Waroma 5
5
Kupatana na Mlungu
1Ndamu kwa kukala tapataniso na Mlungu kwa ngila ya idumusi, tio na sere na Mlungu kwa ngila ya Bwana wetu Jesu Kristo. 2Iye kwa ngila ya idumusi watileta kele iyi mbazi ya Mlungu, tio tikekala nayo ndamu. Tana kuboelo ndamu kwa ikosereo lya kupata ubwaa ghwa Mlungu! 3Sena tio na kuboelo kwa masirimi ghetu, kwa kukala tamanya kamba masirimi gheletagha kurumaghia, 4kurumaghia kwaleta kudumusilo ni Mlungu, na kudumusilo ni Mlungu kwaleta kukoserea. 5Ikosereo ilyo silyidimagha kutifwisha waya, kwa kukala Mlungu watitilila mashayo ghake ngoloni kwetu kwa Roho wa Kuela, uyu ewo inosi lya Mlungu kwetu.
6Kwani ngelo teluo sitewesi uwaruri ghungi, Kristo kafwa kwa undu ghwa wakosi ngelo yesaghulo ni Mlungu. 7Siidimikagha mundu kufwa kwa undu ghwa mundu wa hachi. Yanadimika mundu kufwa kwa mundu waloli. 8Ela Mlungu waonyeza selyi atishaile; ni ngelo teluo wakaung'a Kristo afwile kwa undu ghwetu! 9Kwa bighati yake Kristo, isi ndamu tapataniso na Mlungu. Nini chichumbagha icho ndamu, nesi tijekizo niye na hare ya Mlungu! 10Isi teluo wamaiza wa Mlungu, ela iye katidea tikale wagheni wake kwa kifwa cha Mwana wake. Kwa kukala isi ndamu nisi wagheni wa Mlungu, ikalagha ni kuchumba isi kukizo kwa umana ghwa Kristo. 11Ela agho sigho ghose, isi taboelo kwa undu ghwa Mlungu uyu atidea ndamu tikale wagheni wake kwa ngila ya Bwana wetu Jesu Kristo.
Adamu na Kristo
12Kaung'a yanangilile urumenguni kwa ngila ya mundu mumojori, nayo kaung'a yake ikaleta kifwa. Kwa ngila iyi kifwa chikaera kwa wadamu wose kwa kukala wose wadea kaung'a. 13Kaung'a yeluo urumenguni hambiri ya Sheria, ela andu sikowesi Sheria, kaung'a siitalogho. 14Ela kufuma ngelo ya Adamu hata ngelo ya Musa kifwa cheluo ighulu ya wandu wose, hata walye siwedeile kaung'a yelegha kusikila mlomu ghwa Mlungu sa Adamu.
Adamu oluo ni fwana ya ulya eluo ukujagha. 15Ela awa waili siwafwanane kungi, kwa kukala inosi lya tuu lya Mlungu, silyifwanane na kaung'a ya Adamu. Ni fulo wandu wengi wanafwile kwa undu ghwa kaung'a ya ulya mundu mumojori. Ela mbazi ya Mlungu ni mbwaa kuchumba na kwa hung'u inosi lyake lya tuu kwa wandu wengi ni kwa ngila ya mbazi ya mundu mumojori, Jesu Kristo. 16Na kuwo na machumbano ghati ya inosi lya Mlungu na kaung'a ya mundu mumojori. Nyuma ya kaung'a mojori kukeja mataghanyo ghekosa; ela nyuma ya kaung'a nyingi kukeja inosi lyefwilo waya. 17Ni fulo kamba kwa ngila ya kaung'a ya mundu mumojori kifwa chanadyoile kutawala, kwa undu ghwa ulya mundu mumojori. Ela ni mabwaa sani ghalye ghadeilo ni mundu mumojori, Jesu Kristo! Gha wose kupata ungi ghwa mbazi ya Mlungu na inosi lya tuu lya hachi yake, watawala kele umana kwa ngila ya Jesu Kristo.
18Ndamu, ngera kwa kaung'a ya mundu mumojori, wandu wose wataghanyo, ni hung'u kwenyi na hachi ya mundu mumojori yawafungula wandu wose na kuwahawa umana. 19Na selyi kwenyi wandu wengi wadeilo kukala wakaung'a kwa kulegha kusikila kwa mundu mumojori, niko kwenyi na wandu wengi wejedeo kukala wafweni kwa Mlungu kwa ngila ya kusikila kwa mundu mumojori.
20Sheria yanaletilo, ikadea makosa ghajuzilike; ela kaung'a ijuzilika, mbazi ya Mlungu ikajuzilika kuchumba. 21Kwa hung'u, selyi kwenyi kaung'a itawale kele kifwa, niko kwenyi na mbazi ya Mlungu itawalagha kwa ngila ya hachi, kutidea tipate umana kwa ngila ya Jesu Kristo Bwana Wetu.
Селектирано:
Waroma 5: SAGALLANT
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
(C) The Bible Society of Kenya, 1993