Псалми 8:1-9
Псалми 8:1-9 Свето Писмо: Стандардна Библија 2006 (66 книги) (MK2006)
Јахве, Господи наш, колку е величествено името Твое по целата земја! Си ја издигнал славата Своја над небесата. Од устата на новороденчињата и доенчињата си ја создал похвалата Своја заради непријателите Твои, за да го замолкнеш непријателот и одмаздникот. Кога ќе ги погледам небесата, дела на прстите Твои, па месечината и ѕвездите, што си ги поставил Ти: Што е тоа човек, та си спомнуваш за него, или син човечки, па се грижиш за него? Си го направил малку помал од ангелите, но со слава и чест си го овенчал, и си го поставил над делата од рацете Твои, и сѐ си потчинил под нозете негови; овците и воловите сите, и ѕверовите полски; птиците небески и рибите морски, сѐ што се движи по морските патишта. Јахве, Господи наш, колку е величествено името Твое по целата земја!
Псалми 8:1-9 Библија: Стариот и Новиот Завет, Константинов (MKB)
Господи, Боже наш! Колку е величествено Твоето Име по целата земја; Ти ја подигна Твојата Слава над небесата. Од устата на малите деца и на доилчињата, Си зацврсти сила заради Твоите непријатели, за да ги натераш да молкнат: врагот и одмаздникот. Кога ги гледам Твоите небеса, делото на Твоите прсти; месечината и ѕвездите што си ги поставил: Што е човекот за да си спомнуваш за него? Или човечкиот син за да го посетуваш? А Ти го направи само малку подолен од ангелите и го овенча со слава и чест. Го постави за господар над делата на Своите раце; сѐ му потчини под неговите нозе: сите овци и говеда, и полските ѕверови кон тоа; небесните птици и морските риби и сѐ што поминува по морските патишта. Господи, Боже наш! Колку е величествено Твоето Име по целата земја.