लूका 12
12
पाखंड गै खिलाफ चेताणो
(मत्ती 10:26,27)
1अर फेर जद बठै हजारां लोगां गी भीड़ भेळी हो'गी अर बे आपसरी में उपर थळी होण लाग्या। जद यीसू सारा ऊं पेलां आपगै चेला नै केयो, “फरीसियां ऊं चोकस रेईयो झिका ढोंगी है।” 2बो टेम आ'ग्यो कै सारी बातां लोगां गै सांमणै परगट हो'सी अर झिको कीं लुकेड़ो है बो लोगां नै बताईजैगो। 3झिकी बातां थे अंधेरै में करी है बे बातां चानणै में सुणाईजैगी, अर झिकी बातां थे मांइली साळ में करी है बे बातां छत गै उपर जोर गी आवाज ऊं सुणाईजैगी।
परमेसर ऊं डरो
(मत्ती 10:28-31)
4झिका मेरा बेली है बानै केऊं कै झिका लोग थारै सरीर नै मारै इंऊं अलावा ओर कीं कोनी कर सकै हिस्या लोगां ऊं थे कदी ना डरो। 5मैं थानै चेतो कराऊं कै थानै किऊं डरणो चाईजै, मरणै गै बाद झिकै नै नरक में घालणै गो अधिकार है थे सिरफ बिं परमेसर ऊं डरो। 6मैं थानै बताऊं थोड़ा पीसा में पांच चिड़ियां मोल मिलज्यै। बे इती सस्ती है पण परमेसर फेर बी बामूं एक नै बी कदी कोनी भूलै अर बांगी संभाळ करै। 7देखो, थारै सिर गा बाळ तांई गिणेड़ा है ईंखातर डरो ना, परमेसर गै खातर थे चिड़ियां गी डार ऊं बी जादा किमती हो।
यीसू नै लोगां सांमै मानो
(मत्ती 10:32,33; 12:32)
8मैं थानै केऊं कै जे कोई मनै संसार में माणसां गै सांमै मानल्यैगो तो मैं मिनख गो बेटो बिनै परमेसर गै सुरगदूतां सांमै मानल्यूंगा। 9पण झिको मनै संसार गै माणसां गै सांमै कोनी मानै बिनै में न्याय गै दिन परमेसर गै सुरगदूतां सांमै कोनी मानूंगा। 10अर बिं आदमी नै माफी मिल सकैगी झिको मिनख गै बेटै गै बिरोध में बोलै पण झिको पवितर आत्मा गै कामां गै बिरोध में बोलै है तो बिनै कदी बी माफी कोनी मिलैगी। 11मेरै कारण जद लोग थानै पकड़गे पंचायता अर अधिकारियां कनै ले जावै तो थे डरियो ना, कै आपगो बचाव किंया करांगा अर बानै जबाब के देवांगा? 12क्यूंकै बिं टेम ई पवितर आत्मा थानै आपी बता देसी कै जबाब के देणो है।
धनवान मूरख गी मिसाल
13बिं टेम बामूं कोई बोल्यो, “हे गुरू, मेरै भाई नै के'दे कै बो म्हारै बाप गी जमीन-जेदाद गी पांती कर ल्यै।” 14यीसू बिनै केयो, “मनै कुण थारै धन गी पांती करण खातर चुण्यो है?” 15अर बानै समझायो कै अपणै आपनै बचाण खातर हर तरियां गै लोभ लाळच ऊं बच्या रेवो अर चोकस रेवो क्यूंकै मिनख गो जीवन बिंगै धन गो गुलाम कोनी होवै। 16आ बात समझाण खातर बानै एक मिसाल बताई: एक अमीर आदमी गै खेत में भोत फसल होई। 17जद बो आपगै मन में बिचार करण लागग्यो कै, “अब मैं के करूं? मेरै कनै तो इती फसल रखण गी जिग्यां ई कोनी।” 18बण केयो, “मैं इंया करूंगा कै छोटी बखारियां नै फोड़'गे मोटी बणवाऊंगा अर सारी फसल अर धन बिमै रखूंगा। 19अर आपगै प्राण नै केऊंगा, ‘आपणो केई सालां गो कोटो पूरो हो'ग्यो अब खा-पी अर सुख-चेन ऊं रेगे ऐंस कर अर मोज मार।’” 20पण परमेसर बिनै केयो, “हे मूरख आदमी, आज रात नै तेरा प्राण खत्म हो'ज्यैगा। अर ओ सारो भेळो करेड़ो धन किंगो हो'सी? अर तेरै कोई काम कोनी आवै।” 21फेर यीसू केयो, “हिस्यो ई बो आदमी है झिको आप खातर धरती पर धन भेळो करै। पण परमेसर गी नजरां में बो कंगाल ई है।”
परमेसर पर भरोसो राखो
(मत्ती 6:25-34)
22फेर आपगै चेला नै केयो, “थे प्राणां गी चिंता ना करे करो कै, के खावांगा अर ना सरीर गी चिंता करे करो कै के पेरां'गा? 23क्यूंकै भोजन ऊं प्राण गो अर कपड़ा ऊं थारै सरीर गो मोल जादा है।” 24फेर केयो, “आं चीड़ी, कागलां नै देखो, ऐ ना तो बीजण जावै अर ना'ई बाडण जावै अर ना आं खातर कोई बखारियां भरेड़ी है फेर ई परमेसर आंगो पेट भरै अर संभाळै है। परमेसर गै खातर थारो मोल आं पंछियां ऊं भोत जादा है। 25थारै में हिस्यो कुण है झिको चिंता कर'गे आपगी उंमर नै एक घड़ी भदा सकै? 26जे आ चिंता इतो छोटो काम ई कोनी कर सकै तो दूसरै मोटै कामां गी चिंता करण ऊं के लाभ है? 27आं जंगळी फूलां गै बुंटा नै देखो, ऐ किंया बदै, ऐ ना तो कीं कातै अर ना'ई कीं काम करै। पण फेर ई राजा सुलेमान गै कनै सारो कीं होंता होयांई बो आं फूलां बरगो कदी कोनी सज धज सक्यो। 28ईंखातर मैदान गी घास नै झिकी आज है काल आग में बाळीज्यैगी परमेसर बिनै ई इती सुणी बणावै है तो, हे कचा बिस्वासियो, बो थानै क्यूं कोनी पिरावैगो, जरूर पिरावैगो। 29अर थे आं बातां गै लारै ना लाग्या रेवो कै म्हे के खावांगा अर के पिवांगा अर ना'ई कोई बेम करो। 30क्यूंकै संसार में परमेसर नै कोनी जाणन आळा लोग आं चिजां गै लारै ई लाग्या रेवै। पण थारो पिता परमेसर जाणै है कै थानै आं चिजां गी जरूरत है। 31जे थे परमेसर गै राज गी इच्छा करोगा तो ऐ सारी चिजां थानै आपी मिलज्यैगी।”
सुरग गो धन
(मत्ती 6:19-21)
32ईंखातर हे मेरा प्यारा चेलो, “थे घबराओ ना, क्यूंकै थानै सुरग गै राज गै प्रजा गो हक देणै में पिता परमेसर नै भोत आनंद होवै। 33थे आपगो सारो कीं बेचगे कंगालां नै बांट देवो अर आप खातर हिस्या बटुआ बणाओ झिका कदी बी पाटण आळा ना होवै। यानी कै सुरग में धन भेळो करो झिको ना कदी घटै अर ना कदी बिनै कोई चोर सकै अर ना कोई किड़ो दीमक लागै। 34क्यूंकै जठै थारो धन होवैगो बठै थारो मन बी लाग्यो रेवैगो।”
जागता रेवो
35थे परमेसर गै काम गै खातर हरदम तैयार रेवो अर रात नै बी दीया जगागे तैयार रेवो। यानी हरदम तैयार रेवो। 36थे बिं दास बरगा बणो झिको रात नै ब्या में गैईड़ै आपगै मालिक नै अडीकतो होवै। कै कद मेरो मालिक आवैगो। अर बिंगै बारनो बजावंता ई दबादब खोलूं। 37अर बो मालिक बिं दास नै जागतो देखै धन्य है बे दास झिकां गो मालिक आ'गे देखैगो कै बे जागता है। मैं थानै साची केऊं बिं टेम बो मालिक खुद कपड़ा बदळगे आपगै नोकर नै खाणो खुहावैगो अर बिंगी सेवा करैगो 38जे बो मालिक आदी रात नै आवै या दिन उगण ऊं पेली आवै पण बिंगो दास बिनै जागतो मिलै तो बो दास नै धन्य मानै। 39पण थे आ जाणल्यो कै जे घर गै मालिक नै ठा होवै कै चोर कद आसी तो बो कदी आपगै घर में चोरी कोनी होण देवै। 40ईंखातर तैयार रेवो, क्यूंकै बिं घड़ी जद थे सोच्यो कोनी ई हो'सी बिं घड़ी मिनख गो बेटो आज्यैगो।
बिस्वास गै लाइक दास या बेईमान दास
(मत्ती 24:45-51)
41जद पतरस बोल्यो, “हे प्रभु, आ मिसाल सिरफ म्हारै खातर बताई है या सगळा लोगां खातर।” 42प्रभु बिनै उतर दियो, “मैं हिस्यै एक बिस्वास लाइक अर बुद्धिमान दास गै बारै में बताण लागरयो हूं। झिकै नै बिंगो मालिक घर गी देखभाळ अर नोकरां नै खुवावण प्यावण गी जिमेदारी दे दी अर आप कठैई दूसरै काम ऊड़ज्यै।” 43पण धन्य है बो दास झिको बिंगै मालिक नै पाछो आंतै टेम ढंग ऊं काम करतो मिलै। 44मैं थानै साची केऊं, “बो मालिक बिंगै बिस्वास गै कारण बिनै आपगी सारी जाएदाद संभालण गी जुमेबारी सोंप देवैगो।” 45पण जे बिंगो दास ओ सोच लेंतो कै मेरो मालिक केई दिना गै बाद ई पाछो आसी अर बो दूसरै नोकरां गै सागै बुरो सलूक करण लागज्यै अर इतो खावै पीवै गै नसो चढ जावै 46जद बिंगो मालिक एकदम ई आ'ज्यै अर बिं दास नै ध्यान ना लागै कै कद आ'ग्यो। जद बिंगो मालिक बिनै भोत मोटी सजा देवैगो अर बिंगी बेईमानां में गिणती करैगो। 47बो दास झिको आपगै मालिक नै आच्छी तरियां जाणै है फेर बी बिंगै केयै पर कोनी चालै तो बो भोत मार खावैगो। 48अर झिका आपगै मालिक गै बारै में कीं ना जाणै अर बाऊं कोई भूल में गळती हो'ज्यै तो बांगै थोड़ी मार पड़ैगी। ईंखातर झिकै मालिक आपगै दास नै कीं जादा दियो बिंऊं भोत जादा मांगै'गो अर झिकै नै भोत सूंपेड़ो है बिंऊं भोत पाछो लेसी।
यीसू गै आणै गो फळ
(मत्ती 10:34-36)
49मैं धरती पर रेण आळा लोगां नै न्यारा-न्यारा करण आळी आग लगाण आयो हूं। अर मैं चाऊं बा आग अब तांई लाग जाणी। 50मेरो दुख उठाणो अर मरणो एक बतिस्मै गी तरियां है अर जद तांई ऐ बातां ना हो'ज्यै, बिं दिन तांई मैं भोत उदास रेऊंगा। 51थे के सोचो, मैं धरती पर मिलाप कराण आयो हूं? ना, मैं थानै केऊं, मैं सारा नै न्यारा न्यारा करण आयो हूं। 52अब ऊं जे किसैई घर में पांच जणा होवैगा तो बे आपसरी में खिंडज्यैगा, तीन जणा दो ऊं न्यारा रेवैगा अर दो जणा तीनां ऊं न्यारा रेवैगा। 53बाप बेटै गै अर बेटो बाप गै खिलाफ रेवैगो, मां बेटी गै अर बेटी मां गै खिलाफ अर सासू बहु गै अर बहु सासू गै खिलाफ में रेवैगी।
ठीक के है?
(मत्ती 16:2,3)
54फेर यीसू लोगां गी भीड़ नै केयो, “थे बादळा नै छिपतै कानी ऊं निकळतो देखो तो केवो मेह आवैगो अर मेह आ'ज्यै। 55अर दिखणादी हवा चालज्यै तो केवो गरमी होवैगी अर हो'ज्यै। 56हे ढोंगीयो, थे धरती अर आकास गै रंग रूप गो तो भेद कर सको पण ईं टेम परमेसर के करै, इंगो थानै क्यूं कोनी ठा लागै।”
राजीनामो कर ल्यो
(मत्ती 5:25,26)
57के ठीक है के गळत है इंगो फेंसलो थे खुद क्यूं कोनी कर सको? 58पण थारै उपर दोस लगाण आळो थानै न्याय करण आळ गै सांमणै लेगे जाण लागरयो है। जद तूं बिंऊं रा में छूटण गो समझोतो कर ले। कठैई इंया ना होवै कै तनै न्यायी कनै ले जा'गे सजा दिरा दैय अर जेळ में बंद करा दैय। 59मैं तनै केऊं हूं जद तांई एक एक पीसा गो हिसाब कोनी चुकावैगो जद तांई जेळ ऊं बारै कोनी आवैगो।
Селектирано:
लूका 12: BGQ
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2023 (Active), Wycliffe Bible Translators, Inc. All rights reserved. © WIn Publishing Trust