Retaꞌ Ahun-hunut 2
2
1Nok ranan naan, Uisneno nmoeꞌ naan neno tunan ma pah-pinan nok in aafn ii ok-okeꞌ.
2Anmoeꞌ narair sin arsin, nokaꞌ on naan ate, neon hiut ii ntea. Onaim In nasnaas naꞌko In meupn ein naan. 3Es naan ate, In nbetis neon hituꞌ naan naꞌko neon biak ein ii, he njair neno snasat, natuin In narair In mepun naan, ma nbi neno naan, In nasnaas. 4aRetaꞌ reꞌ natoon nak Uisneno nmoeꞌ neno tunan ma pah-pinan, on reꞌ naan, tua.
Uisneno nmoeꞌ atoniꞌ ma bifee
(Naiꞌ Mateos 19:4-6, Naiꞌ Markus 10:4-9, 1 Korintus 6:16, 1 Korintus 15:45,47, Efesus 5:31-33)
4bOras UISNENO feꞌ nmurai nmoeꞌ neno tunan ma pah-pinan naan ate, 5-6ka nmuiꞌ hau saaꞌ-saaꞌ fa feꞌ, natuin In ka nasanut uran fa feꞌ. Oras naan, suma nmuꞌi haa nipuꞌ reꞌ nsae naꞌko afu, ma napeet pah-pinan. Ma ka nmuiꞌ fa feꞌ mansian reꞌ nareen. 7Rarit UISNENO nnau afu, ma nmoeꞌ je njair mansian. Rarit In nfuu nataam snasaf npeoꞌ in panan konan. Onaim mansian naan anmoin oras naan.
8Rarit UISNENO nroe naan pooꞌn es anbi bare Eden, et pasaꞌ neon-saet. Onaim In natokob mansian naan anbi bare naan. 9Anbi poꞌon naan In namonib areꞌ kanan roet, reꞌ tkisu te namasan, ma taah sin ate miin-oni. In namonib amsaꞌ hau ꞌuꞌu nua nbi pooꞌn ee tnanan. Karu mansian ii naah hau fuaꞌ naꞌko uuꞌ goes in fuan, in of anmoin piut. Ma karu mansian ii naah naꞌko uuꞌ goes anteniꞌ in fuan, in bisa nahiin rais reko ma rais reꞌuf.
10Anbi naan, anmuiꞌ naan noe jes, nasai npoi naꞌko poꞌon naan. Noe naan aꞌsaif haa. 11Aꞌsaif ahuunt ee, in kaan ee Pison. Aꞌsaif ia nasai nfuun naan pah Hawila. Anbi bare ia, nmuꞌi mnatuꞌ mfa-faun. 12Anbi bare reꞌ ia, nmuiꞌ mnaut afaꞌ, nmuiꞌ hau reꞌ in oen ee foo meniꞌ, ma nmuiꞌ faut arimat. 13Aꞌsaif es anteniꞌ, in kaan ee Gihon. Aꞌsaif ia, ansai nfuun naan pah Kus.#2:13: Unuꞌ te, bare reꞌ ia in kaan ee ‘Kus’. Muniꞌ ia, in ntaam et pah Etiopia ma pah Sudan. Pah ein reꞌ ia, etan Afrika ntoom maans ee ꞌsaen. 14Aꞌsaif es anteniꞌ, in kaan ee Tigris. Aꞌsaif reꞌ ia njair nakat nbi pah Asur#2:14: Asur naan, pah es, reꞌ oras ia nteek ee te nak ‘Irak’. ntoom maans ee ꞌsaen. Ma in aꞌsain amuint ee, kaan ee, Efrat.
15UISNENO nreek mansian naan natua nbi Eden, he npairoir poꞌon naan rek-reko. 16Onaim In naprenat mansian naan am nak, “Au ꞌkonan ko he muah hau fuaꞌ saaꞌ-saaꞌ ahaa, naꞌko areꞌ kanan roet anbi poꞌon ia. 17Mes anmuiꞌ naan hau uuꞌ goes, reꞌ Au ꞌtaar ko maꞌtaniꞌ, he kais muah in fuan. Hau naan es reꞌ hau roet reꞌ, karu mansian ii naah in fuan, in bisa nahiin rais reko ma rais reꞌuf. Mes karu ho muahn ee te, ho ro he mmaet.”
18Rarit UISNENO naꞌuab anteniꞌ mnak, “Ka reko fa karu mansian ia nmoni nmes-mees. Onaim Au he ꞌmoꞌe ꞌfee ne atuurn am abaabt es reꞌ natai nok ne.”
19-20Oras naan UISNENO nnau afu, ma nmoeꞌ muꞌit ma koro humaꞌ-humaꞌ. Rarit In nnao naat sin neu mansian naan, maut he in nakanab sin. Rarit mansian naan nakanab muꞌit ma koron naan, es-es ate nok kuun in kanan. Mes neu iin, ka nmuiꞌ fa atuurn am abaabt es, reꞌ natai nok ne.
21Rarit UISNENO narour natupaꞌ mansian naan. Oras in ntuup anfiin ite, Uisneno nait naan in nui bnapaꞌ tuuk es, rarit In ntoeb narekoꞌ papaꞌ naan. 22Ma In nmoeꞌ bifee naꞌko nuif naan. Rarit In nnonaꞌ bifee naan neu atoniꞌ naan. 23Oras atoniꞌ ia niit bifee naan ate, in nak,
“Haaa! Esai feꞌ! Ia ro natai nok kau!
In nuif ein humaꞌ meseꞌ nok au nu.
Ma in sisin humaꞌ meseꞌ nok au sisik.
Natuin in njair naꞌko atoniꞌ, es naꞌ au ukaanb ee, ‘bifee’.”#2:23: Anbi Uab Ibrani te, atoniꞌ te nak ‘ish’. Ma bifee tnak, ‘isha’. Onaim anbi reꞌ ia, sin npaek uab nak “isha (bifee) njair naꞌko ish (atoniꞌ).”
24Natuin rasi naan, es naꞌ atoin es ro he annao nasaitan in ainaf-amaf,
he nmoin nabua nekaf meseꞌ ma ansaof meseꞌ nok in fee,
henatiꞌ sin nua sin njarin meseꞌ.
25Oras naan sin aaf ein, mes sin ka nmuꞌin fa rais mae kreꞌo msaꞌ.
നിലവിൽ തിരഞ്ഞെടുത്തിരിക്കുന്നു:
Retaꞌ Ahun-hunut 2: aaz
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2015, Wycliffe Bible Translators, Inc. All rights reserved.
