MATHIU 10
10
Echhi Wanii Jisu Moattat Chhoante
(Mak 3.13-19; Luk 6.12-16)
1Jisu ma ate dijunte echhi wanii pa roamroo lahma, thinnâng juchhih junloat rãng, jatrup khoanchet, ngale khun atam heh sênsietrãng chaan kohwah. 2Echhi wanii Jisu moattat chhoante mînpa areheh dângwah: Khebâng pa Simon (Atenâng piter ngamemin ngaeka) ate pho Andru; Jems ngale ate pho Jon Zibidi chha; 3Filip ngale Batholomi; Thomas le thãkho hâte Mathiu; Alfais chha Jems, ngale Thadi: 4Diakrãng latte Simon, ngale Jisu chênsângte Juda.
Echhi Wanii Moattat Chhoante heh Moatlem
(Mak 6.7-13; Luk 9.1-6)
5Are echhi wanii mihnyan heh Jisu ma rîn akhah lahma chienchhoan wah: Atema ngatwah, “Jews ledangte diak hendiak nângmin nekchhoan en ngale Samaritan hah nângmin nekchhoan en. 6Ere noma Isrial humkâ wah mahsamte saak heh tânâng chhoan en. 7Chhoan letma thôchhoankoh en, ‘Rangkhethung Hahsông pa lânam katha!’ 8Khun atamte heh mesiet, ritte heh ngakhinsiet, angêm khoanchette heh sensiet, juchhih heh junlo re en, nema thãhoma chohkenpa thãhoma koh en. 9Ne tõng akhak nâng ngun akem ngale lihân sêmmak nek hèn chhoan en; 10Ne lemkhôam korãng tõng akhak, khet akhu bâm, dapheng ngale menthun min nekkep en, chenrãngma ngako, moatlem moatte hehnâng thinma chenni lemeka erepa kohmin.
11“Chenthu mihnok mihhah hehnâng mehû tetko, henma ne tãngroo ehèn a, erepa lemsû en, ngale erehah kowah mangak ngakchhoan ate demnâng tongen. 12Chenthu ne humkhen nâng menyup wãng tetko, ‘nenâng Joban ma rang ekohhèn ngama rânjab en.’ 13Ere hum kowah mihnyan hehma metãngroo hènko, nema thinrãng rangsoam kotet pa thinkhoh nâng chentonga; rohkomin thinma letangroo medang hènko, nema rangsoam kotet heh ngakkep re en. 14Ngale chenre humkâ ba hahdaang ma ne letangroo, erediko ne ngin lekep medang hènko, erethe kowah loatchhoan ko neda wah bum kheb eka pemin finekthien en. 15Ngama nenâng linlin thôkoh eka, Joban ma metloat rangwo jâko erehah kowah mihnyan hehnâng mînchen noma Sodom ngale Gomora wah mihnyan hehnâng ba ajah emînchèn a!
Ahokmin Chêmchei
(Mak 13.9-13; Luk 21.12-17)
16“Tat en! Ngama nekhu soan chhangnâng saak rãngrãng chienchhoan eka. Erohwah, pû rãngrãng nyahhîn dangen, ngale phâriwo rãngrãng mihnum dangen. 17Jetletma dangen, chenrãngma ngako, nea khhek lahma metloat thinnâng siethok rãng mihnyan heh tonga, ngale Sanagog nâng siethû lahma ewat hèn. 18Diak pênte ngale lowang heh, erediko Jews ledangte hehnâng ngawah Nginkongsen pa jienthôkoh rãng thin tânâng met elohû hèn. 19Chenthu thinma metloat ko, chenroh dânthâng min a, ngale chenli dânthâng min a ngama neksekmah en; nema dânthâng thinpa ere sanpoatko Joban ma ethôkoh hèn. 20Chenrãngma ngako nema loatjabmin jabkhab pa newah ledangmin; ere jabkhab heh ne Wa Joban Ju ngewah kalahma nema ehongjab en.
21“Phoma naapa eritphethuk a, ngale wama chha hehmin eroh eritphethuk a; chha hehmemin thin nyong awa lelatnâng dãnglahma eritphe thuk a. 22Anga ngama ngajunma nenâng emitchek hèn. Rohkomin henhen pa athôan kotuk dâlemsen lektong eka ere hehba khope min. 23Chenthu thinma hahdaang wantheko mechêmsiet hènko, hahdaang ahan wantheko danchhoan en. Ngama linlin thôkoh eka, Mihnyan Chha ngakkat mako Isrial hahdaang kowah nemoatlem pa chenthumin leta thôanmin. 24“Ahete henmin ate hethôte noma adong dangmah; ngale haa henmin ate tângtewa noma adong dangmah. 25Erohwah ahete pa hethôte rãngrãng dângko rinmemin, ngale haapa ate tângtewa rãngrãng dângko rinmemin. Humkâ kowah khhepho thôanko Bilzibul ngama menga ako, humkhen kowah ahan mihnyan heh nângjã chentô chhih ngatmin a!”
Henran Cheimin a
(Luk 12.2-7)
26“Erohwah mihnyan ran nekchei en. Athângheh chentô huhthien eka heh phangtang laangjâ rêmin, ngale athângheh chentô riem eka ereheh loatjâ rêmin. 27Ngama rangnyek nâng chenni thôkoh eka, arepa nema rangwo nâng thengak thôngthô kohmin, ngale nema chenni huhtat eken a, arepa humkho nâng kowãng letma rakthômin. 28Phoang ritphete ran nekchei en, thinma ju taritphe mah; Ere noma phoang ngale ju wanniinii pap wendô nâng rokthhek lahma târitphete Joban ran chei en. 29Nema ngunpha phathe pumma wasaangsut wochha wannii tarii en, rohkomin ne Wa Joban ma lejet thangma wochha wanthemin hahko mahjâ riimah. 30Nekho wah khochoo heh tumin phangtang weih lahma thieneka. 31Erohwah nekchei en; nea jahmõang wochha nomemin thãchaan!
Krista Nginkepte ngale Lekepte
(Luk 12.8,9)
32“Henma komin nok atang mathahko atea ngarãng ngama meloatjab ako, ngamemin rangkhethung wah tôngte nga Wa mathahko erohjô eloatjab ang. 33Phumma henma komin nok atang mathahko nga medak hangko, ngamemin rangkhethung wah tôngte nga Wa mathahko atemin erohjô edak ang”.
Mêmo dangmah Dãng
(Luk 12.51-53; 14.26,27)
34“Are hahtokkhoh ko ngama mêmo kohrãng kaerâng ngama nekthonghun en. Ngama mêmo kohrãng kat dangmek, dãng loamrãng kaerâng. 35Nga kaerâng pa delachha pa ate wa lelatnâng dang, erediko dihiakchha pa ate nyong lelatnâng dang, ngale nem pa ate nyipanyu lelatnâng dangthuk rerãng kaerâng; 36Mihnyan rãngma ranchhih thôanpa ate humkâ wah mihnyan pa dângmin.” 37“Henhen ma ate nyong awa nâng nganoma ajah huneka arepa ngadijunte tadangmah; ngale henhenma ate chha dela ba dihiak nâng nganoma ajah huneka arepa ngadijunte tadangmah. 38Henhen ma ate bãngphak pa lepe thangma nga damãnko toanlahma ngadijun ehanga, arepa ngadijunte tadangmah. 39Henhen ma ate roandông rãng lololem eka, arepa mahto nâng edanga. Rohkomin henhenma ate roandông pa ngarãng koheka, erehehma khope echoh a”
Moatlem Moatthã Choh
(Mak 9.41)
40“Henma komin ne metãngroo hènko, erepa nganâng tãngroo ehang; ngale henma nga tãngroo ehanga, arepa nga chienkatte pa tãngroo eka. 41Henma komin mõngnâng atea mõng dângjunko asenma tãngroo eka, atema mõngthã echoh a. Ngale henma komin mihnyan senpa, atea mihnyansen dângthã asenma chohtãngroo eka, erepumma mihnyan senthã chohmin. 42Erediko henma komin, ngadijunte dângthã, ngadijunte hehwah arinthôan wathe nâng jokih koapthe mejokthuk ako, ere thãpa atema metkep chohmin.”
നിലവിൽ തിരഞ്ഞെടുത്തിരിക്കുന്നു:
MATHIU 10: NOKTBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
