METIU 24

24
Jisubv Kumko Okumdok Momvgnamdcm Lunam
(Mark 13.1-2; Lu:k 21.5-6)
1Jisubv kumko okumdcm mcge:la gvlendungakui, odvlo Bvk agom tadjvgla gvmvnnc tani:kvdv:dc kumko okumdo kogla kogsa:namkvdv:dcm Bvm lcngkankapc gva:dungai. 2Cmpige:la Bv bulum lubito, “Nolu sc appv:scm ka:begdag, ka:begma:lang nolu? Aroru:pc, ngo nolum lubidung, sok apvkosin akon tayc:do akoncm yoppagma:pc, lc:pagma:yc.”
Du:g Gvnamclang Mogvtmomatnam
(Mark 13.3-13; Lu:k 21.7-19)
3Olib Adido cdcmpila tednamc, atckpc agom tadjvgla gvmvnnc tani:kvdv:dc Bvkkolo:pc gva:to, scmpc lula, “Ngolum luteipcn, cdvlo cdcmpc sc iycn, odokkc nok gvlatkunamdok odokkc du:tcr dungapsok anindok kanggoddc okop iycn?” 4Odokkc Jisubv bulum lubito “Ansu-ka:sutoka nolum sc:kosin yadyodbomma:dopc. 5Kapila:nc ngok amin-minsula bojcrungc gvyc, scmpc lula, ‘Ngo:na Kristobv,’ odokkc bulu bojcrungko gvmurla gvyodboyc. 6Odokkc nolu mimag momvnsunamcm odokkc mimag monamlok dc:nc lutadcm tadbegycpc; ka:langka nolum yallo dc:mopckc; Kapila:nc cdcmpc ipcnammc, ckvdaggom odosin gvngapdvdc a:ma:yc. 7Kapila:nc mo:pvsok opvnkvdv:dc opvn akon lukam tadma:pc dagrobyc, odokkc migom du:tcng mo:pc migom du:tcng mo:pv lukam tadma:pc dagrobyc, odokkc dobegtv:begma:namc odokkc angu angu mo:dilo tarcmo:tonc tonycpc. 8Cdc appv:dc ckvdaggom ko:pa:namlok aki:kinampc kirobla kinamongc.
9“Odo bulu nolum mc:dvr-mc:so:dopc imoyc, odokkc mokeyc; odokkc ngok amindok lcgangc appvng opvnc nolum tayumyc. 10Odokkc odo bojcrungc mcpagamyc, odokkc akoncm akonc miru alaglo tolvgmvnsuyc, odokkc, akoncm akonc tayummvnsuyc. 11Odokkc bojcrungko Ru:nckc agomcm lume:pc lungornc lenna odokkc bojcrungko gvmurla gvyodboyc. 12Odokkc aima:pc ager inamc bojcru:pc inam lcgangki, abayang tani:kvdv:dok aipc mc:nam mcngasuyc. 13Ckvdaggom sc:kobv du:tcrdungapdo:pc sijcmna du:ycnc bv turycpc. 14Odokkc sc migom du:tc:dok tadponc lutadscm mo:pv appv:so lungapbiyc, appvng opvnnok lukansubinampc; odokkc cdc gvtcr gvngapdc a:yc.
Kvnggv:pc Pcsopcnam Pcsodc
(Mark 13.14-23; Lu:k 21.20-24)
15“Cdcmpila cdvlo nolu Ru:ncpvnckc agom lungornc Danielkc lunam mokulupnc napvnarc:ma:ncdcm ka:begycnc, narc:nc dungko mo:pvdo du:dopc (Ponckvdv:dcm mcngkinmotoka, sc:koi podagnc,) 16Odo Judia:dok du:nckvdv:dc adi:kvdv:do:pc dugamka:lang; 17sc:ko okum mv:dumto du:nc okum ara:bo bvkkc okko du:ji gvilangkula la:moyokuka; 18odokkc arvgolok du:ncdcm gvlatlangkula bvk gcnam attarcm la:moyokuka. 19Odokkc yo:wc:ba:ba sc:kobulukkc amvrro du:ycnc odokkc sc:kobulu anyugcm sunla du:ycnc bulukkc mc:dvrc a:yc! 20Kumtoka noluk duggcnamdcmjen dvgvnno cdcmanggom ager germa:pc yodla du:nam longcdo:ma:ycpc. 21Kapila:nc odo okolosinci dungko-ycko kama:nampc iycpc lendoa:dodokkc cdcmpc ikvmang mo:pvso su:paklo:pc, cdcmanggom cdvlosinci ikuma:ycbong. 22Odokkc cdc longc kvdv:dcm andc:momangamvlo, oko tani:taworcsin turma:ya:pc; ckvdaggom agom tadjvgla gvmvnnc bangula lc:nam kvdv:dok lcgangc cdc longckvdv:dcm andc:moyc. 23Odo sc:koi akonc nolum luycmvlo, ‘Ka:toka, sidc Kristobv dung!’ Cdcmanggom ‘Vlv: clc Bv dung!’ Cdcm mc:jvgyoka. 24Kapila:nc lume:lunc Kristo odokkc Ru:ncpvnckc agom lume: lungornc tani:yc lenyc odokkc bottcru:nc kanggodcmbulum odokkc mcngapla:ma:nam agercmbulum lcngkanyc, cdcmpc gvmurra gvyodbopc cmna, pagmvlo, agom tadjvgla gvmvnnc balenna lc:namkvdv:dcmci. 25Ka:toka, ngo nolum po:pcbong luno:bitu:bong. 26Cdcmpidag, bulu nolum luycmvlo, ‘Ka:tok, Bv clc sv:lungclc,’ mo:rongolo:pc gvlenyoka; bulu luycmvlo, ‘Ka:toka, Bv arangkc soyardc dung,’ cdcm mc:jvgyoka. 27Kapila:nc yari:yc sangatokkc arra owabo:pc arpv:donc, tani:kc Awodc:sin gvdokudod cdcmv:pc iycpc. 28Okoloi simangc du:ycnc, oddoi sogumkvdv:dc dcngkumsuycpc.
Tani:kc Awodc Gvkunam
(Mark 13.24-27; Lu:k 21.25-28)
29“Vgcmpc dungko-ycko kamanggcdopc inam longckvdv:dok lcdudo do:nyc ka:lenma:yc, odokkc po:lotc lolatma:yc, takarkvdv:dc do:mvrtokkc kcdledamyc, odokkc do:mvrtok kvnggvngkvdv:dcm tornc atvkvdv:dcm mokugamyc; 30odo tani:kc Awodok kanggodc taycng amo:to lenyc, odokkc mo:pvso tani: appvng opvnkvdv:dc kaptakri:taksuyc, odokkc bulu tani:kc Awodcm do:mvrtok mukkang tayc:lo tornamki odokkc bottcru:nc migangki gvdokupc ka:begyc. 31Odo Bvk lutad lunc tani:kvdv:dcm bottaru:pc bc:nc tu:lungki mulla gogyc, odokkc bulu Bvk balenna la:nam tani:kvdv:dcm appv:lokkcm gogkumsuyc, do:mvrtok among du:tcr akolokkc du:tcr akondo:pc.
Tajvg Vsv:dokkcm Ka:yirsunam
(Mark 13.28-31; Lu:k 21.29-33)
32“Tajvg amv:dokkc odok luyirko tattok: odok rcngke:kvdv:dc rcmagla oiyin nginnendanbo:mvloi, nolu kindag dviyc aninka:bong. 33Cdcmv:pc, cdvloi no cdc atv appv:dcm ka:begycnc, nolu kinna:bongka Bv aninpc pvnga:dungkubong, yabgo ru:yardo:pc. 34Aropakpc, ngo nolum lubidung sc ayirsok tani:kvdv:sc yogma:yc sc atv appv:sc lenma:sisscm. 35Taycng amongtc: odokkc tani:amo:sc yogpagyc, ckvdaggom ngok agomkvdv:dc yogma:yc.
Sc:kosin Cdc Longcdcm odokkc Ayirdcm Kinmang
(Mark 13.32-37; Lu:k 17.26-30,34-36)
36“Ckvdaggom cdc longcdok ayirdcm sc:kosin kinma:yc, taycngamo:to Ru:ncpvnckc lutad lunckvdv:dcsinci, cdcmanggom Awodc:sin, cmpige:la Abudok atcro:dc. 37Noakc longckvdv:dcmpc, tani:kc Awodok gvdoku longcdc iyc. 38Kapila:nc bottcru:nc pu:mi: asidok po:pckc longckvdvdcmpc bulu dola:-tv:la dungai, midangcm langa:la odokkc midangcm bila dungai, Noakc ja:ji ollu:do a:do longcdo:pc, 39Odokkc bulu kinsutomang pu:mi: asidc bidla bulum appv:dcm bidpu: pulu:la bidam bomma:sisscm, cdcmv:pc tani:kc Awodok gvdokudodo:sin iyc. 40Odo tani: anyikonc arvgolo du:yc; akoncm gvboycku odokkc akondcm mcpakyc. 41Ki:parro nc:ng anyikonc donam vla du:yc; ako gvboycku akondcm mcpakyc.
42“Toya:la du:tok cdcmpidag, kapila:nc nolu kinmang oko longcdo noluk Ru:tumdc gvyckuji. 43Ckvdaggom scm kintoka, okumdok ru:tumdc yumcdok oko ayirdo dopso:dcm gvangkaji cdcm kinya:mvlo, bv darbomsula du:ya:pc odokkc bvk okumdcm dopso:moma:ya:pc. 44Cdcmpidag nolusin mosv:sula du:pa:ru:yc; Kapila:nc tani:kc Awodc noluk gvyckupc cmna mc:ma:do ayirardo gvycku.
Mc:dapncdc Cdcmanggom Mc:dapma:nc Ager Gerya:ncdc
(Lu:k 12.41-48)
45“Sc:kon cmpcmvlo mc:dapnc odokkc kinnc ager gerya:ncdc, sc:kom bvk ru:tumdc bvk okumcra:d togc:lvgtonc, buluk apincm dodvdo bidopc? 46Cdc ager gerya:ncdc aipai pa:nc sc:kom bvk ru:tumdc cdcmpc ila du:dopc bvk gvdokudo pa:yckuji. 47Aropakpc, ngo nolum lubidung bvk attar appv:dcm bvkkolo togc:lvgyc. 48Ckvdaggom cdc aima:nc pagbodc av avdc lusuyc, ‘Ngok ru:tumdc pvngkuma:da,’ 49odokkc bvk pagbo ajonkvdv:dcm dcmrobbomyc, odokkc doyc-tv:yc tvngvrsunckvdv:dokki tv:yc, 50Pagbodok ru:tumdc longckoncm gvycku cdvlo bv bvm gvyckupc cmna mc:ma:ycji odokkc oko ayirdcm bv kinma:ji, odokkc bvm mogvtomomatycku 51odokkc bvm agom lc:sula lcngge:la lunckvdv:dok dungkolo lc:yc; odo tani:kvdv:dc kaptaksuycku odokkc buluk a:yckvdv:dcm dokcrcbamsuycku.

നിലവിൽ തിരഞ്ഞെടുത്തിരിക്കുന്നു:

METIU 24: MISIBSI

ഹൈലൈറ്റ് ചെയ്യുക

പങ്ക് വെക്കു

പകർത്തുക

None

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

METIU 24 യുമായി ബന്ധപ്പെട്ട സ്വതന്ത്ര വായനാ പദ്ധതികളും

നിങ്ങളുടെ അനുഭവം വ്യക്തിപരമാക്കാൻ യൂവേർഷൻ കുക്കികൾ ഉപയോഗിക്കുന്നു. ഞങ്ങളുടെ വെബ്‌സൈറ്റ് ഉപയോഗിക്കുന്നതിലൂടെ, ഞങ്ങളുടെ കുക്കികളുടെ ഉപയോഗം ഞങ്ങളുടെ സ്വകാര്യതാ നയം-ത്തിൽ വിവരിച്ചിരിക്കുന്നതുപോലെ നിങ്ങൾ അംഗീകരിക്കുന്നു