Luka 23
23
Yesu embere waPilato
1Neryo endeko eyo yosi moyahangana, mobamutwala embere sya Pilato. 2Mobatsuka erimuhandikirira bati, Twabiribana omundu oyu akabindula ekihanda kyetu, akatu kaga erisolera Kaisari, ati iye ni Kristo omwami. 3Pilato mwamubulya ati, Uri mwami wa baYuda kwehi? Naye mwa musubirya ati, Wamabuga. 4Pilato mwabwira abahereri bakulu nendeko ati, Sinditabana oko mundu oyu ko kibi. 5Nikwa mobahatikana, bati, Akarwanaya abandu, nerikangi rirya eYudea hosi, eritsuka eGalilaya nerihika na hano.
Herode
6Pilato abere owa ekyo, mwabulya ngo mundu oyu nga ni muGaUlaya. 7Amabiminya kwari omo hamuli ya Herode, mwamutuma ku Herode, kusangwa naye abya eYerusalema omo biro ebyo.
8Omugulu Herode alola uku Yesu mwatsema kutsibu, kusangwa eritsuka kera iniakasonda erimulolako, kusangwa abya akowa engulu yiwe, kandi iniakasonda erilola oko kitikotiko ekyakolawa naye. 9Kyaleka iniamubulya omo binywa bingi; nikwa mwatamusubiryaki. 10Nabahereri bakulu nabasaki mobahangana aho, mobayitsinga erimuhandikirira kutsibu. 11Neryo Herode na basoda buwe mobamupona nerimuseke rerya; neryo, mobamwambalya olukimba lukangabenie, neryo mwamusubya ku Pilato. 12Noko kiro ekyo Herode na Pilato mobaswabya bwira na bwira, kusangwa embere waho ibari na buyigu.
Pilato akatswera Yesu
13Pilato mwabirikira haguma abahereri bakulu na barongani nabandu, 14Mwabwirabo ati, Mwamandetera omundu oyu ngoyu kahabisaya abandu; nenyuma werimulengako embere syenyu, lebaya, sinditabana komundu oyu ko myatsi eyo mukamuhandikirira; 15kutse na Herode, kusangwa amamu subya kwitwe. Lebaya, siaritakola kindu ekitolere akitwa; 16neryo ngandimuswirya neryo inamubohola. (17Nikwa atolere iniaboholerabo omuguma ogo muliki omo biro bikulu). 18Nikwa abosi mobabugira igumaguma bati, Ulusaye omundu oyu, utuboholere Baraba— 19mundu oyo wagusawa omo muliki busana nobwanise omo muyi, na busana neriita bandu. 20Pilato mwaswabuga nabo kandi asonda eribohola Yesu; 21nikwa mobabirikira mobasumba omulenge bati, Mumubambe, mumubambe! 22Mwabuga nabo engendo yakasatu ati, Busana naki, abirikola kibi kyahi kwehi? Sindita mubana ko kibi ekitolere oluholo; neryo ngandimuswirya inamubohola. 23Nikwa mobahatikana, bakabulya nemilenge minene abambawe. Nemilenge yabo moyasinga. 24Neryo Pilato mwatwa mwatsi ati ekyo bakabulaya kikolawe. 25Mwa bohola omundu oyo basonda oyo wagusawa mo muliki busana nobwanise neriita, nikwa mwaha Yesu bamukole ngoko banzire.
Abakali beYerusalema
26Babere bakamutwala, mobahamba Simona weKurene, oyu walwa omoli, mobamuhekya omusalaba, erihekago enyuma wa Yesu. 27Nendeko nene ya bandu moyamukwama nendeko yabakali abamurira nerimususumanira. 28Nikwa Yesu mwa keberabo mwabwirabo ati, Abali beYerusalema, simurire busana nage, nikwa murire busana nenyu nabana benyu. 29Kusangwa lebaya, ebiro byasyasa basyabuga bati, Omuyisa ari na bagumba, nesyonda esitabuta na kera, namabere awataribawako na kera! 30Oko mugulu oyo basyatsuka eribuga oko bitwa bati, mutu terereko; noko hitwa mutukuningire. 31Kusangwa bamakola emyatsi eyi oko muti mubisi, basyakolaki oko gumire kwehi?
Eribambwa
32Mobatwala abandi bakoli bebibi babiri eriitwa haguma naye. 33Babere babihika ahakahulawa mo Kanyamahanga, ho bamubamba, nabakoli bebibi, muguma oko mali nogundi oko malembe. 34Neryo Yesu mwabuga ati, Tata, ubuyirebo; kusangwa sibasi ekyo bakakola. Neryo mobakokotya obukanga erigaba esyongimba siwe. 35Nabandu mobahanganaho, eri samalira; nikwa barongani mobamunegulira, bati, Alamaya bandi; naye ayilamaye, amabya ari Kristo woMungu, Oyo Wayisogawa wuwe! 36Nabasoda mobamusekererya, moba segera ahari nerimuha epata, 37bati, Wamabya uri mwami wabaYuda, uyilamaye! 38Nibya habya erisaka endata kwiye riti, OYU NI MWAMI WABAYUDA.
Eribinduka ryomurahi
39Omuguma woko bakoli bebibi ababambawa mwamutsuma ati, Suri Kristo kwehi? Uyilamaye netu! 40Nikwa ogundi mwamukunga ati, Suriubaha Mungu kwehi? Kusangwa nawe ukatswerawa lubi oluri ngolu. 41Nolwetu ni lwa kwenene; kusangwa tukangirira oluhembo lwemibiri yetu; nikwa omundu oyu siaritakola ekibi. 42Kandi mwabuga ati, Yesu, unyibuke omugulu ukasa omo bwami bwawe. 43Neryo mwamubwira ati, Kwenene, ngabuga nawe, munabwire wasyabya haguma nage omo Paradiso.
Oluholo lwaYesu
44Nikwa yabya ngendambi yendatu, no mwirimya mwabya omo kihugo kyosi erihika oko ndambi yomwenda, 45nekya kakala kyeryuba mokyahwa; nolukimba lwehekalu molwatulwa mwibiri. 46Neryo Yesu mwabirikira nomulenge munene, ati, Tata, omo byala byawe ngahiramo ekirimu kyage! Abere abibuga ebi mwalusya ekirimu kiwe. 47Nikwa omugulu omurongani wabasoda alangira ebyamabya, mwapipa Mungu ati, Kwenene omundu oyu abya mutunganene! 48Nesyondeko syosi abahindana erilangira, babere balola oko byamabya mobasuba ewabo banemohumanga oko bikuba byabo. 49Nabosi abamwasi nabakali abamukwama erilwa eGalilaya mobahangana hali mobalangira emyatsi eyi.
Eritabwa ryaYesu
50Nikwa habya omundu akahulawa mo Yosefu mundu mukulu womwibugiro, ini mundu atunganene omubuya ini akalwa oko Arimatea omuyi wabaYuda, 51abya isyariliga embita yabo nomubiri wabo, kandi abya akalinda obwami bwoMungu. 52Omundu oyu mwaya oko Pilato mwamusaba omubiri wa Yesu. 53Neryo mwakimyago mwalangira kugo kwo lukimba lwomusohe mwamuhira omwisinda yabatsawa omwibwe, eyiteyatatabwa mo mundu. 54Kyabya ekiro kyErikokotya, nekiro kyasabato kikasonda erikya. 55Abakali abasa naye bakalwa eGalilaya mobamukwama, mobalangira eyisinda nomubiri wuwe ngoko ahirawamo; 56neryo moba subula, mobakokotya manukato namalase.
Noko kiro kyasabato mobaluhuka nge bihano.
നിലവിൽ തിരഞ്ഞെടുത്തിരിക്കുന്നു:
Luka 23: NTN62
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Le Nouveau Testament et les Psaumes en Ndandi © British and Foreign Bible Society, 1962.
