लूका 13
13
मन बदळो या नास हो
1जद बठै के'ई लोगां आ'गे यीसू नै बतायो कै रोम देस गै राजा पिलातुस आपगै सिपाईयां ऊं गलील देस गै केई लोगां नै यरुसलेम गै मिन्दर में चढावो चढातां नै बठै मरवा दिया। 2ओ सुणगे यीसू केयो, “थे के सोचो, झिकै लोगां नै मारया बे लोग गलील गै दूसरै लोगां ऊं घणा पापी हा अर ईंखातर बां पर बिपता आ पड़ी।” 3मैं केऊं, “जे थे आपगो मन ना बदळयो तो थे ई बिंयाई खत्म हो जाओगा जिंया बे लोग मरया। 4अर थे बां अठारा लोगां गै बारै में के सोचो झिका पर सीलोहु नाम गी जिग्यां पर पथर गी बुरजी पड़गी अर बे दब'गे मरग्या। बे यरुसलेम में रेण आळै दूसरै लोगां ऊं घणा दोसी हा के?” 5मैं थानै केऊं, “जे थे परमेसर कानी मन ना लगाओगा तो थे बिंयाई खत्म हो जाओगा, जिंया बे लोग होया।”
बिना फळ गो दरखत
6फेर बण लोगां नै एक मिसाल ऊं समझाया कै, कणैई आपगै अंगूरां गै बाग में अंजीर गो दरखत लगायो। पण बिंऊं बिनै कोई फळ कोनी मिल्यो। 7जद बण बाग गै माळी नै केयो, “देख मनै तीन साल हो'ग्या अठै आंतै नै, अजे तांई इंगै कोई फळ लागेड़ो कोनी देख्यो। इनै पट'दे। झिको जिग्यां तो ना रोकै।” 8माळी उतर दियो, “हे स्वामी, इनै आखरी एक साल ओर खड़यो रेण दैयो अबकै मैं इंगै च्यारूंमेर जिग्यां खोद'गे अर खाद रेड़ स्यूं। 9जे अबकै इंगै कीं ना लाग्यो तो इनै पटा'देईयो।”
सब्त गै दिन कुबी लुगाई नै ठीक करणी
10एकर बो सब्त गै दिन सतसंग घर में परचार करण लागरयो। 11बठै एक लुगाई ही झिकी में अठारा सालां ऊं ओपरी बड़ेड़ी ही अर बा बिंऊं कुबी हो'री ईंखातर सीदी कोनी हो सकै ही। 12यीसू बिनै देखगे, आपगै कनै बुला'गे केयो, “हे माता, तूं तेरी बीमारी ऊं छूट जावैगी।” 13जद यीसू बिंगै उपर हात रख्यो। अर हात रखतांई, बा सीदी खड़ी होगी अर परमेसर गी बडाई करण लागगी। 14जद बण बिं लुगाई नै सब्त गै दिन ठीक करी तो सतसंग घर गै मुखिया नै रीस आ'गी अर लोगां नै केण लागग्यो कै छ: दिन होवै है झिका में काम करणो चईजै अर थानै बां दिनां में आ'गे ठीक होणो चईजै पण सब्त गै दिन हिसो काम करणो ठीक कोनी। 15ओ सुणगे प्रभु बोल्या, “हे ढोंगी, कै सब्त गै दिन थे थारै बळद या गधिया ठाण ऊं खोलगे पाणी प्याण कोनी लेगे जाओ के? 16अब आ लुगाई झिकी अबरहाम गै घराणै गी बेटी है अर इनै अठारा सालां ऊं ओपरी बांद राखी। अर आज सब्त गै दिन छूट'गे कोई गळत काम कोनी करयो।” 17जद बण ऐ बातां कैई तो बिंगा बिरोध करण आळा गो पाणी उतर ग्यो। अर बिनै लोगां गी भीड़ बिंगै चमत्कारां गी झिका बो करतो हो बाऊं भोत खुस होण लागगी।
राई गै दाणै गी मिसाल
(मत्ती 13:31,32; मरकुस 4:30-32)
18फेर यीसू केयो, “परमेसर गो राज किंगै बरगो है मैं बिंगी तुलना किंगै सागै करूं।” 19फेर केयो, “बो एक राई गै दाणै गै बरगो है झिकै नै कणैई आपगै खेत में लगायो अर बो बद गे बूंटो बणग्यो अर आकास गा छोटा पंछी बिं पर बसेरो करण लागग्या।”
खमीर गी मिसाल
(मत्ती 13:33)
20बण फेर केयो, “मैं परमेसर गै राज नै किंगै बरगो बताऊ? 21बो खमीर तरियां है झिकै नै कणैई लुगाई लेगे तीन पंसेरी ऊं बोलै आटे में रळागे गूंध दियो अर होळै होळै सारो आटो फूल गे खमीर बणग्यो।”
छोटो बारनो
(मत्ती 7:13,14,21-23)
22बे गाम गाम, नगर नगर परचार करता यरुसलेम कानी चाल पड़या। 23जद कणैई पूछयो कै, “हे प्रभु, थोड़ा सा माणसा नै मुकती मिलसी के?” 24यीसू बानै केण लागग्यो, “परमेसर गै राज गो बारनो भोत भीड़ो है अर बिमै जाण गी पूरी कोसिस करो क्यूंकै बिमै भोत जाणा चावैगा, पण जा कोनी सकैगा। 25अब तो बारनो खुलो है पण एक दिन बो मालिक खड़यो होगे बंद कर देवैगो। तो फेर थे बारै खड़या बारनो खड़का'गे हेला मारता रेईयो। हे प्रभु, म्हारै खातर खोल दे। अर बो मा बेठयो केवै'गो, ‘मैं थानै कोनी जाणू थे कठै'गा हो।’” 26जद थे केवोगा, म्हे थारै सागै रेंता हा, अर थारै सागै ई खांता पींता अर थे म्हानै म्हारी गळियां में ग्यान सुणावंता हा। 27पण बो केवै'गो, “हे पापियो, दूर होज्यो मेरूं। मैं थानै कोनी जाणू थे कठै'गा हो।” 28जद थे, “अबरहाम, इसहाक, याकूब अर सारै परमेसर गी बात बोलण आळा नै परमेसर गै घर में देखोगा। पण थानै बठूं बारै काड देसी। जठै रोणो अर दांत पीसणो होवैगो। 29अर चारूकूंटा गा लोग परमेसर गै घरे आ'गे भोजन करैगा। 30झिकै लोगां गी ईं संसार में भोत कदर होवै है बां लोगां नै बठै तुछ जाण सी अर बेजती करसी।”
राजा हेरोदेस गी दुसमणी
31बिं घड़ी केई फरीसी लोग आ'गे केयो, “अठुं उड़ ज्याओ क्यूंकै हेरोदेस राजा थानै मारणो चावै।” 32बण बानै केयो, “जा'गे बिं लोंबड़ी नै के दैयो मैं आज अर तड़कै ओपरियां नै काडूंगा अर बीमारां नै ठीक करूंगा अर तीसरै दिन मैं मेरो मकसद पूरो करूंगा।” 33ईंखातर आज, तड़कै अर परस्यूं मनै चालणो पड़सी क्यूंकै ओ हो कोनी सकै कै कोई परमेसर गी बात बोलण आळो यरुसलेम ऊं बारै मारयो जावै।
यरुसलेम देस गै खातर दुख करणो
(मत्ती 23:37-39)
34“हे यरुसलेम गा लोगो, थे झिको परमेसर गी बात बोलण आळा नै पथरां ऊं मारो। किती बारी मैं ओ सोच्यो कै कूकड़ी जिंया आपगै बच्चा नै पांख्या नीचै राखै बिंयाई मैं तेरै टाबरां नै राखूंगा। पण थे ओ कोनी चायो।” 35अब परमेसर थारो घर छोड़गे जावै। जद तांई थे मनै कदी कोनी देख सकोगा। जद तांई ओ थे ना केवोगा, “धन्य है बो झिको प्रभु गै नाम ऊं आवै।”
Селектирано:
लूका 13: BGQ
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2023 (Active), Wycliffe Bible Translators, Inc. All rights reserved. © WIn Publishing Trust