Waroma 4
4
Mfwano ghwa Abrahamu
1Ndamu tighoragha ije, ighulu ya Abrahamu ake wa mbari yetu? Yeluo ije kwake? 2Ngera edeilo mhachi ni Mlungu kwa madeo ghake, ni kumacho eluo na kindu chekukasa nacho. Ela sewesi chekukasa hambiri ya Mlungu. 3Mawandiko gha Kuela ghaghora, “Abrahamu omdumuse Mlungu, na kwa undu ghwa idumusi, Mlungu kamdumusila kukala mhachi.” 4Mundu kadea kazi walipo, malipo ghake sighatalogho kukala ni inosi kungi, ela ni kindu apata kwa kudea kazi. 5Ela kwa mundu sedeagha kazi, ela adumusagha uyu awadeagha wakosi wakale wahachi, idumusi lyake lyatalika kukala uhachi. 6Agha nigho Daudi eluo kemanya ngelo eluo keghora ighulu ya maboelo gha mundu edumusogho ni Mlungu kukala mhachi, sikwewo na madeo ghengi:
7“Baha walye wafwilo waya makosa ghawe ni Mlungu,
kaung'a zawe wazibula
8Baha mundu kaung'a zake sizetalogho ni Bwana!”
9Ado, maboelo agha ghaghoriro ni Daudi ni gha walye wachwilo keng'weri? Hata! Maboelo agha ni gha walye siwechwilo nawose. Kwani taona selyi Mawandiko gha Kuela gheghoragha, “Abrahamu omdumuse Mlungu, na kwa undu ghwa idumusi lyake kadumusilo ni Mlungu kukala mhachi.” 10Agha ghanakalile ngelo muni? Ghanakalile hambiri ango nyuma ya Abrahamu kuchwigho? Ghanakalile hambiri sechwilo na si nyuma yechwigho. 11Wanajilechwigho ko nyuma, na uku kuchwigho kwake kukakala alama yeonyeza kamba idumusi lya Abrahamu lyamdea adumusilo ni Mlungu kukala mhachi hambiri sechwilo. Kwa hung'u Abrahamu ni aba wa kiroho kwa wandu wose wamdumusa Mlungu na kudumusilo kukala wahachi kwa ngila yake, hata ngera sani siwachwilo. 12Sena iye ni aba wa walye wachwilo, si kwa kukala wanachwilo tu, ela ni kwa kukala wanakalagha kwa ngila ilya yenyi ya idumusi eluo kekala Aba Abrahamu hambiri sechwilo.
Ilagano lya Mlungu lyapato kwa ngila ya idumusi
13Mlungu omlagile Abrahamu na kivali chake kamba urumengu ghukalagha ghwake. Ilagano ilyi lyanadeilo, si kwa kukala Abrahamu oluo aiwata Sheria, ela ni kwa kukala odumuse na kadumuso ni Mlungu kukala mhachi. 14Kwani ngera ilagano lya Mlungu lyendepato ni walye waiwata Sheria, aho idumusi si kindu chingi na ilagano lya Mlungu si kindu chingi. 15Sheria yanaletagha makwito, ela andu sikowesi Sheria, sikwesi kuwata Sheria zingi.
16Kwa hung'u, ilagano lyeluo ighulu ya idumusi, eri kamba ilagano lyimange sa inosi lya bule lya Mlungu kwa mbari yose ya Abrahamu; si walye tu waiwatagha Sheria, ela na walye wadumuse nawose selyi Abrahamu edumuse. Kwani Abrahamu ni aba wa kiroho wetu itose; 17selyi Mawandiko gha Kuela gheghoragha, “Nakudea uwe kukala aba wa mbari nyingi,” Kwa hung'u ilagano ni lyaloli hambiri ya Mlungu, uyu edumusilo ni Abrahamu - Mlungu uyu ewazusagha wafwile na uyu aghoragha vindu siveluo vikale. 18Abrahamu odumuse na kukoserea, ngelo sikoluo na lyekoserea na kwa hung'u kakala “Aba wa mbari nyingi,” Selyi Mawandiko gha Kuela gheghoragha, “Kivali chako chikalagha chingi sa ndonde.” 19Naye oluo kavui miaka ighana, ela idumusi lyake silyigotue kwa kuririkanya muli ghwake gholuo kavui na kufwa, ango fulo ya kukala Sara sedimagha kupata wana. 20Idumusi lyake silyigotue na sakalile na ngera ighulu ya ilagano lya Mlungu, idumusi lyake lyikapata ndighi; na kamkasa Mlungu. 21Oluo kemanya putu kamba Mlungu ukatisagha ilagano lyake. 22Ni kwa undu ughu Abrahamu, kwa ngila ya idumusi, kadumusilo ni Mlungu kukala mhachi. 23Malagho gha kudumusilo kukala mhachi sighawandiko kwa undu ghwake keng'weri. 24Ghanawandiko kwetu natose; tidimagha kudumusilo kukala wahachi kwa kumdumusa Mlungu uyu amzusile Jesu Bwana wetu kufuma kifweni. 25Iye wanafunyilo afwe kwa undu ghwa kaung'a zetu, naye wanazusilo eri atidee isi tifwane kwa Mlungu.
Селектирано:
Waroma 4: SAGALLANT
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
(C) The Bible Society of Kenya, 1993