani, mwalangira ababuhi bamarenga, nendeko ikabuya olukanda, 24mwabuga ati, Mulweho; kusangwa omwanamuto siaholire nikwa ari to. Nabo mobamuseka kutsibu. 25Nikwa omugulu endeko yamabihigirwa eyihya, mwingira omo nyumba mwamuhamba oko byala, na mwanamuto mwahangana. 26Nengulu yebi moyatsungana omo kihugo ekyo kyosi.
Esyondimatime ibiri
27Omugulu Yesu alaba akalwayo, esyondimatime ibiri mosyamukwama, ibakabirikira kutsibu bati, Utuganyire, oMugala wa Dawidi. 28Abere abiingira omo nyumba, esyondimatime esyo mosyamuhikako; Yesu mwabulyabo ati, Munikirirye ko nangatoka erikola eki kwehi? Mobamubwira bati, Ega, Mukama. 29Neryo mwatula oko meso wabo, ati, Rikoleke kwinywe ngoko mwikirirye. 30Neryo Ameso wabo mwalibukala. Yesu mwahanabo kutsibu ati, Mulebaye sihabye mundu akaminya eki. 31Nikwa mobagenda mobatsungania engulu yiwe omo e kihugo ekyo kyosi.
Emumu
32Nomugulu babya bakagenda, lebaya mobamuletera emumu eyiri kwesyombinga. 33Nembinga eyo yabere yabiguswa eyihya emumu moyabuga; nesyondeko mobasweka, bati, Eritsuka na kera sihetalolwako ekiringene neki omo Israeli. 34Nikwa abaFarisayo mobabuga bati, Akagusa esyombinga eyihya busana nomukulu wesyombinga.
35Kandi Yesu mwalendera omo miyi yosi nomo hiyi, akakangirirya omo manyumba wabo werihindana akatula engulu yowene yobwami, nerilamya amakoni gosi neriyiremwa ryosi. 36Omugulu alebaya esyondeko, Mwaganyirabo, kusangwa mobagalwa omwiluha neripanswa, ngesyombuli sitawite omulisya. 37Neryo mwabuga nabiga buwe ati, Ebyerigesa ni bingi, nikwa abagesi ni bake; 38musabe oMukama werigesa atume abagesi okwigesa riwe.
നിലവിൽ തിരഞ്ഞെടുത്തിരിക്കുന്നു:
Matayo 9: NTN62
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Le Nouveau Testament et les Psaumes en Ndandi © British and Foreign Bible Society, 1962.
