Matyu 4
4
4:1-11 Satan Yisas warigesiarei
(Mak 1.12-13; Luk 4.1-13)
1Ende aba wogub ne Igomurur qau Yisas mot ai qengerenget end isorei, isa Satan warigesi qamb. 2Is end igo mani me niau, ar igama igoi worom 40 ne itum 40-ende ar igoi wogub borusi minemb igoai. 3Ende igama Satan diab nob qamar: “Ne Qenu wau igo gab eng nomon e gagar nob qamara mani qibi waria nub igoar.” 4Ende qamara Yisas nob qamar: “Munangit mani nub qas igomot me igour, Qenu wonou qob maigas qamb igo qi eng munon ger igub mom oabig igo eng mani niau gas ende nonogursia igomot igo.”
5-6Ende qamara ne Satan Yisas bo mot ginam qau aib end irarei. Irab qamara Yisas inorou munai aib qirer sig erer qitend naga nob qamar: “Ne Qenu wau igo gab eng, ende naget igo orubor ag qumo is. Isa Qenu wonou qob igo end
wonou enger imurima darab nebeari mesenau isub mi waramb me uminenei.”
7Ne Yisas taui qamar: “Eng gor Qenu qob ete igo: nonou Munon Aib Qenu eng me wariges qem.”
8Ende qamara wogub Satan Yisas bo mot ai qaur sig erer qitend irarei. Irab munon yurau ai qent gugum wurinou mi uber-uber sirbiga gea nob qamar: 9“Mi uber-uber e gagar gugum gab qoaguruiman eng yonou. Munon ger mi uber-uber e gugum ba wonosierib eng yet gamaur wat bugab yet simot ea eng utibam. End ne, ne baib qamb eng ende yesiara eng mi eng gagar nenet wegibam.” 10Ne Yisas taui qamar: “Satan, qand yewogub iua. Qob ger ete gumatemirei igo:
Munon Aib Qenu eng qas wot igub igoarar.”
11Qen end Satan seret Yisas wogub qoa ne enger darab Yisas nonogursiamirei.
4:12-16 Yisas wonou sarau Galili end qanambig barei
(Mak 1.14-15; Luk 4.14-15)
12Yisas igor eng Yon baab uyort bigumirei igama qamarari igorei. Igub wogub bo ai Galili end isorei. 13Wonou ginam qenen Nasaret eng wogub bo is Kaperneam end igoai. Munai ginam Kaperneam eng Galili ya tai eng gabut igoai. Munai ginam eng ai aib Sebulon Naptali nob end igoai. 14Wo mi eng ebeter eng qoan Aisaia ete miteri qamb gumater eng irimaniamorei:
15Sebulon Naptali ai nob igama ai tap ya tai Galili gabut end yar ya Yordan wes end isorei. Ai Galili eng munon yurau ar wurinou.
16Munon qomon boru ten igorunor eng begen aib gubour. Munon ai itum end igo umub at igour eng begen wurit begeneriba.
4:17-22 Yisas munon 4-ende wurimaribigorei
(Mak 1.16-20; Luk 5.1-11)
17Qen end Yisas qanambig wonou qob dibes wurinob qamar: “Aninou qomon boru mogirt wab wagar. Qenu wonou ginamt bibis biginer eng qo piet igo,” ende qamarei.
Yisas munon yagwai baub igour end wurit qamarei.
18Ende qamb wogub ya tai Galili gab eng toat isub gar eng munon ombur igurei. Ger eng Saimon unum ger Pita, ne ger eng wonou umour eng unum Andru. Ombur dob ya tai end arir yag wai ba igurei. 19Ombur ende ibag wurinob qamar: “An sarau eng wogub ye yenob qiroari munon bo yagwai baub igoumon gas ende bo munon maigas ende at wuribaunon eng werei animbigibam.” 20Ende qamara qob gari igub wurinou dob eng gagar bogubogi wogub nob isumirei.
21Isub-isub ne ibagamir eng munon ombur bo ibagamirei. Munon ombur eng Yems Yon nob, wurinou ur unum Sebedi. Wuri gor wurinou ur nob tabint igo dob musub igamari is ibagamirei. 22Ibag wurinob qamara wurinou dob eng urt wogub nob isumirei.
4:23-25 Yisas qob wuriimbig ne munon wurimusiarei
(Luk 6.17-19)
23Isub munon ginam-ginam ai Galili igo eng gugum isub wurinou Qenut igub igour munai mor end isub Qenu wonou bibis qob uber eng wuriimbig wurinob qamb, ne munon ai bigau igaramor eng ne toar ar qei igara igour eng wurimusub ende at qib igoai. 24Ende at qiroa qob toau ai Siria eng gugum isa igumirei. Igub munon toar wes-wes igara igour eng ne git goan uter igara igour eng, ne aibigau igarama igour eng, ne uben goten gurumot uburerei igama igour eng gagar oramar yarari wurimusub igoai. 25Ende aba gab Galili munon ne Dekapolis, ne Yerusalem ne Yuda munon ne ya Yordan wes eng gugum toat qib igurei.
നിലവിൽ തിരഞ്ഞെടുത്തിരിക്കുന്നു:
Matyu 4: wnu
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2001, Wycliffe Bible Translators, Inc. All rights reserved
