Luku 4

Seetam* í lɛlɛ Jesu

(Cɔ Matie 4:1-11; Maaku 1:12-13)

1Jesu í kɔ̃ò Hundei Ilaaɔ̃ nɔ í baa hai idoi Zuudɛ̃ɛ. Nɔ Hundeu í bɔòɛ si gbaa. 2Nɔ Seetam í lɛlɛɛ bɛ ajɔ ciiji. Nɔ si ajɔu bɛ fei kù jɛ nkãma. Iyi baai nŋu í lɔ, ŋɔi ari wa kpaa. 3Nɔ Seetam í sɔ̃ɔ í ni, bii awɔ Amai Ilaaɔ̃i do ntɔ, jɔ̀ kutau ihɛ̃ ku kpɔò pɛ̃ɛ. 4Nɔ Jesu í jɛaa í ni, kukɔi idei Ilaaɔ̃ í ni, amanɛ ci ya wɛɛ na ijɛ nŋu akã.#4:4 Cɔ Wooda ku kɔsi 8:3.

5Nɔ Seetam í bɔòɛ hee antaii iri kuta gɔ, í nyisiɛ bommai andunya fei si iju kãmɛɛ. 6Nɔ í sɔ̃ɔ í ni, amboei bomma ŋau fei an muuɛ nɔ an jɔ̀ i nɛ yiiko si ŋa. Inɛ iyi ǹ bi, lafɛ̃ɛi an mua, si na iyi í jɔ̀ à nam nii. 7Na nŋu, bii ì naa ì gulɛ si wajum, fei ndɛɛ á jɛ tɛɛ. 8Nɔ Jesu í jɛaa í ni, kukɔi idei Ilaaɔ̃ í ni, Aɔ̃ Lafɛ̃ɛɛi aa gulɛa, nɔ nŋu akãi aa tɔɔ.#4:8 Cɔ Wooda ku kɔsi 6:13.

9Nɔ Seetam í gbãa í bɔòɛ Zeruzalɛmu nɔ í gũòɛ hee si antaii ile lelei kpasɛ̃i Ilaaɔ̃ nɔ í sɔ̃ɔ í ni, bii awɔ amai Ilaaɔ̃i, fo i dingaa ilɛ, 10domi kukɔi idei Ilaaɔ̃ í ni, Ilaaɔ̃ á na amalekaɛ ŋa wooda na iriɛ a maa degbeɛ, 11nɔ a maa muɛ si awɔ ku ba i maà ti i koosɛ si kuta.#4:11 Cɔ Iri ku kɔ̃ 91:11-12. 12Ŋɔi Jesu í jɛaa í ni, kukɔi idei Ilaaɔ̃ í ni, maà ti i sii Aɔ̃ Lafɛ̃ɛɛ.#4:12 Cɔ Wooda ku kɔsi 6:16. 13Iyi Seetam í lɛlɛɛ do yaase ikã ikã fei í tã, ŋɔi í jɔ̀ɔ titã í nɛ hee waati mmu gɔ má.

Jesu í sinti icɛɛ Galilee

(Cɔ Matie 4:12-17; Maaku 1:14-15)

14Nɔ Jesu í nyi ikpa ilɛi Galilee do gbugbãi Hundei Ilaaɔ̃, nɔ iriɛ í fangaa si ilɛu fei. 15Wa kɔ ŋa si cioi idei Ilaaɔ̃ ile bii Zuifu ŋa à ya ce kutɔtɔɔ nŋa ŋa, nɔ inɛ fei wa saabuɛ.

À kɔ̀si Jesu Nazarɛti bɛ

(Cɔ Matie 13:53-58; Maaku 6:1-6)

16Nɔ Jesu í bɔ Nazarɛti ilu bii í jɛ amau. Ŋɔi si ajɔi kusĩmi í bɔ ile bii Zuifu ŋa à ya ce kutɔtɔɔu si bɛi í nɛ dɔ̃ɔnɛɛ. Ŋɔi í dede ku cio tia. 17Ŋɔi à náa tia iyi Ezai waliiu í kɔ. Si bɛi wa fũu ŋɔi í kã si kukɔ gɔ iyi wa ni,

18Hundei Aɔ̃ Lafɛ̃ɛ í wa sim.

Í cicam n sisiaò ilu are ŋa laabaau jiidau.

Í bɛm n koo n sɔ̃ inɛi piisɔ̃ɔ ŋa n ni aa jɔ̀ ŋa a nɛ

nɔ n sɔ̃ fɛɛju ŋa n ni aa yɛ ilu má,

nɔ n jɔ̀ inɛ ŋa iyi inɛ ŋa à waa taa gbugbã a nɛ ara nŋa.

19Nɔ n sisia inɛ ŋa n ni awaatii didɔ̃i Lafɛ̃ɛ í to wa.#4:19 Cɔ Ezai 61:1-2.

20Ŋɔi Jesu í ka tiau má í sindoa woo ce icɛu nɔ í buba. Ŋɔi inɛ ŋa iyi à tɔtɔɔ bɛ fei à kãsiɛ iju. 21Ŋɔi í sinti ideɛ ku sɔ̃ ŋa í ni, nnyii kukɔi idei Ilaaɔ̃ iyi ì gbɔ nsɛiu ŋa í kɔ̃.

22Ŋɔi aŋa fei à waa jɛaa sɛɛda jiida, nɔ biti í mu ŋa do ide didɔ̃ iyi wa fita hai si gɛlɛɛu. À ni, kù jɛ amai Zozɛfuu mbɛ ya. 23Nɔ Jesu í sɔ̃ ŋa í ni, kù nɛ sika aa kpaam mɔndau ihɛ̃ i ni ŋa, awɔ lokotoo, faaba araɛ. Ce si iluɛ ihɛ̃ mii ŋa iyi à gbɔ ì ce Kapɛranumu fei. 24Amma an sɔ̃ ŋɛ, walii kãma kù wɛɛ iyi í ya nɛ bɛɛrɛ si ilui nŋu takaɛ. 25Ì mà sãa sãa ŋa iyi ari nla gɔ í ce si ilɛu fei si waatii Elii walii nlau. Ijĩ kù wɔ si afei adɔ̃ mɛɛta do cukpa mɛɛfa, mà irei. Waati bɛɛbɛ inaabo jaaɔ̃ nkpɔi í wa si ilɛi Izirɛli. 26Do nŋu fei, Ilaaɔ̃ kù bɛ Elii walii nlau bi kãma nŋa bii kù jɛ bi jaaɔ̃ gɔ iyi í wa Sarɛpita si ilɛi Sidɔ̃ɔ. 27Nɔ dintɛ nkpɔ mɔi í wɛɛ wo si ilɛi Izirɛli si waatii Elizee waliiu. Do nŋu fei, kù jɔ̀ gɔgɔ nŋa gɔ ku ba iri, bii kù jɛ Naama inɛi ilɛi Siriu.

28Iyi Jesu í fɔ bɛɛbɛ í tã ŋɔi idɔi inɛ ŋa iyi à wa ile bii à ya ce kutɔtɔɔu bɛ fei í kɔ̃. 29Ŋɔi à dede à leleɛ hai inɔ iluu à bɔòɛ hee si antaii iri kuta si bii à ma ilu nŋa ku ba a taleɛ wa ilɛ. 30Amma í lɔ anini nŋa bɛ í nɛɛ.

Jesu í lele inɛi inɔɔko hai si inɛ gɔ

(Cɔ Maaku 1:21-28)

31Nɔ Jesu í bɔ Kapɛranumu, ilui Galilee gɔ nɔ wa kɔ inɛ ŋa si cioi idei Ilaaɔ̃ si ajɔi kusĩmi. 32Wa kɔ ŋa si cio do yiiko. Nŋui í jɔ̀ ideu í tosi ŋa. 33Wee mɔkɔ gɔ í wa ile bii Zuifu ŋa à ya ce kutɔtɔɔu bɛ í nɛ inɛi inɔɔko, ŋɔi í dɔ̃ anu hee lele í ni, 34mii í wa si gãmɛi awaɛ ŋa awɔ Jesu inɛi Nazarɛti. Ì naa ku kpa wai? Ǹ mà inɛ iyi ì jɛ. Awɔi ì jɛ Inɛ Kumá iyi Ilaaɔ̃ í bɛ wa. 35Ŋɔi Jesu í la siɛ í ni, coko, fita hai si mɔkɔu. Ŋɔi inɛi inɔɔkou í ta mɔkɔu ilɛ si anini nŋa, nɔ í fita siɛ, kù mɛɛ. 36Ŋɔi aŋa fei à biti, à bee njɛ aŋa duusɔ̃ɔ à waa ni, ide dimi yoomai ihɛ̃. Mɔkɔu wee wa sɔ̃ inɛi inɔɔko ŋa ide do yiiko do gbugbã nɔ à waa fita. 37Ŋɔi iriɛ í fangaa si ilɛɛkoi iluu fei.

Jesu í jɔ̀ bɔ̃ɔ nkpɔ í ba iri

(Cɔ Matie 8:14-17; Maaku 1:29-34)

38Ŋɔi Jesu í fita hai ile bii à ya ce kutɔtɔɔu, nɔ í bɔ kpasɛ̃i Simɔɔ. Wee iyei aboi Simɔɔu wa ce bɔ̃ɔi ara gbãa ntɔ ntɔ. Ŋɔi à tɔɔɛ ku jɔ̀ ku ba iri. 39Ŋɔi í kɔmba si abou í la si ara gbãau nɔ í nya. Nɔ abou í dede gbakã í yaaɛ ŋa.

40Alɛi ajɔ nŋu iyi inunu í lɔ, ŋɔi inɛ ŋa iyi inɛ nŋa ŋa à waa ce bɔ̃ɔ dimi ikã ikã fei à wasi ku naaò ŋa wa bi tɛɛ. Nɔ í lesi aŋa fei awɔ í jɔ̀ à ba iri. 41Inɛi inɔɔko ŋa mɔ à fita hai si inɛ nkpɔ, à dɔ̃ò anu à waa ni, awɔi ì jɛ Amai Ilaaɔ̃. Amma Jesu í la si ŋa nɔ wa ganji ŋa ide ku fɔ domi à mà iyi nŋuu inɛ iyi Ilaaɔ̃ í cicai.

Jesu wa waazo ilɛi Zudee*

(Cɔ Maaku 1:35-39)

42Iyi iju í má ŋɔi Jesu í fita hai inɔ ilu í bɔ gbabua. Ŋɔi zamaa nla nla gɔ wa dɛdɛɛ. Iyi à to bi tɛɛ ŋɔi à tɔɔɛ suuru ku maà nɛ ku jɔ̀ aŋa. 43Amma í sɔ̃ ŋa í ni, kù nɛ bɛi an ce iyi n kù waazo laabaau jiidai bommai Ilaaɔ̃ si ilu mmu ŋa má, domi na nŋui Ilaaɔ̃ í bɛm wa. 44Iyi í fɔ bɛɛbɛ í tã nɔ í koo í dabii wa ce waazo ile bii Zuifu ŋa à ya ce kutɔtɔɔ ŋa ilɛi Zudee.

നിലവിൽ തിരഞ്ഞെടുത്തിരിക്കുന്നു:

Luku 4: MKL

ഹൈലൈറ്റ് ചെയ്യുക

പങ്ക് വെക്കു

പകർത്തുക