Matyu 1
1
Jisas lo ya'ariyei lo lu tewi werese.
(Luk 3:23-38)
1Ane, iyape ano Matyu, peri ape ne Jisas lo ya'ariyei lo lu tewi werese au lesesiya. Jisas Krais lo ya'ariyei sitewi aiwawe a'i Devit. Devit lo ya'ariyei sitewi aiwawe a'i Abraham.#1 Sto 17:11; Stt 22:18
2Abraham lo meni eime Aisak.
Aisak lo meni eime Jekop.
Jekop lo meni eime Juda. Jekop eimane tomu ne'ese iroteye.
3Juda lo tani, iyape Tamar, eimane hesi auteiye. Lowesi iyape Peres, sosu Sera.
Peres lo meni eime Hesron.
Hesron lo meni eime Ram. Stt 38:29-30; Rut 4:18-22
4Ram lo meni eime Aminadap.
Aminadap lo meni eime Nason.
Nason lo meni eime Salmon.
5Salmon lo meni eime Boas.
Boas lo mai Rahap. Boas menitani Rut naituwe. Sosu Rut meni eime Obet auteiye.
Obet lo meni eime Jesi. Rut 4:13-17
6Jesi lo meni eime Devit.
Devit pani Israel lo meni owane tutawe henerai. Menitani ape meni eime Solomon auteiye. Menitani ape ne tu meni Uria lai naituwe. 2 Sml 12:24
7Sosu Solomon lo meni eime Rehoboam.
Sosu Rehoboam lo meni eime Abiya.
Sosu Abiya lo meni eime Asa. 1 Sto 3:10-16
8Sosu Asa lo meni eime Jehosafat.
Jehosafat lo meni eime Johoram.
Sosu Johoram lo meni eime Usia.
9Usia lo meni eime Jotam.
Sosu Jotam lo meni eime Ahas.
Sosu Ahas lo meni eime Hesekia.
10Sosu Hesekia lo meni eime Manase.
Sosu Manase lo meni eime Emon.
Sosu Emon lo meni eime Josaia.
11Sosu Josaia lai Jekonia, sosu nairipi werese lo aite. Nowe ape se ai lu tamo lai lowe Juda lo lu tewi werese omo pani Babilon ma'e wiyawi yahowa'i ta'aneyei ne heneti. 2 Kin 24:14-15; 2 Sto 36:10
12Sosu lowe omo Babilon ma'e heneti.
Jekonia lo Tani meni eime Sealtiel auteiye.
Sosu Sealtiel lo meni eime Serubabel. Esr 3:2
13Sosu Serubabel lo meni eime Abiut.
Sosu Abiut lo meni eime Eliakim.
Sosu Eliakim lo meni eime Asor.
14Sosu Asor lo meni eime Sadok.
Sosu Sadok lo meni eime Akim.
Sosu Akim lo meni eime Eliut.
15Sosu Eliut lo meni eime Eleasar.
Sosu Eleasar lo meni eime Matan.
Sosu Matan lo meni eime Jekop.
16Sosu Jekop lo meni eime Josep. Sosu Josep lai menitani ta iyape Maria naituwe. Maria meni eime Jisas auteiye. Owane Sitewi lai tu naifa weriyei weriyei meni eime Jisas lu taune werese ne si tame ete hene aniyei ne ariariyeye. Serai meni ape Krais henerai.
17Sosu a'i pe Abraham lo lu tewi werese i tepa'asiye su, meni owane tutawe Devit henerai. Lu tewi werese ereti feni hesi, lowe hesiyo hesiyo (14) iroteye. Sosu aiwawe a'i Devit lo lu tewi ereti werese i tepa'asiye su, omo pani Babilon ma'e wiyawi yahowa'i a'i henetiyei ape, henerai. Lu tewi ereti feni hesi, lowe hesiyo hesiyo (14) iroteye. Sosu lu tewi kalabus sahe iroteye ape, lu tewi werese i tepa'asiye su, Krais ma'e henerai. Lu tewi werese ereti feni hesi, lowe hesiyo hesiyo (14) iroteye.#Lu 2:17
Menitani, Maria, Jisas Krais auteiye.
18Nowe ape se Maria meni eime Jisas auteiye. Peri ape apou te'eteye. Meni ape Josep lai menitani Maria naituwei ne ariariyeye. Maria meni Josep ma'e fai ta'ama. Menitani wati'are ape farere a'i iroteye. Ahowa, lowesi wesi tere'e tere'e sahe howeiteye. Nowe ape se Owane Sitewi lo Hepene Wara'i a'i lai menitani Maria ma'e eine tahe se au irowe. Serene Maria tahe se henerai.#Lu 1:27,35 19Sosu Josep Maria eine tahe se wanuwe su, le marepi erasi a'i toteye. Le lu taune werese lo nihe se menitani lo eine tahe se ne au te'e areiyerowata. Le meni aseyaro a'i ne. Le tani lo au neritaseye wou ta'ame. Serene le menitani lo tai mai ma'e eresene a'i se si tame eimawesawiyei ne toteye. 20Le marepi ape toteye su, Owane Sitewi lai ipari wisere a'i lo Josep ma'e eimawe arosai. Sosu Josep nihe howeiteye su, Owane Sitewi lo ipari wisere a'i (ensel) lai Josep ma'e suwou se au te'eye. Le Josep ma'e apou te'eye, “Josep Devit lo lu tewi, Wanure! Ne menitani wati'are, Maria, naituwei ne owe ape atoweiyere. Owane Sitewi lo Hepene Wara'i a'i lai Maria eine tahe se au irowe. 21Nowe me'iye su, le meni eime auteiyei. Ne iyape lo Jisas au paporowa. Owane Sitewi lai meni eime ape lu taune werese lo yo seni luwaru a'i au sasariyei ne ariariyeye. Serai le lu taune werese si tame ete hene anirowa.”#Lu 1:31; 2:21
22Owane Sitewi lo ipari wisere a'i (ensel) Josep ma'e suwou se henerai su, Owane Sitewi lai peri ta lo au te'e siye meni lo ahi leseye ape, wiyeme a'i henerai. Tu naifa Owane Sitewi lo peri au te'e siye meni apou leseye.
23“Wanure! Menitani wati'are ta, meni ta se howei ta'ame ape, eime tahe se henerairowa. Le me'iye su meni eime ta auteirowa. Lowe iyape paporowa, ‘Emanuel.’
Iyape ape lo sitewi apou a'i ‘Owane Sitewi nomo mase ironamirowa.’” Ais 7:14
24Sosu Josep Owane Sitewi lo ipari wisere a'i (ensel) lo peri wanuwe su, le nihe howei sineyewe, Owane Sitewi lo peri werese umasiteye. Le menitani Maria naituwe. 25Sosu Josep lai menitani Maria wesi lo henetaiyewe, lowesi ironamiteye. Le tani lo mase howeiye ta'ama. Ahowa, Maria meni eime auteiye su, le tani lo mase howeinamiteye. Serai Josep meni eime ape au papowe, Jisas.#Lu 2:21
നിലവിൽ തിരഞ്ഞെടുത്തിരിക്കുന്നു:
Matyu 1: snyNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2004, Wycliffe Bible Translators, Inc. All rights reserved.
