TÎRTÔNHAI SINTHO 13

Barnaba le Saula an inthangna le tîr suak

1Khan, Antiokei Koiindang mihai laia khan deipuhai le tîrtônhai an oma. Khahai kha Barnaba, Simeona (Nigera, an ti) Kurini mi Lukia, rêng Heroda’n#13.1: Hi Herod hi Herod Antipas, Galili rama roirêltu kha a ni, (Lk 3.1 en ro). urênga a inei Manaina, Saula hai an nia. 2Bu an ngheia Rengpa an biak suam laiin Irtha Irthiangin, “Barnaba le Saula hi anni ki inkungna san tho hrangin ni’rsentir roi,” a tia. 3Khanchu, bu an ngheia, an chongchaia, an chunga kut an irnghata, an tîr suak ta.

Tîrtônhaiin Kupra chômbunga thu an hril

4Khanchu, Irtha Irthiang itîr suakin Selukai khuaa an chuma, khatak ata khan Kupra chômbunga irkuangin an fea. 5Salamis khua an tungin chu Judahai Sinagokhaia Pathian thu an hrila. Johan Marka khom anni changpuitu hrangin an hruai sa.

6Chômbung kha Pafos khua dênin an irfang suaka. Dôithei, deipu dol, Juda mi inkhat, Bar-Jisua an hmua. 7Kha mi kha Ramoptu vâr tak Sergia Paula kuanga om a ni. Kha Ramoptu khan Barnaba le Saula kha chai hrangin a fiala, Pathian thu inhriat a nuama. 8Eluma, dôithei (Kha kha Grik chonga a’rhming a ni.) khan Ramoptu kha iamna thu kha in-iam notir a tuma, anni kha a sêlhaia. 9Saula, Paula an iti kha, Irtha Irthiangin a sipa, ama kha a en chiana, 10“Diabola nâipa, satna tinrêng râlpa. Milak tinrêngin ni sipa, zoro tina Pathian thutak hi thu no inchang ni itum ngai a ni. 11Irngai roh, atûn Rengpa kut hi ni ituang hrang a ni; ni mit cho a ta, sun khovâr hmu ta no chi ni,” a tia. Khanchu, sûm le inthimin ama kha a zui zôi zel tâka, a hruai hrang mi zongin a’rvâk a’rvâk thiai tâka. 12Khan, Ramoptu khan thil hong om kha a hmua, Rengpa irchutirna thu kha a’rkhêl a ti oka, a iam tâka.

Pisidia rama Antiokei-a Barnaba le Paula thu’nsîr

13Paula le a rualhai chu Pafos ata irkuangin an suaka, Pamfulia rama Perga khua an tunga, Johan Marka khan anni kha a’rheisanhaia, Jerusalema a kîr nôk tâka. 14Perga ata kha Pisidia rama Antiokei khuaa an fe zêla. Sabat niin Sinagoka inkhômin an toi sa. 15Dân bu le deipu Lekhabu tep zoi chu Sinagok hruaituhai khan mi an tîra, “Urênghaio, nin ni inthorna hrang thu imo nin neiin chu insîr roi,” an va tia. 16Khanchu, Paula chu a ngîra, kutin a zâpa, an sîr tâka.

“Nangni Israel mihaio, irngai roi. 17Hi Israel mihai Pathian hin ei irchibulhai kha a lei inthanga, an mikhualna Aigupta rama an om sûng khan nam roiinpui taka a siama; khatak ata kha a sinthotheina roiinpui tak hmangin a hruai suakhaia.#Fes 1.7; 12.51 18Kum sômminli ramchâra khan an sinthohai kha an en thei maia.#Nam 14.34; Dhn 1.31 19Kum irza minli sômringa sûnga khan Kanaan rama nam sari ar hmangtira, an ram khom a mihai a pêk ta.#Dhn 7.1; Jos 14.1 20“Kha hnunga khan roirêltuhai a pêk zela, deipu Samuela dênin,#Roi 2.16; 1 Sam 3.20 21Khan, kha hnunga khan rêng an nghia, khaang khan, Pathianin Saula, Kisa nâipa, Benjamina irchia mi kha kum sômminli sûnga an rêng hrangin a pêkhai ta.#1 Sam 8.5; 10.21

22Ama kha a hnôl hnunga khan an rêng hrangin Davida a siam ta. Kha chungchâng kha Pathianin hiang hin an sîr. “Davida, Jesaia nâipa, ki lungchuk mi ki hmu ta, ama khan sin hranga ki inuam murdi sin a ti,” a tia.#1 Sam 13.14; 16.12; Ipn 89.20

23Pathianin a lei inkung tâk ang khan, kha irchihai laia irthoka khan Israel mihai Saninhringtu Jisua a zuang intung a ni. 24Jisua’n a sin a phut mân khan, Israel mihai an sual an irleta baptisma an changna hrangin Johana’n thu an sîr pe ngai.#Mk 1.4; Lk 3.3 25Khan, Johana’n a sintum a zoi hrang tôn khan mipuihai laia, ‘Tu mo a nih ti nin ni iam? Nin inghâktu kha keima hi ni ma ung. Khannisianlân, irngai u ta! Ki hnunga zuang a ti, kei chu a kekok khek hrang luan inruk ma ung,” a tia. #Mt 3.11; Mk 1.7; Lk 3.16; Joh 1.20,27

26Urênghai, Abrahama irchihai le nangni Pathian chi mi dang murdihaio, kha saninhringna thu kha ei rênga kuang a zuang itung ta a ni. 27Jerusalema omhai le an roirêltuhaiin ama kha inhre mahaia, Sabat ni rikipin an itep ngai deipuhai thu an inhriat thiam no sikin ama kha thiam no an inchangtira, deipuhai thu kha an tung irkiptir ta a ni. 28Thina hrang dôr a chunga ite a bi an hmu no khomin, that hrangin Pilata kuang an ngêna.#Mt 27.22-23; Mk 15.13-14; Lk 23.21-23; Joh 19.15 29A thurchi Pathian Thu bu’n a irziak murdi kha a tung zoiin Kros ata an kai suma, thâna an phûm ta.#Mt 27.57-61; Mk 15.42-47; Lk 23.50-56; Joh 19.38-42 30Khannisianlân, Pathianin ama kha mithi lai ata a kaithoi nôk tâka. 31Galili ram ata Jerusalema ama pâla hmunkhata lei lêng suam ngaihai kuang sûn tamtak sûng an lâr ngaia; kha mihai kha atûn hin Israel mihai kuang a thu inhretuhai an ni.#Tîr 1.3 32Keini hi chu Thurchi Sa kha hril hrangin kin izuang a ni. Pathianin irchibulhai kuang thu an kunga, 33eini an irchihai kuanga Jisua kaithoia a hong intung tâk thu hi. Sam inhninaa,

‘Nang chu ki nâipa ni ni,

A vuan hin ki nâia ki nei ta a ni,’

tia irziak ang khan.#Ipn 2.7 34Ramna hmun thâna kîr nôk ta loi hrangin Pathianin ama kha thina irthokin a kaithoi hrangzia thu, hiang hin an sîr:

‘Satvurna irthiang le fel Davida kuanga ki inkung kha nang pe ki ti,’

tiin.#Isa 55.3

35Khasikin, hla danga,

‘Ni mi irthiang chu thâna ram hrangin phal no chi ni,’

a ti sa. #Ipn 16.10

36Davida’n ama zoro ka chu Pathian nuamlam a sina, kha hnung chu a thia, ar chibulhai leh an phûma, a takpum kha thâna a ram tâk. 37Pathianin thina irthoka a ikaithoitu kha chu ram mah.

38Khanchu urênghaio; khasika sual ngaidamna thu nangni kin hong ihril a ni. Mosia Dâna thiam nin chang thei nona murdia khan, 39Jisua iamtu murdi thiam inchangtir an ni ta. Kha kha Mosia Dânin mi thiam a inchangtir thei loi kha a ni. 40Khasikin, irdîn roi, deipuhai lei iti kha nin chunga tung likna ti:

41‘Hmusittuhai,

en u ta! ar khêl ti unglân irhmang roi;

nin dam sûnga sin ki itho hi,

mi’n nangni hrilfiah pe khom sian iam viat no chin ni, iti kha,’

a tia. #Hab 1.5

42Khan, Paula le Barnaba kha inkhôm in ata an suakin chu Sabat ni nôka kha thu kha hong insîr nôk hrangin mipuihai khan an fiala. 43Inkhôm an chîn zoiin chu, Juda mi tamtak le Juda saphun Pathian ngaisak tam takin Paula le Barnaba kha an zuia, an inkhômnaa khan Pathian lungkhamnaa om mai hrangin an inthorhaia.

44Sabat ni nôka chu Rengpa thu irngai hrangin a kho pumpui an hong inkhôma. 45Khannisianlân, Judahaiin mipui an hmu’n chu a sân an hnarsahaia; Paula thu’nsîr kha an sêl irkaltira, an insîr insiata.

46Paula le Barnaba khan hâi takin, “Pathian thu hi nangni kuang hril masa hrang rêng a ni; khannisianlân, nin hnôla, kumtuang hringna nei zel loia nin irngai hnung chu inhre roi, Jentailhai tiang irhei kin ti. 47Khaanga tho hrangin Rengpa’n thu a ni ipêk a ni.

‘Jentailhai invâr hrangin nang kin kung,

kôlkil dêna mihai Saninhringna hrangin,’

ti irziak ang khan,”

an tia. #Isa 42.6; 49.6

48Khanchu, Jentailhai khan kha thu kha an inhriatin chu an lôma, Pathian thu an chôiindôm tâka, kumtuang hringna dong hranga inthang murdihai khan chu an iam tâka.

49Rengpa thu kha ram pumpuia khan an darh ta. 50Khannisianlân, Judahaiin kho sûnga ulianhai le Pathian ngaisak Jentail nupang mahripomhai an inthorhaia, Paula le Barnaba kha an beihaia, an ram ata an inhnot suakhai tâka. 51An idemhai inlangna hrangin tîrtônhai khan an ke zapha ata vâiphin an hui thâka, Ikoniom khuaa an fe tâka.#Mt 10.14; Mk 6.11; Lk 9.5; 10.11 52Irchutirhai kha Irtha Irthiangin an sipa, a sân an lôm tâka.

നിലവിൽ തിരഞ്ഞെടുത്തിരിക്കുന്നു:

TÎRTÔNHAI SINTHO 13: HRACLBSI

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

Hrangkhol CL Bible - PATHIAN LEKHABU IRTHIANG

PATHIAN LEKHABU IRTHIANG C.L. Bible (BSI) നെക്കുറിച്ച് കൂടുതലറിയുക