Waroma 3
3
1Ndamu, Wayahudi weo na kimuni kuisa wandu wa mbari nzima? Ango kuwo na faida muni kuchwigho? 2Kuwo na faida mbwaa kwa kila ngila. Hambiri, Mlungu wanawahawile Wayahudi Ilagho lyake. 3Ndamu, ikalagha ije ngera wamoju wawe siweluo wadumusiliki? Idimikagha kwa undu ughu Mlungu sakale mdumusiliki? 4Hata! Mlungu ni fulo hata ngera sani kila mundu ni mndimi. Selyi Mawandiko gha Kuela ghaghora,
“Ni suti uonekane mhachi ngelo ughoragha,
Ni suti usime ngelo utaghanyogho.”
5Ela ndamu ikalagha ije ilyi kudea laghelaghe kwetu kwaonyeza hachi ya Mlungu? Tighore ije? Tighore kamba Mlungu wanadeagha laghelaghe kutikwita? (Nendeghora sa mdamu). 6Hata! Ngera Mlungu seo mhachi udimagha ije kutaghanya urumengu? 7Ela ndamu ikalagha ije ilyi ndimi zangu zawarura ubwaa ghwa hachi ya Mlungu kuonekana mwazi? Kudani nitulagha niketaghanyo sa mkaung'a? 8Kudani ndamu, siteghoragha, “sitadee ghawase eri ghaloli gheje?” Niko kwenyi wandu wamoju wanitukanagha kwa kunishitakia nanaghoragha hung'u! Wejetaghanyo, selyi iwafweni.
Sikwesi mundungi ewo mhachi
9Ndamu ni ije? Isi Wayahudi tio baha kuchumba wandu wa mbari nzima? Hata! Namalila kumwonyeza kamba Wayahudi karakara na wandu wa mbari nzima tio isi ya ndighi ya kaung'a. 10Selyi Mawandiko gha Kuela gheghoragha:
“Sikwesi mundungi ewo mhachi,
11Sikwesi mundungi etambukilogho
ango amhadagha Mlungu.
12Wandu wose wamlegha Mlungu
wandu wose wakosa;
Sikwesi mundungi edeagha ghewo ghaloli, hata mumojori.
13Milomu yawe yendekala mwazi sa mbira;
na malagho gha ndimi sa usungu ghwa nyoka ghafuma
milomuni kwawe.
14Milomu yawe yanajule mawanyizo.
15Wanawanguwe kushoghonola na kuulagha;
16Andu kose waita wasigha furuse.
17Siwaiweni ngila ya sere.
18Hata siwakufundise kumwogha Mlungu.”
19Ndamu tamanya kamba malagho gha Sheria ghawairima walye weo isi ya Sheria, eri mundungi sapate chekutetela na urumengu ghose ghukale isi ya utaghanyo ghwa Mlungu. 20Kwa kukala sikwesi mundungi ewo mhachi mesoni kwa Mlungu kwa kuirima Sheria, ilagho Sheria ideagha, ni kumumanyisa mundu kamba wadea kaung'a.
Kupataniso na Mlungu kwa ngila ya Idumusi
21Ela ndamu ngila ya Mlungu yedea wandu kukala wahachi yaonyezo, nayo siiwataniso na Sheria ingi. Sheria na wana tondolo zanashuhudie, 22Mlungu wanadeagha wandu kukala wahachi kwa idumusi lyawe kwa Jesu Kristo. Mlungu wanadeagha hung'u kwa wandu wose wamdumusa Kristo, kwa kukala sikwesi machumbano ghengi: 23andu wandu wose wadea kaung'a na wagotuilo ni ubwaa ghwa ukizi ghwa Mlungu. 24Ela kwa inosi lya bule lya mbazi ya Mlungu wose wadeo kukala wahachi andu kumoju naye kwa ngila ya Jesu Kristo, uyu ewakombolagha. 25Mlungu wanamfunyile akale sadaka, eri kwa bighati yake akale ngila ya wandu kufwilo waya kaung'a kwa kumdumusa. Mlungu wanadeile hung'u kwa kuwonyeza hachi yake. Ngelo ziitile orumaghie na satalile kaung'a za wandu; 26ela, ngelo iyi wazitala kaung'a za wandu, kuonyeza hachi yake. Kwa ngila iyi Mlungu wakuonyeza kamba ni mhachi na wanawadeagha kukala wahachi, wose wamdumusa Jesu.
27Ni kimuni ndamu tidimagha kukukasa nacho? Sikwesi! Ndamu ni kwa undu muni? Ni kwa undu ghwa kuiwata Sheria? Hata, ela ni kukala tadumusa. 28Kwani tio na fulo kamba mundu wanakalagha mhachi na Mlungu kwa ngila ya idumusi na si kwa kudea gha sheria. 29Ango Mlungu ni kwa Wayahudi keng'weri? Iye si Mlungu wa mbari nzima na zose? Fulo zenyi ni Mlungu wa mbari nzima nazose. 30Mlungu ni mumojori naye ujewadea Wayahudi kukala wahachi kwa ngila ya idumusi, na wandu wa mbari nzima ujewadea wahachi kwa ngila ya idumusi lyawe. 31Hung'u ni kughora tisighe Sheria kwa undu ghwa ilyi idumusi? Hata! Ela tiirime Sheria.
Селектирано:
Waroma 3: SAGALLANT
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
(C) The Bible Society of Kenya, 1993