Mateyi 4

Kuyeshiwa kwa Yesu

Maliku 1:12-13, Lukasi 4:1-13

1Pambeli Mfuki Mng'alili amulongushili Yesu mbaka kucheja ili ayeshiwi na Lijangavandu. 2Kayikaja kulya majuva milongu mchechi pamusi na pamihi, pambeli kawona njala. 3Topi, Mwafu kamwisila, kamuwombela “Leki yuwi kuva Mwana wa Chapanga nakaka, deti migonguveli ayi yivi filivi.” 4Yesu kamuyangula, “Yiyandikiwa mumayandiku Vang'alili.

Mundu akwikala kwa kulya filivi weka hela ha,

ila kwa chilongu chochosi chadeta Chapanga.”

5Pambeli Lijangavandu kamtola mbaka Yelusalemu, mbwani ying'alili, kamvika pambindi ya mnala wa nyumba ya Chapanga. 6Kamuwombela, “Leki nakaka yuwi kuva mwana wa Chapanga, widangi pasi, kwanongwa yiyandikiwa mumayandiku Vang'alili

‘Chapanga davalayishi makungu vaki vakuyangi mumawoku vawu,

ukotoo kuponikela mumigonguveli’”.

7Yesu kavawombela, “Yiyandikiwa mumayandiku Vang'alili, ukotoo kumuyesha Chapanga, Bambu waku.”

8Pambeli Lijangavandu kamtola mbaka pambindi ya chidunda chitali, kamlangusha wutwa shosi na ukomi waki. 9Lijangavandu kamuwombela, “Fyosi afi ngukupa pawundundamila.”

10Topi Yesu kamuwombela, “Kopoki apa Lijangavandu! Yiyandikiwa mumayandiku Vang'alili mtundamili Chapanga Bambu waku na kumkimbanikila mweni hela.”

11Topi, Lijangavandu kawuka kamuleka Yesu na makungu vayisa, kumukimbanikila Yesu.

Yesu akukanda chichuku aku Galilaya

Maliku 1:14-15, Lukasi 4:14-15

12Yesu apikanilili kucha Yohani mbatisha vamutatila muchijaka, ayendili Galilaya. 13Awukili Nasaleti, kayenda kwikala mumbwani ya Kapelinaumu, muluwongu ya lihiva lya Galilaya mumbaka ya wilaya ya Sebuloni na Nafutali. 14Ayi yagolikili ili chila chilongu chadetili mbuyi wa Chapanga Isaya chivi,

15“Mlima wa Sebuloni na mlima wa Nafutali

yavelili mudeha ya kuyenda kulihiva lya Galilaya mwambu ya lweni Yoludani na

mumlima wuvayikala vangajila kuva Vayawudi.

16Vandu vayikalili kuchisi,

vawonili lwengi lukomi.

Na vala vayikalili mulisisi lya njifwa,

lwengi luvang'alikila!”

17Kukandila chipindi achi Yesu akandili kulandula, padeta, “Mupomeli, kwanongwa wutwa wa kumbindi kwa Chapanga wuva pabehi!”

Yesu akuvakema vandundami va kwaa

Maliku 1:16-20, Lukasi 5:1-11

18“Yesu patyangeyi muluwongu lwa lihiva lya Galilaya, avawonili vandu vavili yivavelili ulongu. Vavelili Simoni yivamkema Petili pamu na Andeleya, vaveli mulihiva vakufuva vasomba kwa lwafu. Veni vaveli vafuva. 19Yesu kavawombela, mungovikeli, nenga danivagoli muvi vafuva va vandu.” 20Bahala pala, vasileka njafu shawu, vamukovikela Yesu.

21Payendili pawulongolu, kavawona vandu vengi vavili yivavelili ulongu, vavelili Yakobi na Yohani vana va Sebidayu, veni vavelili muwatu pamu na tati wawu pavasambula njafu shawu. Yesu kavakema. 22Tepu vawulekili watu pamu na tati wawu, vamukovekela Yesu.

Yesu akuyendilela na chichuku chaki

Lukasi 6:17-19

23Yesu aveli akuyendayenda mumlima wosi wa Galilaya. Pawula munyumba sha kudadavila na kulandula Chilongu cha nyanyi cha wutwa wa kumbindi kwa Chapanga na kulowola matami kafwauti kafwauti. 24Milandu yaki yakwilili mumlima wosi wa Siliya, vamuyeghela vandu vosi yivavelili na matami, vala yivavelili vakutamika na kuteshiwa, yivavelili na matami va finyamkela na chisilika na vapombalili vamuyeghilili na mweni kavalowola vosi. 25Mipinga mikomi ya vandu yamukovikelili kufuma Galilaya na Dekapoli, mbwani yikemiwili Mbwani Lilongu na kufuma Yelusalemu na kufuma Yudeya na kufuma mbembu yingi ya Yoludani.

നിലവിൽ തിരഞ്ഞെടുത്തിരിക്കുന്നു:

Mateyi 4: NdBV

ഹൈലൈറ്റ് ചെയ്യുക

പങ്ക് വെക്കു

പകർത്തുക