Lukwu 3
3
Ikwu-ọnu Jọni Nye Wụ Mini
(Mat 3:1-12; Mak 1:1-8; Jọn 1:19-28)
1N'awha ke nri nụ isne ke ọchichi Taberọsi Siza, nga Pọntiosi Paịleti nẹechi Judiya, nga Erọdu nẹechi Galili, nwene a rukna Filipu nẹechi Ituria nụ Tirakonitisi, Lisanasị nẹechi Abilini, 2Anasị nụ Kayafasị bụ ele risi arịohna, ige wam ikwu-ọnu Chiokike dụru Jọni, nnwọ Zakaraya nsnị n'ẹli-ịkpa. 3O zne nụ kpakara ẹli ke zị Osimini Jọdani gburugburu, nọokpo okwo naakaa ele badnụ tụhnasna mkpọma ma be wụ be mini, ma Chiokike gbarụnu be mmehie. 4Lele kpa be gbarụ a n'ọkwukwo nsọ hite n'ọnu Azaya nye ọwhnurninya, kaa,
“Akpịri otu badnụ nọokpo okwo n'ẹli-ịkpa,
anụ mekwata apna Nyenwe aị,
anụ mee apna a snị asnị.
5Be jeemesni kpakara ngwulangwu,
be jaakwnadna kpakara rugwu nụ rugwu matị.
Kpakara apna zị mgbahịrigodo jaasnị asnị,
kpakara apna zị ndagwurugwu jaazị snam.
6Kpakara ele badnụ jọowhnu ọznohia Chiokike.”
7Jọni kanụ igbudu badnụ nọowhokwnusi a ma ọ wụ be mini, “Anụ ẹbnurnu agwọ, nyele kannụ anụ gbanahọru ovu owe ẹhni Chiokike ke naava? 8Anụ mịnya mkpụru ke neegesi nụ anụ tụhnasnarnu mkpọma. Anụ káa nụ Ebereham bụ nda anụ. Kwnornu me kanụ anụ ezi ọka, Chiokike nwernu rikne mee kpakara akaworugwu ka ghọ rụmu Ebereham. 9Be bịtalam ehnigwe n'ikwnu kpakara isisi, isisi ọbula ke mị́nyala mkpụru ọma, be joogbudna a, tụbna nụ rime bẹkwnu.”
10Ele badnụ wam sịkwa a, “Kịni bụ nhne a jeeme?”
11Jọni sarụ be, “Nye nwernu iwo lawụru, o kesi nye nwée otu, nye nwernu wiri, mee masị kpam.”
12Ele ọna ntụ varụ ma Jọni wụ be mini, be sịkwa a, “Nye-zni-nhne, kịni bụ nhne a jeeme?”
13Jọni sarụ be, “Anụ náhịa ele badnụ ịwai kakwo kpa be nyernu anụ iwu.”
14Ele ọgwnu sịkwa a, “Kịni bụ nhne a jeeme”?
Ọ kanụ be, “Anụ mée ele badnụ nhne rikne, mọbu bno ele badnụ nhne aghalaghala, ọgwo ẹrnu anụ ji anụ rụwho.”
15Ele badnụ neele anya nụ Jọni bụ Karaịsi. 16Jọni kanụ be, “M ji m mini wụ anụ mini, kọvu nụ nye kakwo m rikne vawa, nye me kwésile o whudnahie tọma eriri okoro-ọchi a lawụru. Nye wam jeeji Enine Nsọ nụ bẹkwnu wụ anụ mini. 17Nye nhne ọwhusna ịkpa zị n'aka a, ọ jọowhusna ịkpa a nkarị, chịbna ịkpa a n'ọbna, kọvu o jeeji bẹkwnu chní echni kpọrne ruznurnuznu ịkpa.” 18Jọni ji agịda ikwu-ọnu zị ichne ichne zni izi ọma, naarịasno be tụhnasna mkpọma.
19Kọvu nụ Jọni bigbọru Eze Erọdu kwnornu Erodiasi nnwerne nwene a, nụ agịda nhne ọjo berere ke Erọdu mernu. 20Erọdu tụkwasiri n'olu nhne ọjo ka, nga o yisiri Jọni ikelu.
Ọwuwu mini Jizọsi
(Mat 3:13-17; Mak 1:9-11)
21Nga Jọni wụkparu ele badnụ mini, ọ wụru Jizọsi mini masị.#3:21 Nhne ka mernu tụtu Erọdu yisiri Jọni n'ikelu. Nga Jizọsi neekpe okpukpe, oligwe kpumernu. 22Enine Nsọ whekwasịri a lele nduru, otu akpịri hiri n'oligwe dna kaa, “Jị bụ Nnwọ m, me whnụrnu n'anya, nhne i masịri m.”
Osnusno ọmumu Jizọsi
(Mat 1:1-17)
23Nga Jizọsi gbarụ nri awha ẹto, ọ panịzo ẹrnu izi ọma a, ele badnụ naarị nụ ọ bụ nnwọ Josefu,
nnwọ Hili, 24nnwọ Matatị,
nnwọ Livaị, nnwọ Meliki,
nnwọ Janaị, nnwọ Josefu,
25nnwọ Matatayasi, nnwọ Emọsi,
nnwọ Nahum, nnwọ Ẹsili,
nnwọ Nagaị, 26nnwọ Matị,
nnwọ Matatayasi, nnwọ Sẹmeni,
nnwọ Josẹki, nnwọ Joda,
27nnwọ Jonani, nnwọ Resa,
nnwọ Zerubabẹli, nnwọ Seatẹli,
nnwọ Neri, 28nnwọ Meliki,
nnwọ Adị, nnwọ Kosam,
nnwọ Ẹlimadam, nnwọ Ẹr,
29nnwọ Josụa, nnwọ Eleza,
nnwọ Jorim, nnwọ Matatị,
nnwọ Livaị, 30nnwọ Simiọni,
nnwọ Juda, nnwọ Josefu,
nnwọ Jonam, nnwọ Ẹliakim,
31nnwọ Mela, nnwọ Mena,
nnwọ Matata, nnwọ Natanị,
nnwọ Devidi, 32nnwọ Jesi,
nnwọ Obedi, nnwọ Boazi,
nnwọ Salịmoni, nnwọ Nasọni,
33nnwọ Aminadabụ, nnwọ Ram,
nnwọ Hezirọni, nnwọ Pẹrezi,
nnwọ Juda, 34nnwọ Jekọpu,
nnwọ Aziki, nnwọ Ebereham,
nnwọ Tera, nnwọ Nahọ,
35nnwọ Sẹrugi, nnwọ Ru,
nnwọ Pẹlegi, nnwọ Ẹbe,
nnwọ Sẹla, 36nnwọ Kaịnani,
nnwọ Afazadị, nnwọ Sẹm,
nnwọ Noa, nnwọ Lamẹki,
37nnwọ Metusela, nnwọ Ịnoku,
nnwọ Jarẹdi, nnwọ Mahalalẹli,
nnwọ Kaịnani, 38nnwọ Enọsi,
nnwọ Sẹti, nnwọ Adam,
nnwọ Chiokike.
നിലവിൽ തിരഞ്ഞെടുത്തിരിക്കുന്നു:
Lukwu 3: ikwNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2010, The Nigeria Bible Translation Trust and Wycliffe Bible Translators, Inc. All rights reserved.
